Wa Tsundzuka Xana?

Xana u swi tsakerile ku hlaya minkandziyiso ya sweswinyana ya Xihondzo xo Rindza? A hi vone loko u nga hlamula swivutiso leswi landzelaka:

• I yini leswi nga pfunaka Mukreste wa ntiyiso loko xirho xa ndyangu xi fularhela Yehovha?

Tiake wena swin’we ni swirho leswin’wana swa ndyangu leswi tshembekaka. Tshama u tinyiketele eka swilo swa moya. Tshama u lunghekele ku pfuna van’wana. U nga tshuki u heleriwa hi ntshembo wa leswaku xirho xa ndyangu wa wena xi nga ha vuya. U nga tivoni nandzu. Xixima lunghiselelo ro tshinya ra Xikwembu naswona u phofulela vanghana va wena mintlhaveko ya wena.—9/1, matluka 18-21.

• Hi tihi tindlela timbirhi leti Matsalwa ma pfunaka ha tona ku vona ‘masiku yo hetelela’?

Bibele yi profeta hi ta swiendlakalo leswi a swi ta humelela enkarhini wa “makumu ya mafambiselo ya swilo.” (Matewu 24:3, 7, 8; Luka 21:11) Yi tlhela yi vulavula hi ndlela leyi ku tikhoma ni swiendlo swa vanhu lava hanyaka “emasikwini yo hetelela” a swi ta cinca ha yona. (2 Timotiya 3:1-5) Xa nkoka swinene, mahungu lamanene ya mfumo a ma ta chumayeriwa enkarhini lowu.—9/15, matluka 4-6.

• Xana vandlha ri ni vutihlamuleri byihi loko Mukreste la chayelaka movha a endla mhangu yo karhi kutani ku fa vanhu van’wana?

Vakulu lava kambisisaka mhaka leyi va nga ha kuma leswaku muchayeri a nga na nandzu wa ngati hikuva xiyimo lexi vangeleke mhangu a a nga ta kota ku xi lawula. Kambe loko ku kumeka leswaku ku ni nandzu wa ngati ni leswaku munhu loyi a nga ni nandzu wa ngati wa tisola, u ta tshinyiwa hi ku ya hi Matsalwa naswona u ta vekeriwa swipimelo malunghana ni vutihlamuleri lebyi a nga na byona evandlheni.—9/15, tluka 30.

• Ha yini vutomi lebyi nga heriki byi nga titsheganga hi nhluvuko wa sayense?

Ku endliwa matshalatshala yo tala hi tlhelo ra sayense ya ku lehisa nkarhi wa vutomi bya munhu, yo tanihi ku ringeta ku endla leswaku tisele ta miri ti hambeta ti tipfuxeta hi mpimo lowu phindha-phindhiweke ku tlula lowu tolovelekeke kumbe hi ku endla vanhu hi ndlela leyi nga riki ya ntumbuluko leswaku vanhu lava vabyaka va nyikiwa swirho leswintshwa, leswi tirhaka kahle. Kambe Bibele yi kombisa leswaku ndlela yin’we ntsena leyi vanhu va nga kumaka vutomi lebyi nga heriki ha yona i nkutsulo wa Yesu.—10/1, matluka 3-5.

• Xana mukhuva wa Xiyuda wa ku hlamba a wu fanekisela nkhuvulo wa Vukreste?

Doo. Vayuda a va endla mikhuva ya ku tibasisa eka vona vini, leyi nkhuvulo wa Yohane a wu nga lavi leswaku va yi endla. Ku tibasisa loku a ku laviwa hi Nawu wa Muxe a ku fanele ku endliwa hi ku phindha-phindha, kambe nkhuvulo wa Vukreste wu endliwa kan’we ntsena.—10/15, matluka 12-13.

• Xana Xikolo xa Ndzetelo wa Vutirheli i yini?

I khoso leyi tekaka mavhiki ya nhungu ya vakulu va vandlha ni malandza ya vutirheli lava nga siki tekaka lava va lunghekeleke ku averiwa ku ya tirha laha ku nga ni xilaveko lexikulu. Va nga ha averiwa ku ya tirha emavandlheni lawa va humaka eka wona, etindhawini tin’wana etikweni rero kumbe ematikweni man’wana.—11/15, matluka 10-11.

• Xana i yini kumbe i mani mukaneti wa Kreste la boxiweke eka 1 Yohane 2:18; 4:3?

Hi ku angarhela, “mukaneti wa Kreste” ku vuriwa hinkwavo lava lwisanaka na Kreste kumbe lava hembaka va vula leswaku i vayimeri va yena. Marito ya Yesu ni ya Yohane ma kombisa leswaku mukaneti wa Kreste i ntlawa wa vanhu lava hangalasaka mavunwa ya vukhongeri naswona va lwisanaka ni Mfumo wa Xikwembu.—12/1, matluka 4-6.