Xana Hi Nga Swi Kota Hakunene Ku Tiva Xikwembu?

“Leswi swi vula vutomi lebyi nga heriki, ku nghenisa ka vona vutivi h[i] . . . Xikwembu xi ri xin’we xa ntiyiso.”—Yohane 17:3.

MUAPOSTOLA PAWULO u huwelerile a ku: “Mawaku ku enta ka rifuwo ni vutlhari ni vutivi bya Xikwembu!” U engeterile a ku: “Vuavanyisi bya xona a byi lavisiseki, ni tindlela ta xona a ti landzeleriseki!” (Varhoma 11:33) Xana marito lawa ma nga hi endla hi gimeta hileswaku vanhu va nge swi koti ku kuma vutlhari ni vutivi bya Xikwembu, ni leswaku a swi koteki ku xi tiva ni ku tiva swikongomelo swa xona?

Vativi van’wana va swa vukhongeri va pfumela leswaku a swi koteki ku tiva Xikwembu. Loko yi vulavula hi langutelo rero, The Encyclopedia of Religion yi ri: “Leswi hi nga swi tivaka hi Xikwembu a hi nchumu loko swi ringanisiwa ni leswi xi nga swona hakunene. . . . Xikwembu a xi nge vitaniwi hi vito kumbe ku hlamuseriwa. Vito kumbe nhlamuselo yihi na yihi ya kayivela, naswona Xikwembu xi tlakuke ku tlula . . . vito kumbe nhlamuselo ya kona. . . . A swi koteki ku xi tiva, hikuva xi tlakuke ku tlula vutivi hi byoxe.” *

Hi ku ya hi magazini wa Newsweek, vanhu vo tala lava nga riki na mhaka ni vukhongeri va pfumela eka “dyondzo leyintshwa” ya leswaku “ku ni ntiyiso wun’we ntsena, naswona ntiyiso lowu i wa leswaku a ku na ntiyiso.”

Hambiswiritano, vanhu vo tala va ha ri ni swivutiso leswi nga hlamuriwangiki malunghana ni xikongomelo xa vutomi. Va vona swiphiqo leswi khomisaka gome swa vusweti, vuvabyi ni madzolonga. Ku nga tiyiseki ka vona hi vutomi swi va heta matimba swinene. Va nga ha swi tsakela ku kuma tinhlamulo kambe loko va nga ti kumi, va nga ha gimeta hileswaku a ti kona. Xisweswo, vo tala va vona va tshike vukhongeri kutani va tilavela ndlela ya vona vini yo tshinela eka Xikwembu—loko hakunene va ha pfumela leswaku xi kona.

Langutelo Ra Bibele

Lava tshembaka Bibele naswona va nga ni mboyamelo wa ku amukela Yesu Kreste tanihi Muvulavuleri wa Xikwembu va fanele va tsakela ku tiva langutelo ra Bibele. Kumbexana wa tsundzuka leswaku Yesu u tshame a vulavula hi magondzo mambirhi, ‘gondzo ro anama ri tlhela ri pfuleka leri yisaka endzovisweni’ ni ‘gondzo ro lala leri yisaka evuton’wini.’ U hlamusele ndlela leyi a hi ta va vona ha yona lava fambaka eka  magondzo hamambirhi, a ku: “Mi ta va vona hi mihandzu ya vona.” Xana i mihandzu ya muxaka muni? A hi nga ta va tiva hi leswi va swi vulaka kambe a hi ta va tiva hi leswi va swi endlaka, hilaha Yesu a hlamuseleke hakona a ku: “A hi hinkwavo lava nge eka mina, ‘Hosi, Hosi,’ lava nga ta nghena emfun’weni wa matilo, kambe ku ta nghena la endlaka ku rhandza ka Tata wa mina la nge matilweni.” A swi ringananga ku vula leswaku hi pfumela eka Xikwembu. Hi fanele hi endla ku rhandza ka Xikwembu. Hilaha ku faneleke, hi fanele hi rhanga hi ku kuma vutivi lebyi kongomeke bya leswaku ku rhandza ka Xikwembu i yini.—Matewu 7:13-23.

Yesu u swi kombise kahle leswaku swa koteka ku va vanhu va kuma vutivi malunghana ni Xikwembu. U te: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.” (Yohane 17:3) Swi le rivaleni leswaku hi nga kuma vutlhari ni vutivi lebyi Xikwembu xi hi hlavutelaka byona—loko ntsena hi tikarhatela ku byi lava. Hambiswiritano, nyiko leyi Xikwembu xi nga ta yi nyika lava endlaka tano i vutomi lebyi nga heriki, kutani ku lavisisa vutlhari ni vutivi bya Xikwembu swa vuyerisa hakunene.

[Nhlamuselo ya le hansi]

[Xifaniso lexi nga eka tluka 4]

Yesu u vule leswaku gondzo lero khuma ri yisa evuton’wini