“Siku Lerikulu Ra Yehovha Ri Le Kusuhi”
“Siku Lerikulu Ra Yehovha Ri Le Kusuhi”
“Siku lerikulu ra Yehovha ri le kusuhi. Ri le kusuhi, naswona ra hatlisa swinene.”—SOFANIYA 1:14.
1, 2. (a) Hi rihi siku ro hlawuleka leri Vakreste va ri rindzeleke? (b) Hi swihi swivutiso leswi hi faneleke hi tivutisa swona naswona ha yini?
NHWANYANA la tsakeke u ri rindzele hi mapfundza siku ra yena ra mucato. Manana la nga kusuhi ni ku veleka u ku langutele hi mahlo-ngati ku velekiwa ka n’wana wakwe. Mutirhi la karhaleke u wu rindzele swinene nkarhi lowu a nga ta ya eku wiseni ha wona. Hi wihi nchumu lowu fanaka lowu vanhu lava va nga na wona? Hinkwavo va rindzele siku ro hlawuleka—siku leri nga ta khumba vutomi bya vona. Va khumbeke swinene kambe ndlela leyi va titwaka ha yona yi hambanile. Siku leri va ri rindzeleke ri ta hetelela ri fikile naswona va ni ntshembo wa leswaku va ta va va ri lunghekerile loko ri fika.
2 Hi ndlela leyi fanaka, Vakreste va ntiyiso namuntlha va ku rindzele hi mahlo-ngati ku fika ka siku ro hlawuleka. I “siku ra Yehovha” lerikulu. (Esaya 13:9; Yuwele 2:1; 2 Petro 3:12) Xana i yini “siku [leri] ra Yehovha” leri taka naswona ku fika ka rona ku ta va khumba njhani vanhu? Tlhandlakambirhi, hi nga tiyiseka njhani leswaku hi ku lunghekerile ku fika ka rona? I swa nkoka leswaku hi lava tinhlamulo ta swivutiso leswi sweswi hikuva vumbhoni byi kombisa leswaku ma tshembekile marito lama landzelaka lama humaka eBibeleni lama nge: “Siku lerikulu ra Yehovha ri le kusuhi. Ri le kusuhi, naswona ra hatlisa swinene.”—Sofaniya 1:14.
“Siku Lerikulu Ra Yehovha”
3. “Siku lerikulu ra Yehovha” i yini?
3 “Siku lerikulu ra Yehovha” i yini? EMatsalweni hinkwawo, xiga lexi nge “siku ra Yehovha” xi kombetela eka minkarhi yo hlawuleka laha Yehovha a avanyiseke valala va yena kutani a kwetsimisa vito rakwe lerikulu. Vanhu lava nga tshembekangiki va le Yuda ni le Yerusalema swin’we ni vaaki lava tshikilelaka va le Babilona ni le Egipta, hinkwavo va langutane ni ‘masiku ya Yehovha’ loko va fikeriwa hi ku avanyisa ka Yehovha. (Esaya 2:1, 10-12; 13:1-6; Yeremiya 46:7-10) Hambiswiritano, “siku ra Yehovha” lerikulu swinene ra ha ta fika. I “siku” leri Yehovha a nga ta avanyisa lava hehleke vito rakwe. Ri ta sungula loko ku lovisiwa “Babilona Lonkulu,” ku nga mfumo wa misava wa vukhongeri bya mavunwa, naswona ri ta chaputa loko ku herisiwa mafambiselo ya swilo hinkwawo yo biha enyimpini ya Armagedoni.—Nhlavutelo 16:14, 16; 17:5, 15-17; 19:11-21.
4. Ha yini vanhu vo tala va fanele va chava siku ra Yehovha leri taka hi ku hatlisa?
4 Ku nga khathariseki leswaku va swi xiya kumbe a va swi xiyi, vanhu vo tala va fanele va ri chava siku leri leri taka hi ku hatlisa. Ha yini? Hi ku tirhisa muprofeta Sofaniya, Yehovha wa hlamula: “Siku rero i siku ra ku hlundzuka, siku ra maxangu ni ra ku vaviseka, siku ra xidzedze ni ku onhetela, siku ra munyama ni ku dzwihala, siku ra mapapa ni ra ku dzwihala lokukulu.” Ra chavisa hakunene! Ku engetela kwalaho, muprofeta loyi u ri: “Ndzi ta karhata vanhu . . . hikuva va dyohele Yehovha.”—Sofaniya 1:15, 17.
5. Hi rihi langutelo leri khutazaka leri vanhu va timiliyoni va nga na rona malunghana ni siku ra Yehovha, naswona ha yini?
5 Hambiswiritano, vanhu van’wana va timiliyoni va ku langutele hi mahlo-ngati ku fika ka siku ra Yehovha. Ha yini? Va swi tiva leswaku i nkarhi wa ku ponisiwa ni ku kutsuriwa ka lavo lulama, siku leri Yehovha hi byakwe a nga ta tlakusiwa ni vito rakwe leri vangamaka ri nga ta kwetsimisiwa. (Yuwele 3:16, 17; Sofaniya 3:12-17) Ku chava siku leri kumbe ku ri langutela hi mahlo-ngati swi titshege ngopfu hi ndlela leyi va hanyaka ha yona sweswi. U ku teka njhani ku tshinela ka siku rero? Xana u ri lunghekerile? Xana ntiyiso wa leswaku siku ra Yehovha ri tshinele wa byi khumba vutomi bya wena bya siku ni siku sweswi?
“Ku Ta Va Ni Vahlekuri Lava Hlekulaka”
6. Vanhu vo tala va ri teka njhani “siku ra Yehovha,” naswona ha yini sweswo swi nga va hlamarisi Vakreste va ntiyiso?
6 Ku nga khathariseki leswi xiyimo lexi xi nga xa xihatla, vaaki vo tala va misava a va na mhaka ni “siku ra Yehovha” leri tshinelaka. Va vungunya va tlhela va hlekula lava va va tsundzuxaka hi ta ku fika ka rona loku tshineleke. Sweswo a swi va hlamarisi Vakreste va ntiyiso. Va tsundzuka xilemukiso lexi tsariweke hi muapostola Petro lexi nge: “Xo sungula tivani leswaku, emasikwini ya makumu ku ta va ni vahlekuri lava hlekulaka, va famba hi ku ya hi ku navela ka vona va ku: ‘Byi kwihi vukona byakwe lebyi tshembisiweke? Hikuva, ku sukela siku vatata wa hina va etleleke ha rona eku feni, swilo hinkwaswo swa ha tshame hilaha a swi ri hakona eku sunguleni ka ntumbuluko.’”—2 Petro 3:3, 4.
7. I yini leswi nga ta hi pfuna ku tshama hi hitekile?
7 I yini leswi nga hi pfunaka ku papalata langutelo ro tano ro biha xisweswo hi tshama hi hitekile? Petro wa hi byela: “Ndzi [pfuxa] matimba ya n’wina ya ku ehleketisisa, hi ku mi tsundzuxa, leswaku mi tsundzuka marito lama vuriweke khale hi vaprofeta vo kwetsima ni xileriso xa Hosi tlhelo Muponisi lexi teke hi vaapostola va n’wina.” (2 Petro 3:1, 2) Ku nyikela nyingiso eka switsundzuxo swa vuprofeta swi ta hi pfuna leswaku hi ‘pfuxa matimba ya hina ya ku ehleketisisa.’ Kumbexana hi swi twe ko tala switsundzuxo leswi, kambe i swa nkoka leswaku sweswi, ku tlula rini na rini, hi hambeta hi nyikela nyingiso eka switsundzuxo leswi.—Esaya 34:1-4; Luka 21:34-36.
8. Ha yini vo tala va honisa switsundzuxo swa le Bibeleni?
8 Ha yini van’wana va honisa switsundzuxo leswi? Petro u ya emahlweni a ku: “Hi ku navela ka vona, a va yi lemuki mhaka ya leswaku ku sukela khale a ku ri ni matilo ni misava leyi yimeke yi vumbana ehandle ka mati ni le xikarhi ka mati hi rito ra Xikwembu; naswona misava ya nkarhi wolowo yi lovisiwile ha wona loko mati ma yi khubumeta.” (2 Petro 3:5, 6) Ina, va kona lava nga laviki leswaku siku ra Yehovha ri fika. A va lavi nchumu lexi nga ta kavanyeta ndlela leyi va hanyaka ha yona. A va lavi ku tihlamulela eka Yehovha hikwalaho ka ndlela leyi va hanyaka ha yona ya vutianakanyi! Hilaha Petro a vulaka hakona, va hanya hi ku ya “hi ku navela ka vona.”
9. Hi rihi langutelo leri kombisiweke hi vanhu va le masikwini ya Nowa ni ya Lota?
9 Hikwalaho ka ku “navela ka vona,” vahlekuri lava va hlawula ku honisa leswaku Yehovha u tshame a nghenelela eka timhaka ta vanhu enkarhini lowu hundzeke. Yesu Kreste na muapostola Petro va kombetela eka swiendlakalo sweswo swimbirhi, ku nga “emasikwini ya Nowa” ni le ‘masikwini ya Lota.’ (Luka 17:26-30; 2 Petro 2:5-9) Emahlweni ka Ndhambi, vanhu a va xi tekelanga enhlokweni xitsundzuxo lexi nyikeriweke hi Nowa. Hilaha ku fanaka, emahlweni ka ku lovisiwa ka Sodoma na Gomora, Lota “a a vonaka a fana ni munhu la vungunyaka” ematihlweni ya vakon’wana vakwe.—Genesa 19:14.
10. Yehovha u va byela yini lava nga yingisiki?
10 Swi tano ni namuntlha. Kambe, xiya leswi Yehovha a swi byelaka lava nga yingisiki: “Ndzi ta nyikela nyingiso eka vanhu lava va tshamisekeke ehenhla ka swisese swa vona, lava va vulaka embilwini ya vona va ku, ‘Yehovha a nge endli leswinene naswona a nge endli leswo biha.’ Rifuwo ra vona ri fanele ri phangiwa ni tindlu ta vona ti va rhumbi. Va ta aka tindlu, kambe a va nge tshami eka tona; va ta rima masimu ya vhinya, kambe a va nge yi nwi vhinyo ya wona.” (Sofaniya 1:12, 13) Vanhu va nga ha hambeta va endla mintirho ya vona leyi “tolovelekeke,” kambe va nge vuyeriwi hilaha ku nga heriki eka mintirho ya vona ya matimba. Ha yini? Hikuva siku ra Yehovha ri ta fika hi xitshuketa naswona rifuwo rin’wana ni rin’wana leri va nga ha vaka va ri hlayisile a ri nge va ponisi.—Sofaniya 1:18.
“Tshama U Xi Languterile”
11. Hi xihi xitsundzuxo lexi hi faneleke hi xi tsundzuka nkarhi hinkwawo?
11 Ku hambana ni misava yo homboloka leyi hi rhendzeleke, hi fanele hi tshama hi ri karhi hi tsundzuka xitsundzuxo lexi tsariweke hi muprofeta Habakuku lexi nge: “Xivono xa ha ri xa nkarhi lowu vekiweke, naswona xi hatlisela emakumu, a xi nge hembi. Hambiloko xo hlwela, tshama u xi languterile; hikuva xi ta hetiseka hakunene. A xi nge hlweli.” (Habakuku 2:3) Hambiloko siku rolero ri nga ha vonaka ri hlwela hi ku ya hi langutelo ra hina leri nga hetisekangiki, hi fanele hi tsundzuka leswaku Yehovha a nga nonoki. Siku ra yena ri ta fika hi nkarhi lowu faneleke, hi awara leyi vanhu va nga yi langutelangiki.—Marka 13:33; 2 Petro 3:9, 10.
12. Yesu u tsundzuxe malunghana na yini, naswona sweswo swi hambana njhani ni mintirho ya valandzeri va Yesu vo tshembeka?
12 Loko Yesu a kandziyisa nkoka wa ku tshama hi langutele siku ra Yehovha, u tsundzuxe leswaku hambi ku ri van’wana va valandzeri vakwe a va ta tshika ku hiteka. U profete malunghana na vona a ku: “Loko hlonga lero biha ro tshuka ri tibyela embilwini ri ku, ‘N’wini wa mina wa hlwela,’ ivi ri sungula ku ba mahlonga-kulobye ri tlhela ri dya ni ku nwa ni swidakwa leswikulu, n’wini wa hlonga rero u ta ta hi siku leri ri nga ri langutelangiki ni hi nkarhi lowu ri nga wu tiviki, kutani u ta ri xupula hi ndlela leyi vavaka swinene.” (Matewu 24:48-51) Ku hambana ni sweswo, hlonga ro tshembeka ni ro tlhariha ri tshama ri hitekile hi ku tshembeka. Ntlawa wa nandza wu tshame wu rindzile kutani wu tivonakarise wu lunghekile. Yesu u wu veke “ehenhla ka hinkwaswo leswi nga swa yena” laha misaveni.—Matewu 24:42-47.
Xilaveko Xa Ku Tshama Hi Hitekile
13. Yesu u xi kandziyise njhani xilaveko xa ku hiteka?
13 A swi boha leswaku Vakreste va lembe-xidzana ro sungula va tshama va hitekile. A va fanele va teka goza ra xihatla ro baleka eYerusalema loko va vona muti wolowo wu “rhendzeriwa hi mavuthu lama goveke.” (Luka 21:20, 21) Sweswo swi endleke hi lembe ra 66 C.E. Xiya ndlela leyi Yesu a xi kandziyiseke ha yona xilaveko xa leswaku Vakreste va nkarhi wolowo va hiteka: “Munhu loyi a nge lwangwini ra yindlu a nga xiki a ta humesa nhundzu leyi nga endlwini yakwe; naswona munhu la nge nsin’wini a nga tlheleli endlwini a ya teka nguvu yakwe ya le handle.” (Matewu 24:17, 18) Leswi matimu ma kombisaka leswaku Yerusalema wu lovisiwe endzhaku ka malembe ya mune, ha yini Vakreste a va fanele va yingisa marito ya Yesu hi xihatla ngopfu hi 66 C.E.?
14, 15. Ha yini Vakreste va lembe-xidzana ro sungula a va boheka ku teka goza hi xihatla loko va vona Yerusalema wu rhendzeriwa hi mavuthu lama goveke?
14 Hambileswi ku nga ntiyiso leswaku vuthu ra Varhoma a ri wu lovisanga Yerusalema kukondza ku va hi 70 C.E., emalembeni wolawo ya mune a ku tele swiphiqo. Malembe wolawo a ma tele madzolonga ni ku halatiwa ka ngati. N’wamatimu un’wana u hlamusela leswaku xiyimo eYerusalema hi nkarhi wolowo a xi fana ni “nyimpi ya xin’wana-manana leyi chavisaka leyi teleke ku halatiwa ka ngati, leyi a yi fambisana ni swiendlo swa vuharhi.” Majaha a ma yisiwa evusocheni leswaku ma ta tiyisa khokholo. Siku ni siku a ma titoloveta ta vusocha. Lava a va nga swi seketeli swipimelo swo tika leswi a swi vekiwa a va tekiwa va ri vaxengi. Loko Vakreste a va lo hambeta va tshama emutini wolowo, a va ta va va tikume va ri exiyin’weni lexi nga ni khombo swinene.—Matewu 26:52; Marka 12:17.
15 Hi fanele hi xiya leswaku Yesu u vule leswaku “lava nga eYudiya,” ku nga ri lava nga eYerusalema ntsena, a va fanele va sungula ku baleka. Sweswo a swi ri swa nkoka hikuva endzhaku ka tin’hweti ti nga ri tingani masocha ya le Rhoma ma sukile eYerusalema, ma tlhele ma sungula nyimpi. Xo sungula, Galeliya wu hluriwe hi 67 C.E., naswona lembe leri landzeleke Yudiya wu hluriwe hi ku helela. Sweswo swi vange mbitsi lowukulu etikweni hinkwaro. Nakambe swi sungule ku tika swinene eka Muyuda un’wana ni un’wana leswaku a baleka eYerusalema. Tinyangwa ta muti a ti rindziwa naswona un’wana ni un’wana loyi a a ringeta ku baleka a ku ehleketiwa leswaku u fularhela Vayuda leswaku a ya seketela Varhoma.
16. Hi rihi langutelo leri Vakreste va lembe-xidzana ro sungula a va fanele va va na rona leswaku va pona nkarhi wolowo wa nhlomulo?
16 Leswi se hi kambisiseke mhaka leyi hinkwayo, hi nga swi twisisa leswaku ha yini Yesu a kandziyise leswaku va teka goza hi ku hatlisa swinene. Vakreste a va fanele va tiyimisela ku lahlekeriwa hi swin’wana, va nga pfumeleli ku kokiwa hi swilo leswi vonakaka. A va fanele ku tiyimisela ‘ku siya swilo swa vona hinkwaswo’ leswaku va yingisa xitsundzuxo xa Yesu. (Luka 14:33) Lava va yingiseke hi ku hatlisa kutani va balekela etlhelweni lerin’wana ra Yordani va ponile.
Ku Tshama Hi Hitekile
17. Ha yini hi fanele hi tshama hi hitekile?
17 Vuprofeta bya le Bibeleni byi swi kombisa kahle leswaku hi hanya exiphen’wini xo hetelela xa nkarhi wa makumu. Ku tlula rini na rini, hi fanele hi tshama hi hitekile. Loko ku ri ni ku rhula, socha a ri karhateki naswona a ri ehleketi hi khombo ra ku va enyimpini. Nilokoswiritano, loko ri vona ku nga ri na xilaveko xa ku tshama ri xalamukile ivi hi xitshuketa ri vitaniwa leswaku ri ya enyimpini, ri nga tikuma ri humeleriwe hi khombo hileswi a ri nga lunghekelanga nyimpi. Swi tano ni hi nyimpi ya moya leyi hi yi lwaka. Loko hakatsongo-tsongo hi tshika ku tshama hi hitekile, hi nga ha va hi nga swi lunghekelanga ku tilwela eka minhlaselo leyi hi khumbaka lerova siku ra Yehovha ri hetelela ri fika hi nga swi langutelanga. (Luka 21:36; 1 Vatesalonika 5:4) Loko ku ri ni lava ‘tlheleleke endzhaku va tshika ku landzela Yehovha,’ sweswi i nkarhi wa leswaku va tlhela va n’wi lava.—Sofaniya 1:3-6; 2 Vatesalonika 1:8, 9.
18, 19. I yini leswi nga ta hi pfuna ku hamba hi tsundzuka “vukona bya siku ra Yehovha”?
18 A swi hlamarisi leswi muapostola Petro a hi tsundzuxaka leswaku hi hamba hi tsundzuka “vukona bya siku ra Yehovha”! Hi nga swi endlisa ku yini sweswo? Ndlela yin’wana i ku endla “swiendlo swo kwetsima swa ku tikhoma ni swiendlo swa ku tinyiketela loku nga ni vukwembu.” (2 Petro 3:11, 12) Ku tshama hi khomekile emintirhweni yo tano swi ta hi pfuna leswaku hi ku langutela hi mahlo-ngati ku fika ka “siku ra Yehovha.” Rito ra Xigriki leri hundzuluxeriweke va ku “ku hamba mi tsundzuka,” hi ku kongoma ri vula ku “hatlisisa.” A hi nge swi koti ku hatlisisa nkarhi lowu seleke kukondza ku fika siku ra Yehovha. Kambe, tanihi leswi hi rindzeleke siku rero, nkarhi wu ta tikomba wu hatlisa swinene loko hi khomekile entirhweni wa Xikwembu.—1 Vakorinto 15:58.
19 Ku anakanyisisa hi Rito ra Xikwembu ni switsundzuxo leswi kumekaka eka rona swi ta hi pfuna leswaku hi swi kota ku endla leswi—ku “langutela ni ku hatlisisa ku ta” ka siku rero, ina, “ku tshama hi [ri] languterile.” (2 Petro 3:12, Bibele Ya Xitsonga; The New Testament, ya William Barclay) Eka switsundzuxo leswi ku ni vuprofeta byo tala lebyi profetaka hi ta ku fika ka siku ra Yehovha swin’we ni mikateko yo tala leyi nga ta nyikiwa lava ‘tshamaka va langutele Yehovha.’—Sofaniya 3:8.
20. Hi xihi xikhongotelo lexi hi faneleke ku xi tekela enhlokweni?
20 Entiyisweni sweswi i nkarhi wa leswaku hinkwerhu ka hina hi xi tekela enhlokweni xikhongotelo lexi humaka eka muprofeta Sofaniya lexi nge: “Ku hlundzuka lokukulu ka Yehovha ku nga si mi wela, siku ra ku hlundzuka ka Yehovha ri nga si mi fikela, lavani Yehovha, n’wina hinkwenu lavo rhula va misava, n’wina lava mi hanyeke hi ku landza xiboho xa Yena xa vuavanyisi. Lavani ku lulama, lavani ku rhula. Kumbexana mi nga tumbetiwa esikwini ra ku hlundzuka ka Yehovha.”—Sofaniya 2:2, 3.
21. Vanhu va Xikwembu va tiyimisele ku endla yini hi lembe ra 2007?
21 Hikwalaho, swa fanela hakunene leswi hi lembe ra 2007 ku hlawuriweke ndzimana ya lembe leyi nge: “Siku lerikulu ra Yehovha ri le kusuhi.” Vanhu va Xikwembu va khorwiseka leswaku “ri le kusuhi, naswona ra hatlisa swinene.” (Sofaniya 1:14) “A [ri] nge hlweli.” (Habakuku 2:3) Kutani leswi hi rindzeleke siku rero, onge nkarhi hinkwawo hi nga xalamukela minkarhi leyi hi hanyaka eka yona, hi swi xiya leswaku ku hetiseka ko hetelela ka vuprofeta lebyi ku le kusuhi swinene!
U Nga Hlamula Xana?
• “Siku lerikulu ra Yehovha” i yini?
• Ha yini vo tala va nga yi tekeli enhlokweni minkarhi leyi hi hanyaka eka yona?
• Ha yini Vakreste va lembe-xidzana ro sungula a va fanele va teka goza hi xihatla?
• Hi nga tshama njhani hi hitekile?
[Swivutiso Swa Dyondzo]
[Bokisi leri nga eka tluka 19]
Ndzimana ya lembe ya 2007 yi ta ku: “Siku lerikulu ra Yehovha ri le kusuhi.”—Sofaniya 1:14.
[Xifaniso lexi nga eka tluka 17]
Ku fana ni le masikwini ya Nowa, vahlekuri va ta sala va hlamarile loko Yehovha a teka goza
[Xifaniso lexi nga eka tluka 18]
Vakreste a va fanele va teka goza hi xihatla loko va vona Yerusalema wu “rhendzeriwa hi mavuthu lama goveke”