Wa Tsundzuka Xana?

Xana u swi tsakerile ku hlaya minkandziyiso ya sweswinyana ya Xihondzo xo Rindza? A hi vone loko u nga ringeta ku hlamula swivutiso leswi landzelaka:

• Yesu u ta “kutsula xisiwana” hi ndlela yihi, hilaha Pisalema 72:12 yi profeteke hakona?

Hi nkarhi wa ku fuma ka yena, vanhu hinkwavo va ta khomiwa hi ndlela leyi lulameke naswona a ku nge vi na vukungundzwana. Hakanyingi nyimpi yi vanga vusweti, kambe Kreste u ta tisa ku rhula loku hetisekeke. U ni ntwela-vusiwana eka vanhu kutani u ta endla leswaku hinkwavo va va ni vun’we, ni ku tiyisekisa leswaku va kuma swakudya leswi ringaneke. (Pisalema 72:4-16)—5/1, tluka 7.

• Hina Vakreste hi nga wu kombisa njhani “ntshunxeko [wa hina] wo vulavula”? (1 Timotiya 3:13; Filemoni 8; Vaheveru 4:16)

Hi nga endla sweswo hi ku hisekela ku chumayela van’wana hi xivindzi, hi ku dyondzisa na hi ku nyikela ndzayo leyi pfunaka hi nkarhi lowu faneleke na hi ku phofula swa le mbilwini ya hina eka Xikwembu hi xikhongelo, hi tiyiseka leswaku xi ta hi twa kutani xi hi hlamula.—5/15, matluka 14-16.

• Ehansi ka Nawu, ha yini matirhelo man’wana ya ntumbuluko ya swirho swa rimbewu a ma endla munhu a va loyi a nga “tengangiki”?

Milawu leyi kombisaka wanuna a ri la nyameke loko a humese mbewu, ni wansati a ri la nyameke loko a ri enkarhini ni loko a tswale n’wana a yi kondletela rihanyo ni mikhuva leyinene yi tlhela yi kandziyisa ndlela leyi ngati yi tengeke ha yona kun’we ni xilaveko xa ku rivaleriwa swidyoho.—6/1, tluka 31.

• Loko munhu a lava ku tsaka, ha yini swi nga n’wi vuyerisaka ku kambisisa buku ya Tipisalema?

Vatsari va Tipisalema a va swi tiva leswaku munhu u tsaka loko a ri ni vuxaka lebyinene ni Xikwembu. (Pisalema 112:1) Va kandziyise leswaku ku va ni vuxaka lebyikulu ni vanhu van’wana, ku va ni swilo swo tala ni ku kota ku fikelela swikongomelo swo karhi a swi nge hi tiseli ntsako lowu kumiwaka hi ku va un’wana wa “vanhu lava Xikwembu xa vona ku nga Yehovha.” (Pisalema 144:15)—6/15, tluka 12.

• Vaisrayele va khale a va ri ni vuxaka byihi byo hlawuleka na Yehovha?

Hi 1513 B.C.E., Yehovha u endle leswaku Vaisrayele va va ni vuxaka lebyintshwa na yena, u endle ntwanano na vona. (Eksoda 19:5, 6; 24:7) Endzhaku ka sweswo, Vaisrayele a va velekiwa va ri swirho swa tiko ra Xikwembu leri hlawuriweke leri tinyiketeleke eka xona. Hambiswiritano, munhu ha un’we a a fanele a tiendlela xiboho xa ku tirhela Xikwembu.—7/1, matluka 21-2.

• Ha yini hi fanele hi “endla swilo hinkwaswo [hi] nga gunguli”? (Vafilipiya 2:14)

Swikombiso swo tala swa le Matsalweni swi kombisa leswaku ku gungula ku vange ku onhaka exikarhi ka vanhu va Xikwembu. Hi fanele hi anakanyisisa swinene malunghana ni nkucetelo lowu onhaka lowu ku nga wu vangaka namuntlha. Vanhu lava nga hetisekangiki va ni mboyamelo wa ku vilela naswona hi fanele hi tshama hi xalamukile leswaku hi ta vona loko mboyamelo lowu se wu lava ku hi nghena kutani hi wu papalata.—7/15, matluka 16-17.

• Hi swi tivisa ku yini leswaku vutlhari lebyi hlamuseriwaka eka Swivuriso 8:22-31 a hi vutlhari byo fanekisela?

Vutlhari byebyo byi ‘humesiwile,’ kumbe byi vumbiwile, tanihi masungulo ya ndlela ya Yehovha. Xikwembu a xi ri kona minkarhi hinkwayo naswona xi tlharihile; vutlhari bya xona a byi vumbiwanga. Vutlhari lebyi ku vulavuriwaka ha byona eka Swivuriso 8:22-31 a byi ri etlhelo ka Xikwembu tanihi “mutirhi la nga ni vuswikoti,” leswi kombetelaka eka xivumbiwa xa moya lexi veke Yesu lexi a xi tirhisana swinene ni Xikwembu eku tumbuluxeni ka swilo. (Vakolosa 1:17; Nhlavutelo 3:14)—8/1, tluka 31.