“Ndzi Wu Rhandza Swinene Nawu Wa Wena!”

PISALEMA 119 i risimu leri vulavulaka hi ndlela leyi muqambhi wa rona a titwaka ha yona hi rungula kumbe rito ra Xikwembu leri huhuteriweke. Mupisalema u yimbelerile a ku: “Rito ra wena ndzi ri teke ri ri ra ntikelo embilwini ya mina.” “Ndzi ta rhandza milawu ya wena.” “Moya-xiviri wa mina wa pfotlosiwa hi ku navela swiboho swa wena swa vuavanyisi nkarhi hinkwawo.” “Switsundzuxo swa wena ndza swi rhandza.” “Ndzi navele swileriso swa wena.” “Ndzi ta tsakela swileriso swa wena leswi ndzi swi rhandzeke.” “Ndzi ta anakanyisisa hi swileriso swa wena.” “Ndzi wu rhandza swinene nawu wa wena! Ndzi anakanya ha wona siku hinkwaro.”—Pisalema 119:11, 16, 20, 24, 40, 47, 48, 97.

Mupisalema a a ri tlangela swinene rito ra Xikwembu leri paluxiweke! Xana na wena u titwa hi ndlela leyi fanaka hi rungula leri kumekaka eka Rito ra Xikwembu, ku nga Bibele? Xana u nga swi tsakela ku hlakulela ku ri rhandza hi ndlela yoleyo? Loko swi ri tano, u fanele u rhanga u va ni mukhuva wa ku hlaya Bibele nkarhi na nkarhi, kumbe siku ni siku loko swi koteka. Yesu Kreste u te: “Munhu a nga fanelanga a hanya hi xinkwa ntsena, kambe u fanele ku hanya ni hi rito rin’wana ni rin’wana leri humaka enon’wini wa Yehovha.” (Matewu 4:4) Xa vumbirhi, u fanele u anakanyisisa hi leswi u swi hlayaka. Ku anakanyisisa hi ntiyiso malunghana ni Xikwembu, timfanelo ta xona, ku rhandza ka xona ni xikongomelo xa xona swi ta endla leswaku u tlangela Bibele ngopfu. (Pisalema 143:5) Naswona xa nkoka swinene, u fanele u tirhisa ndzayo ya yona leyi akaka evuton’wini bya wena bya siku ni siku.—Luka 11:28; Yohane 13:17.

Xana ku hlakulela ku rhandza leswi Bibele yi swi vulaka swi ta ku pfuna njhani? Pisalema 119:2 yi ri: “Va tsaka lava hlayisaka switsundzuxo [swa Xikwembu].” Switsundzuxo leswi kumekaka eBibeleni swi ta ku pfuna leswaku u langutana ni swiphiqo swa vutomi hilaha ku humelelaka. (Pisalema 1:1-3) U ta kuma vutlhari ni ku twisisa, leswi nga ta ku pfuna ku ‘sivela milenge ya wena endleleni yin’wana ni yin’wana yo biha.’ (Pisalema 119:98-101) Ku tiva ntiyiso malunghana ni Xikwembu ni xikongomelo xa xona hi misava swi ta endla leswaku vutomi bya wena byi va ni xikongomelo naswona swi ta endla leswaku ntshembo wa wena hi vumundzuku wu tsakisa.—Esaya 45:18; Yohane 17:3; Nhlavutelo 21:3, 4.

Timbhoni ta Yehovha ti swi tsakela swinene ku pfuna van’wana leswaku va tiva Bibele ku antswa ni ku rhandza rungula ra yona. Ha ku rhamba hi mandla mambirhi leswaku u amukela xirhambo lexi landzelaka.