“Hikwalaho Ka Xifanyetana Xa Malembe Ya Kaye”

NKARHI ni nkarhi loko Wiesława la tshamaka edzongeni wa Poland, a endzeriwa hi Timbhoni ta Yehovha a a rhanga hi ku ti nkhensa ivi a tsema bulo ra tona. Siku rin’wana, xifanyetana xa malembe ya kaye, ku nga Samuel xi n’wi endzerile xi ri ni mana wa xona. Hi siku rero Wiesława u rhandze ku yingisa rungula ra Bibele kutani a amukela magazini lowu vulavulaka hi paradeyisi ya laha misaveni.

Tanihi leswi Xitsundzuxo xa rifu ra Yesu Kreste a xi ri ekusuhi, Samuel a a lava ku rhambela Wiesława eka xiendlakalo lexi xa nkoka. Xifanyetana lexi xi tlhele xi endzela wansati loyi nakambe xi ri ni mana wa xona, xi n’wi khomele xirhambo. Loko Wiesława a vona leswaku xifanyetana lexi xi ambale kahle, u tlhelele endlwini a ya ambala kahle. Loko a vuya, u yingisele rungula ra Samuel, kutani a amukela xirhambo, hiloko a vutisa a ku: “Xana ndzi nga ta ni nkatanga kumbe ndzi fanele ku ta ndzi ri ndzexe?” U engeterile a ku: “Hambiloko nuna wa mina a nga ti, mina ndzi ta ta. Ndzi lava ku ku tiyisekisa Samuel leswaku leswi ndzi rhambiwaka hi wena, ndzi ta ta.” Lexi tsakiseke Samuel hileswi wansati loyi a hetisiseke marito yakwe.

Hi nkarhi wa nkulumo ya Xitsundzuxo, Samuel a a tshame etlhelo ka Wiesława leswaku a n’wi komba matsalwa lawa a ku buriwa ha wona. Leswi swi tsakise wansati loyi. U xi tsakerile Xitsundzuxo naswona u tlangele leswi tidyondzo leti enteke ti hlamuseriweke hi marito yo olova. Nakambe u khumbiwe ngopfu hi ndlela leyi a amukeriweke ha yona ni rirhandzu leri vandlha ri n’wi kombiseke rona. Ku sukela siku rero, ku rhandza ka Wiesława swilo swa moya ku ye ku kula naswona u sungule ku hlanganyela ni Timbhoni ta Yehovha nkarhi ni nkarhi. Wa ha ku vula a ku: “Ndzi khomiwa hi tingana hileswi a ndzi nga mi yingisi eku sunguleni loko mi ndzi endzela. Entiyisweni ndzi yingisele rungula ra n’wina hikwalaho ka xifanyetana xa malembe ya kaye, ku nga Samuel.”

Ku fana na Samuel wa le Poland, vantshwa vo tala lava nga Timbhoni ta Yehovha va dzunisa Xikwembu hi milomu ya vona ni hi mahanyelo ya vona lamanene. Loko wa ha ri muntshwa, na wena u nga pfuna vanhu va timbilu letinene leswaku va tlangela swilo swa moya.