Munhu Loyi Swilo Swi N’wi Fambelaka Kahle—Xana U N’wi Vona Njhani?

JESSE LIVERMORE, loyi van’wana va vuleke leswaku hi yena a koteke ku xavisa tixere to tala ku tlula vanhu hinkwavo eWall Street, a a tiveriwa ku endla swiboho swa vutlhari etimhakeni ta bindzu. Hikwalaho ka sweswo, u hlengelete xuma xo tala. A a ambala tisudu ta xiyimo xa le henhla leti nga rhungiwa hi voko, a a tshama endlwini leyi nga ni makamara ya 29, naswona a a famba hi Rolls-Royce ya ntima leyi a yi chayeriwa hi muchayeri wa yena.

David * na yena a a landzela emikondzweni ya yena. Tanihi xandla xa muungameri tlhelo mukongomisi-nkulu wa khampani leyikulu yo endla swifaniso, a a ri kusuhi ni ku va muungameri wa rhavi ra khampani leyi. Rifuwo ni ndhuma swi n’wi koke rinoko. Hambiswiritano, David u tiendlele xiboho lexi nga endla leswaku a tshika ku tirha ekhampanini leyi. David u te: “Ndza swi tiva leswaku a ndzi nge he wu kumi ntirho lowu holelaka ku fana ni lowu.” Xana u ehleketa leswaku David a a endla xihoxo?

Vo tala va pfumela leswaku ku humelela swi katsa ku vungelela rifuwo, ndhuma kumbe ku tekiwa u ri wa nkoka. Hambiswiritano, lava va nga ni rifuwo va nga ha titwa va kayivela swo karhi naswona va pfumala xikongomelo evuton’wini. Swi tikomba onge a swi ri tano eka Nkul. Livermore. Ku nga khathariseki rifuwo leri a a ri na rona, vutomi bya yena a byi taleriwe hi gome, makhombo ni maxangu. U ve ni ntshikilelo wa mianakanyo, a hambana ni vavasati lava a tekaneke na vona, naswona a a nga ri na vuxaka ni vana va yena va xinuna. Eku heteleleni, endzhaku ko lahlekeriwa hi rifuwo ra yena ro tala, siku rin’wana Nkul. Livermore u ye a ya tshama laha ku xaviseriwaka byala kona ehotela  ya manyunyu kutani a sungula ku titshandza hi leswi a lahlekeriweke hi swona. U xave byala, kutani a humesa buku ya yena yo tsalela eka yona leyi nga ni xifunengeto xa dzovo, kutani a tsalela nsati wa yena marito yo n’wi lela. Loko a heta ku nwa, u nghene exihambukelweni lexi mavoni ya xona ma nga voningiki ngopfu kutani a tidlaya.

Hambileswi swivangelo swa ku tidlaya swi nga swinyingi, kambe xiendlakalo lexi xi nyika vumbhoni bya ntiyiso wa marito ya Bibele lama nge: “Lava tiyimiseleke ku fuwa . . . va titlhave hinkwako-nkwako hi switlhavi swo tala.”—1 Timotiya 6:9, 10.

Xana swi nga endleka leswaku lava va tekaka munhu a ri loyi swilo swi n’wi fambelaka kahle loko a ri ni rifuwo, xikhundlha kumbe ndhuma va tirhisa mpimanyeto lowu hoxeke? Xana u titeka u ri loyi swilo swi ku fambelaka kahle? Hikwalaho ka yini? Xana u tirhisa mimpimanyeto yihi emhakeni leyi? Xana vonelo ra wena malunghana ni loko munhu swi n’wi fambela kahle ri lawuriwa hi yini? Xihloko lexi landzelaka xi ta kambisisa ndzayo leyi tshembekaka leyi pfuneke vanhu va timiliyoni leswaku swilo swi va fambela kahle. A hi voneni leswi na wena u nga swi endlaka leswaku swilo swi ku fambela kahle.

[Nhlamuselo ya le hansi]