Wanuna Loyi A A Rhandza Vutomi Ni Vanhu

DANIEL SYDLIK, loyi a ku ri khale a ri xirho xa Huvo leyi Fumaka ya Timbhoni ta Yehovha, u hete pfhumba rakwe ra laha misaveni hi Ravumbirhi, April 18, 2006. A a ri na malembe ya 87 hi vukhale naswona u ve xirho xa ndyangu wa Bethele ya le Brooklyn, eNew York, ku ringana malembe ya kwalomu ka 60.

Makwerhu Dan, hilaha a a vitaniwa hakona hi lava a va n’wi tolovele swinene, u ye eBethele hi 1946. Emahlweni ka sweswo, u tirhe tanihi phayona ro hlawuleka eCalifornia naswona u pfaleriwe ekhotsweni hi nkarhi wa Nyimpi ya Vumbirhi ya Misava hikwalaho ka vukala-tlhelo bya yena bya Vukreste. Mintokoto ya yena ya le nkarhini wolowo yi hlamuseriwe kahle eka mhaka ya vutomi byakwe, leyi nga eka Xihondzo xo Rindza (xa Xinghezi) xa June 1, 1985, ehansi ka nhloko-mhaka leyi nge “Oho Xikwembu, Xinakulobye Xa Wena I Xa Risima Swinene!”

Makwerhu Sydlik a a tiviwa a ri munhu la titsongahateke, ni la nghenekaka. Loko a fambisa ndzimana ya siku nimixo endyangwini wa Bethele, langutelo ra yena lerinene ni ku rhandza ka yena vutomi hakanyingi a swi kombisiwa hi marito yakwe yo sungula loko a ku: “Swa tsakisa ku hanya leswaku u ta tirhela Xikwembu xa ntiyiso ni lexi hanyaka.” Loko a nyikela tinkulumo, a a khutaza van’wana leswaku va va ni langutelo leri fanaka, a tirhisa swihloko swo fana ni leswi nge “Va Tsaka Lava Xikwembu Xa Vona Ku Nga Yehovha,” “Ku Kombisa Ntsako Wa Yehovha,” “Endlani Leswaku Ndzilo Wa Moya Wa Xikwembu Wu Tshama Wu Ri Karhi Wu Pfurha,” ni lexi nge “Leswi Nga Swinene Swa Ha Ta.”

Hi 1970, Makwerhu Sydlik u tekane na Marina Hodson, la humaka eNghilandhi, loyi a n’wi hlamuseleke tanihi “nyiko leyi humaka eka Xikwembu.” Va tirhele Yehovha swin’we ku ringana malembe yo tlula 35.

Emalembeni ya yena lawa a nga ma heta eBethele, Makwerhu Sydlik u tirhe eka tindzawulo to hambana-hambana, ku katsa ni le vugandliselweni ni le Ndzawulweni ya Vutsari. U tlhele a tirha eka xitichi xa xiya-ni-moya xa WBBR. Kutani, hi November 1974, u ve xirho xa Huvo leyi Fumaka, naswona eku heteleleni u tirhe eka komiti ya Vatirhi ni ya Vutsari.

Eka malembe yo tlula 30 lawa Makwerhu Sydlik a ma heteke a tirha eka Komiti ya Vatirhi u swi kombisile leswaku a a rhandza vanhu. A a khutaza vo tala hi rito ra yena ra matimba, minkarhi hinkwayo a nyikela nyingiso eka lunghelo ra risima leri hi nga na rona ro tirhela Yehovha. Minkarhi hinkwayo a a kandziyisa leswaku ntsako wa ntiyiso hi nga wu kuma hikwalaho ka vuxaka lebyi hi nga na byona na Yehovha ni langutelo leri hi nga na rona hi vutomi, ku nga ri hikwalaho ka swilo leswi vonakaka.

Hambileswi Makwerhu Sydlik a kumbukiwaka swinene hi ndyangu wa Bethele, xikombiso xa yena tanihi munhu loyi a a rhandza vutomi ni vanhu xi ta tshama xi ri xikhutazo eka vo tala. Ha tiyiseka leswaku u hlanganisiwile eka lava ku vulavuriwaka hi vona eka Nhlavutelo 14:13 leyi nge: “Va tsaka vafi lava felaka evun’weni ni Hosi ku sukela enkarhini lowu ku ya emahlweni. Ina, ku vula moya, a va wise emintirhweni ya vona, hikuva swilo leswi va swi endleke swi famba swin’we na vona.”