Swivutiso Swa Vahlayi

Xana mfungho wu yimela yini eka Nhlavutelo 7:3?

Nhlavutelo 7:1-3 yi ri: “Ndzi vona tintsumi ta mune ti yime etinhleni ta mune ta misava, ti khome timheho ta mune ta misava swi tiya, leswaku ku nga vi na mheho leyi hungelaka emisaveni kumbe elwandle kumbe emurhini wun’wana ni wun’wana. Kutani ndzi vona ntsumi yin’wana yi tlhandluka yi ta hi le vuhuma-dyambu, yi ri ni mfungho wa Xikwembu lexi hanyaka; hiloko yi huwelela hi rito lerikulu eka tintsumi ta mune leti pfumeleriweke ku onha misava ni lwandle, yi ku: ‘Mi nga onhi misava kumbe lwandle kumbe mirhi, ku fikela loko hi ta va hi funghe mahlonga ya Xikwembu xa hina emimombyeni ya wona.’”

Loko “timheho ta mune” ti ntshunxiwa, vuyelo bya kona ku ta va ‘nhlomulo lowukulu,’ ku herisiwa ka vukhongeri bya mavunwa ni misava hinkwayo leyi hombolokeke. (Nhlavutelo 7:14) “Mahlonga ya Xikwembu xa hina” i vamakwavo lava totiweke va Kreste va laha misaveni. (1 Petro 2:9, 16) Hikwalaho, vuprofeta lebyi byi kombisa leswaku ku funghiwa ka vamakwavo va Kreste ku ta va ku herile loko ku sungula nhlomulo lowukulu. Hambiswiritano, eka tindzimana tin’wana ta Bibele ku kombisiwa leswaku ku na ku funghiwa ko sungula ka vatotiwa. Hikokwalaho, minkarhi yin’wana hi vulavula hi ku funghiwa ko sungula ni ko hetelela. Hi kwihi ku hambana exikarhi ka mimfungho leyi yimbirhi?

A hi xiyeni nhlamuselo ya rito leri nge ‘funghiwa.’ Eminkarhini ya khale, mfungho a wu ri xitirho lexi a xi tirhisiwa ku tiyisekisa tsalwa. Rito leri ri nga tlhela ri vula xitiyisekiso hi xoxe. Emasikwini wolawo, a swi tolovelekile ku endla xigandlu etsalweni kumbe swilo swin’wana ku kombisa leswaku ri tiyisekisiwile kumbe i ra wena.—1 Tihosi 21:8; Yobo 14:17.

Pawulo u fanise ku tota hi moya lowo kwetsima ni ku fungha loko a ku: “Xikwembu hi xona xi tiyisekisisaka  leswaku n’wina swin’we na hina hi va ka Kreste naswona hi xona xi hi toteke. Xi tlhele xi veka ni mfungho wa xona eka hina naswona xi hi nyike xitiyisekiso xa leswi nga ta ta, ku nga moya, etimbilwini ta hina.” (2 Vakorinto 1:21, 22) Hikokwalaho, Yehovha u tota Vakreste volavo hi moya wakwe lowo kwetsima ku kombisa leswaku i vanhu va yena.

Hambiswiritano, vatotiwa va funghiwa kambirhi. Mfungho wo sungula wu hambana ni mfungho wo hetelela (1) hi xikongomelo ni (2) hi nkarhi. Ku funghiwa ko sungula ku tirha ku hlawula xirho lexintshwa lexi engeteriwaka eka nhlayo ya Vakreste lava totiweke. Mfungho wo hetelela wu tirha ku tiyisekisa leswaku munhu loyi a hlawuriweke ni ku funghiwa u kombise vutshembeki bya yena hilaha ku heleleke. Mfungho wo hetelela wu vekeriwa makumu ‘emombyeni’ wa mutotiwa enkarhini wolowo, wu kombisa leswaku hakunene i ‘hlonga ra Xikwembu xa hina’ leri ringiweke ni leri tshembekeke. Ku fungha loku ku vulavuriwaka ha kona eka Nhlavutelo ndzima 7 i ku fungha loku ko hetelela.—Nhlavutelo 7:3.

Muapostola Pawulo u tsalele Vakreste lava totiweke malunghana ni nkarhi wa ku fungha ko sungula, a ku: “Na n’wina mi ve ni ntshembo eka yena endzhaku ka ku twa rito ra ntiyiso, mahungu lamanene malunghana ni ku ponisiwa ka n’wina. Hikwalaho ka yena nakambe, loko mi khorwile, mi funghiwile hi moya lowo kwetsima lowu tshembisiweke.” (Vaefesa 1:13, 14) Hakanyingi, xiviko xa Bibele xi kombisa leswaku Vakreste va lembe-xidzana ro sungula va funghiwile hakunene hi ku hatlisa endzhaku ka loko va twe mahungu lamanene kutani va pfumela eka Kreste. (Mintirho 8:15-17; 10:44) Ku funghiwa ko tano ku kombise ku amukeriwa ka vona hi Xikwembu. Hambiswiritano, a swi nga kombisi ku amukeriwa hi Xikwembu hilaha ku heleleke. Hikwalaho ka yini?

Pawulo u vule leswaku Vakreste lava totiweke va ‘funghiwe hikwalaho ka siku ra ku ntshunxiwa.’ (Vaefesa 4:30) Leswi swi kombisa leswaku a ku ta hundza malembe yo tala endzhaku ka ku funghiwa koloko ko sungula. Lava totiweke va fanele va tshama va tshembekile ku sukela loko va funghiwa hi moya lowo kwetsima ku fikela hi ‘siku leri va nga ta ntshunxiwa ha rona’ eka mimiri ya vona ya nyama—ku nga ku fikela loko va fa. (Varhoma 8:23; Vafilipiya 1:23; 2 Petro 1:10) Hikokwalaho, loko Pawulo a ri kusuhi ni ku fa u te: “Ndzi tsutsume pfhumba ndzi kondza ndzi heta, ndzi hlayise ripfumelo. Ku sukela hi nkarhi lowu ku ya emahlweni ndzi vekeriwe harhi ya ku lulama.” (2 Timotiya 4:6-8) Tlhandlakambirhi, Yesu u byele vandlha ra Vakreste lava totiweke a ku: “Tikombiseni mi tshembekile ku ya fikela eku feni, kutani ndzi ta mi nyika harhi ya vutomi.”—Nhlavutelo 2:10; 17:14.

Rito “harhi” ri nyika vumbhoni lebyi engetelekeke bya leswaku ku hundza nkarhi wo karhi exikarhi ka mfungho wo sungula ni lowo hetelela. Hikwalaho ka yini? Eminkarhini ya khale, a swi tolovelekile ku nyika xitsutsumi lexi nga hlula harhi. Leswaku xi kuma harhi, a xi nga ngheneli mphikizano lowu ntsena swi helela kwalaho. A xi fanele xi tsutsuma ku ya fika emakumu. Hilaha ku fanaka, loko ntsena Vakreste lava totiweke va tiyisela ku ya fika emakumu ka vutomi bya vona—ku sukela eka mfungho wo sungula ku ya fika eka lowo hetelela—hi kona va nga ta nyikiwa harhi ya ku hanya hi masiku etilweni.—Matewu 10:22; Yakobo 1:12.

Xana masalela ya Vakreste lava totiweke lama nga kuma mfungho wo sungula ma ta wu kuma rini mfungho wa wona wo hetelela? Masalela lama ha riki laha misaveni ma ta funghiwa “emimombyeni ya wona” emahlweni ko sungula ka nhlomulo lowukulu. Loko timheho ta mune ta nhlomulo ti ntshunxiwa, Vaisrayele hinkwavo va moya va ta va va kume mfungho wo hetelela, hambileswi van’wana va vona va nga ta va va ha hanya hi nyama, naswona va fanele va hetisa pfhumba ra vona ra laha misaveni.