Ha Yini U Fanele U Tiva Mukaneti Wa Kreste?

Khale swinene, muapostola la huhuteriweke u tsale a ku: “[Mi swi twile] leswaku mukaneti wa Kreste wa ta.” (1 Yohane 2:18) Marito wolawo ma koka rinoko hakunene! Se ku hundze madzana ya malembe vanhu va ri karhi va tivutisa hi nhlamuselo ya wona. I mani mukaneti wa Kreste? Xana u ta ta rini? U ta endla yini loko se a fikile?

NHLAYO ya vanhu lava lumbetiweke leswaku i vakaneti va Kreste i yikulu. Enkarhini lowu hundzeke, lava a va vuriwa ‘vakaneti va Kreste’ a va katsa Vayuda, vapapa va Khatoliki ni tihosi ta le Rhoma. Hi xikombiso, loko Hosi Frederick wa Vumbirhi (1194-1250) a ale ku pfuna kereke eNyimpini ya Vakreste ni Mamoslem, Mupapa Gregory wa Vukaye u n’wi vule mukaneti wa Kreste kutani a n’wi hlongola ekerekeni. Mutlhandlami wa Gregory, ku nga Innocent wa Vumune, na yena u n’wi hlongorile ekerekeni. Hiloko Frederick a vula leswaku Innocent hi yena mukaneti wa Kreste.

Muapostola Yohane hi yena ntsena eka vatsari va Bibele loyi a tirhiseke xiga lexi nge “mukaneti wa Kreste.” Eka mambirhi ya mapapila yakwe, xiga lexi xi humelela ka ntlhanu xi ri eka vun’we ni le ka vunyingi. Tindzimana leti xiga lexi xi humelelaka eka tona ti xaxametiwe eka bokisi leri nga eka tluka leri landzelaka. Eka tindzimana teto hi kota ku vona leswaku mukaneti wa Kreste i muhembi ni mukanganyisi loyi a tiyimiseleke ku dlaya vuxaka lebyi munhu a nga na byona na Kreste ni Xikwembu. Hikwalaho, muapostola u khutaze Vakreste-kulobye a ku: “Varhandziwa, mi nga kholwi marito hinkwawo lama huhuteriweke, kambe kambisisani marito lama huhuteriweke mi vona loko swi ri leswaku ma huma eka Xikwembu, hikuva ku humelele vaprofeta vo tala va mavunwa emisaveni.”—1 Yohane 4:1.

Yesu na yena u lemukise malunghana ni vakanganyisi kumbe vaprofeta va mavunwa a ku: “[Va ta] va ambale nguvu ya nyimpfu, kambe endzeni va ri timhisi leti kakatlulaka. Mi ta va vona hi mihandzu [kumbe mintirho] ya vona.” (Matewu 7:15, 16) Xana Yesu hi hala tlhelo a a lemukisa valandzeri vakwe leswaku va tivonela eka mukaneti wa Kreste wo fanekisela? A hi voneni leswaku hi nga n’wi lemuka njhani mukanganyisi loyi wa nsele.