Wansati La Nga Ni Malembe Lama Tlulaka 100 la Nga Ni Xikongomelo eVuton’wini

ELIN i wun’wana wa vanhu va 60 va le Sweden lava sweswinyana va hlayiweke tanihi lava nga ni malembe ya 105 hi vukhale kumbe ku tlula. Yena u na 105 ya malembe. Hambileswi a tshamaka ekaya ra vadyuhari, wa ha swi kota ku ya emahlweni a tirha tanihi Mbhoni ya Yehovha leyi hisekaka, ku nga ndlela leyi a yi hlawuleke malembe yo tlula 60 lama hundzeke.

Hi ku chumayela van’wana, Elin u tekelela xikombiso lexi vekiweke hi muapostola Pawulo loko a khotsiwile endlwini. Pawulo a a chumayela vaendzi va yena hinkwavo. (Mintirho 28:16, 30, 31) Hi ndlela leyi fanaka, Elin u tirhisa tindlela hinkwato leti n’wi pfulekelaka leswaku a vulavula ni lava basisaka ekaya rolero ra vadyuhari, madokodela ya meno, madokodela, valunghisi va misisi, vaongori ni van’wana lava a hlanganaka na vona kwalaho, a va byela mahungu lamanene lama kumekaka eBibeleni. Nkarhi na nkarhi, vapfumeri-kulobye va le vandlheni leri Elin a hlanganyelaka eka rona va rhamba ni vanhu lava va dyondzaka Bibele na vona leswaku va n’wi endzela leswaku va ta vuyeriwa eka vutivi bya yena ni ntokoto wa yena.

Swirho swa vandlha leri Elin a hlanganyelaka eka rona swi kokiwa hi vumunhu bya yena ni moya wo lava ku tiva swilo. Mbhoni-kulobye yi ri: “Wa yi tiva mintirho leyi endlekaka evandlheni. U tsundzuka mavito ya vana hinkwavo ni ya lava va ha ku rhurhelaka evandlheni.” Nakambe Elin u dume hi ku va ni malwandla, ku rhandza ku hleka ni ku va ni langutelo lerinene hi vutomi.

I yini leswi pfunaka Elin leswaku a tshama a tsakile naswona a dzike eka xikongomelo xakwe xa vutomi? Siku rin’wana ni rin’wana u hlaya Tsalwa ra siku eka xibukwana lexi nge, Ku Kambisisa Matsalwa Siku Ni Siku, lexi kandziyisiweke hi Timbhoni ta Yehovha. Hi ku pfuniwa hi nghilazi leyi kurisaka marito, u hlaya ni xiphemu xo karhi eBibeleni siku ni siku. Elin u lunghiselela minhlangano ya vhiki ni vhiki ya Timbhoni ta Yehovha, naswona hambileswi a nga swi kotiki ku ya eminhlanganweni yoleyo, u yi yingisela eka tikhasete leti rhekhodiweke. Ku hlaya Bibele nkarhi na nkarhi ni minkandziyiso leyi sekeriweke eBibeleni ni ku nga tshiki ku ya eminhlanganweni ya Vukreste swi nga hi pfuna leswaku hi hanya vutomi lebyi tsakisaka ni lebyi nga ni xikongomelo ku nga khathariseki leswaku hi ni malembe mangani.—Pisalema 1:2; Vaheveru 10:24, 25.