Dyondzisa Vana Va Wena Ku Hlamula

PERLA wa le Mexico wa ha tsundzuka leswaku loko a ha ri xinhwanyetana, mana wakwe a a n’wi pfuna ku lunghiselela tinhlamulo to koma leswaku a hlamula eka Dyondzo ya Xihondzo xo Rindza. Sweswi Perla u ni n’wana wa jaha la nga ni malembe ya ntlhanu hi vukhale. U n’wi pfuna njhani? U ri: “Ndzi fanele ndzi rhanga hi ku lunghiselela. Loko ndzi ri karhi ndzi lunghiselela, ndzi lavisisa ndzimana leyi n’wana wa mina wa jaha a nga yi twisisaka, leyi a nga kotaka ku yi hlamusela hi marito yakwe. Kutani hi dzika eka ndzimana leyi a vulaka leswaku ‘a nga swi kota ku yi hlamusela.’ Ndzi n’wi kombela leswaku a yi hlamusela hi ku tirhisa swikombiso swa siku ni siku leswi a swi twisisaka. Kutani hi phindha-phindha nhlamulo ya kona. Hi tirhisa nchumu wo karhi lowu ringanaka ni xikurisa-marito leswaku a vona ndlela leyi a nga xi khomaka ha yona loko a hlamula. Ndza tsaka swinene hileswi eka nhlangano wun’wana ni wun’wana a hlamulaka kumbe a tlakusa voko. Minkarhi yo tala, u ya eka mufambisi wa dyondzo loko minhlangano yi nga si sungula kutani a n’wi komba swivutiso leswi a lavaka ku nyikela tinhlamulo ta swona.”

Jens, nkulu un’wana la hlanganyelaka ni ntlawa lowu vulavulaka Xihindi, u ni vana vambirhi va majaha, un’wana u ni malembe mambirhi kasi lowun’wana u ni mune wa malembe. Loko yena ni nsati wakwe va lunghiselela minhlangano ni vana va vona, va tirhisa endlelo leri Jens a ri dyondzeke eka vatswari vakwe. U ri: “Hi hlawula tindhawu leti nga olovelaka vana va hina ku ti twisisa. Kutani hi ringeta ku va katsakanyela mhaka yoleyo kumbe hi va byela tinhla-nkulu ta xihloko xolexo, ivi hi va vutisa swivutiso leswi hina hi lavaka leswaku va swi hlamula eminhlanganweni. Minkarhi yo tala ha hlamala loko hi twa tinhlamulo letinene leti va ti nyikelaka hi marito ya vona. Hakunene ndlela leyi va tiphofulaka ha yona yi kombisa leswi va swi twisisaka. Xisweswo, tinhlamulo ta vona ti va ku dzunisa ka xiviri loku yaka eka Yehovha ni xiendlo xa munhu hi yexe xa ripfumelo ra vona.”