Moya Wa Khisimusi—Xana Wu Va Kona Siku Rin’wana Ni Rin’wana?

“Ku vangama a ku ve ehenhla-henhla eka Xikwembu, ni le henhla ka misava ku va ni ku rhula exikarhi ka vanhu lava amukelekaka.”—Luka 2:14.

VANHU va timiliyoni va ma toloverile marito lawa lama vuriweke hi tintsumi ta Xikwembu loko ti tivisa ta ku velekiwa ka Yesu eka varisi lava a va risa mintlhambi ya vona nivusiku. Vanhu vo tala lava tivulaka Vakreste va endla matshalatshala lama hlawulekeke yo antswisa mahanyelo ya vona hi nkarhi lowu tikereke ti vulaka leswaku Yesu u velekiwe ha wona. Mboyamelo wa ku khana, ku kondletela ku rhula ni ku navelelana leswinene—ku nga timfanelo leti tintsumi ti vulavuleke ha tona—hakanyingi wu vitaniwa moya wa Khisimusi.

Ku tikhoma koloko lokunene ku koka ni vanhu lava nga tlangeriki Khisimusi tanihi holideyi ya vukhongeri. Na vona va wu tsakela nkhuvo lowu hileswi wu tikombaka wu kondletela xinakulobye lexinene. Etindhawini leti swikolo swi vaka swi pfarile kumbe vanhu va nga yi emintirhweni hi nkarhi wa Khisimusi, holideyi leyi yi endla leswaku vanhu va kuma nkarhi wa ku wisa, wa ku tshama ni mindyangu ya vona ni vanghana kumbe va tiphina ntsena. Ina, vanhu vo tala va timbilu letinene va teka Khisimusi yi ri nkarhi lowunene wa ku xixima Yesu Kreste.

Ku nga khathariseki leswaku va teka Khisimusi yi ri ya nkoka ku fikela kwihi, vo tala va pfumela leswaku ku tikhoma kun’wana ni kun’wana lokunene loku susumeteriwaka hi holideyi leyi i ka xinkarhana. Vanhu va hatla va tlhelela eka mahanyelo ya vona lama tolovelekeke. Xitsalwana lexi kandziyisiweke hi Royal Bank ya le Canada lexi nga ni nhloko-mhaka leyi nge, “Moya Wa Khisimusi,” xi te: “Vanhu vo tala lava tivulaka ‘Vakreste’ va ringeta ntsena ku hanya hi ku pfumelelana ni vito rolero swa mavhiki ma nga ri mangani ntsena lembe na lembe, laha va tikhomaka hi ndlela leyi amukelekaka eka vanhu-kulobye kukondza ku sungula Lembe Lerintshwa kutani va tlhelela eka vutomi bya vona bya vutianakanyi ni bya ku nga khathali hi vuhlayiseki bya vanhu van’wana.” Loko papila leri ri ya emahlweni, ri vula leswaku lexi “nga tsakisiki nikatsongo” hi moya wa Khisimusi hileswi vanhu va nga wu kombisiki “siku rin’wana ni rin’wana.”

Ku nga khathariseki leswaku u pfumelelana ni nkambisiso wolowo kumbe e-e, kambe wu tlakusa swivutiso swa nkoka. Xana vanhu va ta kala va swi kota ku kombisa moya wa ku hanana ni ku va ni xinghana ni van’wana siku rin’wana ni rin’wana? Xana wu kona ntshembo wa xiviri wa leswaku marito lama vuriweke hi tintsumi hi vusiku lebyi Yesu a velekiweke ha byona ma ta hetiseka? Kumbe, xana ntshembo wa ku rhula ka ntiyiso ko va norho ntsena?