Ku Aka Swin’we Hi Xikongomelo Xo Dzunisa Xikwembu

VANHU va le ka xin’wana xa Swihlala swa Solomon a va hlalele Holo ya Mfumo leyintshwa ya Timbhoni ta Yehovha. Wansati un’wana u te: “Ekerekeni ya hina hi ni minkwama yo tala yo hlengeleta mali. Hi kombela swirho swa kereke ya hina ku nyikela hi mali, kambe ni sweswi a hi na mali leyi ringaneke yo aka kereke leyintshwa. Xana n’wina Timbhoni mi yi kumisa ku yini mali?” Mbhoni leyi a a vulavula na yona yi te: “Hi gandzela Yehovha tanihi ndyangu wa misava hinkwayo. Vandlha ra hina ni vamakwerhu emisaveni hinkwayo va nyikele hi mali leyi a yi laveka leswaku hi aka Holo ya Mfumo leyintshwa. Yehovha u hi dyondzise leswaku hi va ni vun’we eswilweni hinkwaswo.”

Timbhoni ta Yehovha ti endla swilo hinkwaswo hi vun’we, ni loko ti aka Tiholo ta Mfumo ta magidi. Vun’we bya muxaka lowu loko ku akiwa miako a hi nchumu lowuntshwa. I khale vanhu va Xikwembu va tirha hi vun’we. Ha yini ku vuriwa tano?

Ku Akiwa Ka Tabernakela Ni Tempele

Malunghana ni Vaisrayele, Yehovha u byele Muxe eka malembe lama tlulaka 3 500 lama hundzeke a ku: “Va ta ndzi endlela vukwetsimelo.” (Eksoda 25:8) Malunghana ni pulani ya muako lowu a wu ta akiwa, Yehovha u ye emahlweni a ku: “Hi ku landza hinkwaswo leswi [wena Muxe ndzi ku] kombaka swona swi ri ntila wa tabernakela ni ntila wa hinkwaswo swo yi hetisisa, hi yona ndlela leyi [n’wina tanihi tiko] mi nga ta yi endla ha yona.” (Eksoda 25:9) Kutani Yehovha u hlamusele vuxokoxoko bya pulani ya muako wa vukwetsimelo, nhundzu ni swingolongondzwana. (Eksoda 25:10–27:19) “Tabernakela” kumbe tende leri, a ku ta va ntsindza wa vugandzeri bya ntiyiso eka Vaisrayele hinkwavo.

A hi swi tivi leswaku i vanhu vangani lava a va tirha eku akeni, kambe Vaisrayele hinkwavo a va rhambiwile leswaku va seketela. Muxe u va byerile a ku: “Hlengeletelani Yehovha munyikelo exikarhi ka n’wina. Un’wana ni un’wana la nga ni mbilu leyi swi rhandzaka a a wu tise wu ri munyikelo wa Yehovha.” (Eksoda 35:4-9) Xana Vaisrayele va angule njhani? Eksoda 36:3 yi ri: “Kutani va teka emahlweni ka Muxe munyikelo hinkwawo lowu vana va Israyele va wu tiseke wa ntirho wa vutirheli byo kwetsima, leswaku va wu endla, loko ku ri lavan’wana, a va ha tisa gandzelo ra ku tirhandzela eka yena mixo wun’wana ni wun’wana.”

Endzhakunyana ku ve ni nhundzu yo tala leyi nyikeriweke, naswona vanhu va hambete va tisa leswi engetelekeke. Vavatli lava endlaka ntirho va hetelele va byele Muxe va ku: “Vanhu va tisa swo tala swinene ku tlula leswi vutirheli byi swi lavaka eka ntirho lowu Yehovha a leriseke leswaku  wu endliwa.” Hikwalaho Muxe u te: “Vavanuna ni vavasati, mi nga ha humesi swilo leswi engetelekeke swa munyikelo wo kwetsima.” Vuyelo byi ve byihi? “Swilo a swi ringene ntirho hinkwawo lowu nga ta endliwa, a swi tale ku tlurisa.”—Eksoda 36:4-7.

Hikwalaho ka malwandla ya Vaisrayele, tabernakela yi hetiwe ku nga si hela ni lembe. (Eksoda 19:1; 40:1, 2) Hi ku seketela vugandzeri bya ntiyiso, vanhu va Xikwembu va fundzhe Yehovha. (Swivuriso 3:9) Hi ku famba ka nkarhi, a va ta endla ntirho lowukulu wa ku aka. Nakambe, hinkwavo lava tsakelaka a va ta hoxa xandla entirhweni lowu, ku nga khathariseki leswaku va ni vutshila byo aka kumbe va hava.

Kwalomu ka malembe-xidzana ya ntlhanu endzhaku ko aka tabernakela, Vaisrayele va sungule ku aka tempele eYerusalema. (1 Tihosi 6:1) Tempele yoleyo a yi ta va leyikulu, yi akiwa hi maribye ni timhandzi. (1 Tihosi 5:17, 18) Yehovha u nyike Davhida mpfampfarhuto wa muako wa tempele “hi ku huhuteriwa.” (1 Tikronika 28:11-19) Kambe u hlawule n’wana wa Davhida, Solomoni, leswaku a rhangela entirhweni wo aka. (1 Tikronika 22:6-10) Davhida u seketele ntirho lowu hi mbilu yakwe hinkwayo. U lave maribye, timhandzi ni switirho swin’wana nakambe u nyikele hi nsuku ni silivhere yo tala swinene. U tlhele a khutaza Vaisrayele-kulobye leswaku va hanana, a va vutisa a ku: “I mani la tinyiketelaka namuntlha leswaku a tata voko rakwe hi nyiko ya Yehovha?” Xana vanhu va angule njhani?—1 Tikronika 29:1-5.

Hi nkarhi lowu Solomoni a sunguleke ha wona ku aka tempele, a a ri ni tithani ta magidi ta nsuku ni silivhere. A ku ri ni koporo ni nsimbi yo tala swinene lerova a swi nga koteki ku swi pima. (1 Tikronika 22:14-16) Hi ku pfuniwa hi Yehovha ni nseketelo wa Vaisrayele hinkwavo, ntirho wo aka wu hetiwe hi malembe ya nkombo ni hafu ntsena.—1 Tihosi 6:1, 37, 38.

“Yindlu Ya Xikwembu Xa Ntiyiso”

Tabernakela ni tempele a swi vitaniwa “yindlu ya Xikwembu xa ntiyiso.” (Vaavanyisi 18:31; 2 Tikronika 24:7) Yehovha a a nga si tshama a lava yindlu leyi a nga tshamaka eka yona. (Esaya 66:1) U lerise leswaku miako leyi yi akiwa leswaku ku vuyeriwa vanhu. Phela, loko ku khanguriwa tempele, Solomoni u vutisile a ku: “Xana entiyisweni Xikwembu xi ta tshama emisaveni? Waswivo! Matilo, ina, tilo ra matilo, wona hi woxe a ma nge  ku ringani; kutani yindlu leyi ndzi yi akeke i yitsongo ngopfu!”—1 Tihosi 8:27.

Hi ku tirhisa muprofeta wakwe Esaya, Yehovha u te: “Yindlu ya mina yi ta vuriwa yindlu ya xikhongelo ya vanhu hinkwavo.” (Esaya 56:7) Switlhavelo ni swikhongelo leswi a swi endliwa etempeleni, swin’we ni minkhuvo leyi a yi endliwa kwalaho, swi pfumelele vanhu va Xikwembu—Vayuda ni lava nga riki Vayuda—leswaku va tshinela eka Xikwembu xa ntiyiso. Va ve vanghana va Yehovha va tlhela va sirheleleka hi ku gandzela endlwini yakwe. Ndlela leyi Solomoni a khongeleke ha yona loko ku nyiketeriwa tempele yi kandziyise ntiyiso lowu. U nga hlaya marito yakwe lama yaka eka Xikwembu lama khumbaka mbilu eka 1 Tihosi 8:22-53 na 2 Tikronika 6:12-42.

Yindlu yoleyo ya khale ya Xikwembu xa ntiyiso yi lovisiwe khale, kambe Rito ra Xikwembu ri kombetele eka nkarhi lowu vanhu va tinxaka hinkwato va nga ta hlengeletana va gandzela Yehovha etempeleni leyikulu ya moya. (Esaya 2:2) Xitlhavelo xin’we ntsena lexi hetisekeke xa N’wana wa Xikwembu la tswariweke a ri swakwe, lexi a xi fanekiseriwa hi switlhavelo swa swiharhi leswi nyikeriweke etempeleni, a xi ta va ndlela yo tshinela eka Yehovha. (Yohane 14:6; Vaheveru 7:27; 9:12) Timbhoni ta Yehovha sweswi ti gandzela Xikwembu hi ndlela yoleyo leyi tlakukeke, naswona ti pfuna vanhu vo tala leswaku va endla hilaha ku fanaka.

Mintirho Yo Aka Namuntlha

Emisaveni hinkwayo, Timbhoni ta Yehovha ti gandzela Xikwembu xa ntiyiso. Ti vumba “tiko ra matimba,” leri vanhu va kona va hambetaka va andza. (Esaya 60:22) Ndhawu leyi Timbhoni ta Yehovha ti hlanganaka eka yona hakanyingi i Holo ya Mfumo. * Ku ni magidi ya miako leyi, leyi tirhisiwaka naswona ka ha laveka yin’wana ya magidi.

Timbhoni ta Yehovha “ta tinyikela hi ku tirhandzela” leswaku ti aka Tiholo ta Mfumo leti lavekaka. (Pisalema 110:3) Hambiswiritano, hakanyingi Timbhoni ta ndhawu ya kona ti va ti pfumala vutshila byo aka, naswona tindhawu tin’wana leti vahuweleri va andzaka swinene eka tona ti le vuswetini. Hi 1999, Huvo leyi Fumaka ya Timbhoni ta Yehovha yi simeke tsima ro aka Tiholo ta Mfumo leswaku yi pfuna ku hlangavetana ni swiphiqo sweswo. Hi ku tirhisa tsima leri, Timbhoni leti nga ni vutshila byo aka ti ye etindhawini ta le kule ti ya letela vamakwerhu ku aka Tiholo ta Mfumo. Vatirhi volavo lava leteriweke va ye emahlweni va aka tiholo tin’wana endhawini ya ka vona. Xana byi ve byihi vuyelo bya tsima leri ro hlawuleka?

Hi February 2006, Timbhoni ta Yehovha ematikweni lama pfumalaka ti vone ku akiwa ka Tiholo ta Mfumo letintshwa leti tlulaka 13 000. Hlaya marito ya van’wana lava tirhisaka Tiholo ta Mfumo letintshwa.

“Hi xiringaniso a ku va ni vanhu va 160 eminhlanganweni ya vandlha. Eka nhlangano wo sungula endzhaku ko akiwa ka Holo ya Mfumo leyintshwa, nhlayo ya vanhu lava va vaka kona yi tlakukile yi va 200. Sweswi, endzhaku ka tin’hweti ta tsevu, ku va ni vanhu va 230 eminhlanganweni. Nkateko wa Yehovha eka ntirho wo aka miako leyi yi pfunaka swinene hambiloko yi nga ri ya xiyimo xa le henhla, wa vonaka.”—Mulanguteri wa xifundzha le Ecuador.

“Se ku hundze malembe vanhu va hi vutisa va ku, ‘Xana mi ta yi aka rini Holo ya Mfumo yo fana ni leti hi ti vonaka eka tibuku ta n’wina?’ Hi ku pfuniwa hi Yehovha, hi hetelele hi ri ni ndhawu leyi langutekaka yo gandzela eka yona. A hi khomela minhlangano evhengeleni ra  makwerhu, laha a ku ta vanhu va 30 hi xiringaniso. Eka nhlangano wo sungula eHolweni ya Mfumo leyintshwa, ku ve ni vanhu va 110.”—Vandlha ra le Uganda.

“Maphayona mambirhi ya xisati ya nkarhi hinkwawo ma vula leswaku swa tsakisa swinene ku tirha ensin’wini leyi, ku sukela loko ku akiwe Holo ya Mfumo. Vanhu va rhandza ku twa leswi hi va khomeleke swona loko hi ri entirhweni wa yindlu ni yindlu ni loko hi chumayela hi xitshuketa. Sweswi vamakwerhu lava va fambisa tidyondzo ta Bibele ta 17, naswona vanhu vo tala lava va dyondzaka na vona Bibele va ta eminhlanganweni.”—Rhavi ra le Swihlaleni swa Solomon.

“Mufundhisi loyi a tshamaka ekusuhi ni Holo ya Mfumo leyintshwa u vula leswaku yi tisa xindzhuti emugangeni hinkwawo naswona vanhu hinkwavo va tinyungubyisa ha yona. Vanhu vo tala lava hundzaka hi kona va bumabumela ku saseka ka holo. Sweswo swi nyika vamakwerhu lunghelo lerinene ro nyikela vumbhoni. Vanhu vo tala swinene va lava ku tiva hi ta nhlengeletano ya vamakwerhu emisaveni hinkwayo. Vo tala lava se ku heleke malembe yo tala va nga ti eminhlanganweni va khutazekile kutani va tlhela va hlanganyela nkarhi ni nkarhi.”—Rhavi ra le Myanmar.

“Makwerhu un’wana wa xisati u rhambe wanuna loyi a tsakelaka ku ya laha a ku akiwa holo emugangeni wa ka vona. Endzhakunyana wanuna loyi u te: ‘A ndzi ehleketa leswaku vatirhi a va nge ndzi pfumeleli leswaku ndzi nghena. Lexi ndzi hlamariseke, Timbhoni ti ndzi xewetile ti tsakile. Vavanuna ni vavasati a va tirha hi matimba, va nga tlangi hi nkarhi. A va twanana naswona a va tsakile.’ Wanuna loyi u amukele dyondzo ya Bibele kutani a sungula ku ta eminhlanganweni. Hi ku famba ka nkarhi u te: ‘Vonelo  ra mina ri cincile. Leswi se ndzi kumeke Xikwembu a ndzi nge xi tshiki.’”—Rhavi ra le Colombia.

Nseketelo Wa Hina I Wa Nkoka

Ku aka Tiholo ta Mfumo i xiphemu xa nkoka entirhweni wa hina wo kwetsima. Ndlela leyi Timbhoni ta Yehovha emisaveni hinkwayo ti seketeleke ntirho wolowo ha yona—hi timali na hi swilo swin’wana—ya tlangeriwa swinene. Kambe hi fanele ku tsundzuka leswaku timhaka tin’wana leti fambisanaka ni ntirho wo kwetsima na tona i ta nkoka. Nkarhi ni nkarhi, Vakreste va hlaseriwa hi makhombo ya ntumbuluko kutani va lava mpfuno wa hina. Ku kandziyisiwa ka tibuku ta Bibele swi hoxa xandla swinene eku seketeleni ka ntirho wo kwetsima. Vo tala va hina hi vone matimba ya timagazini kumbe tibuku leti sekeriweke eBibeleni leti amukeriweke hi vanhu lava nga ni mboyamelo lowunene. Ku engetela kwalaho, ku seketela varhumiwa ni van’wana lava nga entirhweni wo hlawuleka wa nkarhi hinkwawo i swa nkoka swinene. Vakreste volavo lava titsonaka swo tala va pfuneta swinene eku ndlandlamuxiweni ka ntirho wo chumayela emasikwini lawa yo hetelela.

Lava va pfuneteke entirhweni wo aka tempele va ve ni ntsako lowukulu. (1 Tikronika 29:9) Ninamuntlha, ku seketela vugandzeri bya ntiyiso hi minyikelo swi hi tisela ntsako. (Mintirho 20:35) Hi va ni ntsako wolowo loko hi hoxa minyikelo ya hina emabokisini ya Nkwama wo Aka Tiholo ta Mfumo ni loko hi nyikela eka ntirho wa misava hinkwayo, xisweswo hi seketela mintirho yin’wana leyi fambisanaka ni ku chumayeriwa ka mahungu lamanene ya Mfumo. Timbhoni ta Yehovha namuntlha ti ni vun’we lebyikulu evugandzerini bya ntiyiso. Onge hinkwerhu ka hina hi nga va ni ntsako lowu tisiwaka hi ku seketela vugandzeri byebyo!

[Nhlamuselo ya le hansi]

[Bokisi leri nga eka tluka 20, 21]

Tindlela Leti Van’wana Va Hlawulaka Ku Nyikela Ha Tona

MINYIKELO YA NTIRHO WA MISAVA HINKWAYO

Vo tala va tivekela mali yo karhi leyi va nga ta hamba va yi nghenisa emabokisini ya munyikelo lama nga ni mfungho lowu nge “Minyikelo Ya Ntirho Wa Misava Hinkwayo—Matewu 24:14.”

N’hweti na n’hweti, mavandlha ma rhumela minyikelo leyi erhavini ra Timbhoni ta Yehovha leri langutelaka matiko lawa mavandlha ya kona ma nga eka wona. Nakambe minyikelo ya ku tirhandzela yi nga rhumeriwa hi ku kongoma eka Watch Tower Bible and Tract Society of South Africa, Attention: Accounting Office, Private Bag X2067, Krugersdorp, 1740, South Africa, kumbe ehofisini ya rhavi ya Timbhoni ta Yehovha leyi langutelaka tiko ra ka n’wina. Loko u nyikela hi cheke eka adirese leyi nga laha henhla, tsala leswaku mali ya kona yi ya eka “Watch Tower.” Swin’wetsin’wetsi kumbe swilo swin’wana swa nkoka na swona swi nga nyikeriwa. Minyikelo yo tano yi fanele ku fambisana ni papila ro koma leri hlamuselaka leswaku leyi i nyiko.

NYIKO LEYI KUNGUHATIWEKE

Ku engetela eka minyikelo leyi kongomeke, ku ni tindlela tin’wana ta ku nyikela leti vuyerisaka ntirho wa Mfumo wa misava hinkwayo. Tona ti katsa:

Ndzindza-khombo: Watch Tower yi nga tsariwa tanihi leyi nga ta sala yi tirhisa mali ya ndzindza-khombo wa vutomi kumbe ya mudende loko n’wini wa yona a file.

Mali Leyi Lombisiweke Hi Ntswalo: Mali leyi lombisiweke hi ntswalo yi nga nyikeriwa eka Watch Tower, tanihi nyiko leyi heleleke.

Ndhawu: Ndhawu leyi xavisekaka yi nga ha nyikeriwa hi ku kongoma kumbe loko ku ri yindlu yinene, ku endliwa ntwanano wa leswaku yi ta tekiwa ntsena loko loyi a nyikeleke ha yona a rhurha kumbe a fa. Tivisa hofisi ya rhavi ya le tikweni ra ka n’wina u nga si nyikela hi ndhawu.

Swiboho: Nhundzu kumbe mali swi nga ha nyikeriwa eka Watch Tower hi ku tirhisa xileriso xa mufi lexi nga enawini.

Loko u lava rungula leri engetelekeke, u fanele u vutisa Accounting Office hi ku ba riqingho kumbe hi ku tsalela eka adirese leyi nga laha hansi kumbe u vutisa hofisi ya rhavi ya Timbhoni ta Yehovha leyi langutelaka ntirho wo chumayela etikweni ra ka n’wina.

Accounting Office

Watch Tower Bible and Tract Society of South Africa

Private Bag X2067

Krugersdorp

1740

South Africa

Riqingho: (011) 761-1000

[Xifaniso lexi nga eka tluka 18]

Ntirhisano wa hina wu endla swi koteka ku aka Tiholo ta Mfumo to saseka emisaveni hinkwayo

[Xifaniso lexi nga eka tluka 18]

Holo ya Mfumo leyintshwa eGhana