Ku Vulavula Ntiyiso—Xana I Swa Van’wana Ntsena?

NHWANYANA un’wana wa malembe ya 16 hi vukhale u te: “Ndzi venga mavunwa, naswona a ndzi lavi ku hemberiwa!” Vunyingi bya hina hi titwa hi ndlela yoleyo. Hi tsakela leswaku rungula leri hi byeriwaka rona hi nomu kumbe hi phepha, ri va ri ri ntiyiso. Kambe, xana leswi hina hi swi byelaka van’wana swi va swi ri ntiyiso?

Eka ndzavisiso lowu endliweke eJarimani, vo tala lava ku vulavuriweke na vona va vule leswaku “ku hemba etimhakeni letitsongo leswaku u tisirhelela kumbe u sirhelela van’wana a swi bihanga, naswona swi fanerile leswaku vanhu va hanyisana kahle.” Naswona mutsari un’wana wa maphepha-hungu u te: “Ku tshamela ku vulavula ntiyiso minkarhi hinkwayo i swinene kambe swa phirha.”

Xana hi rhandza leswaku van’wana va vulavula ntiyiso, kasi hina hi vona onge minkarhi yin’wana hi ni xivangelo lexi twalaka xa ku vulavula mavunwa? Xana a swi vuli nchumu eka hina ku vulavula ntiyiso kumbe mavunwa? Hi byihi vuyelo bya ku vulavula mavunwa?

Vuyelo Byo Biha Bya Ku Vulavula Mavunwa

Xiya vuyelo byo biha lebyi mavunwa ma nga byi vangaka. Mavunwa ma tswala moya wa ku nga tshembani exikarhi ka vatekani ni le xikarhi ka swirho swa ndyangu. Rihlevo ra vuntswaka ri nga onha munhu vito. Ku kanganyisa ka vatirhi swi endla leswaku mabindzu ma lahlekeriwa hi timali to tala, leswi vangaka leswaku vini va mabindzu va boheka ku durhisa swilo. Swiviko swa mavunwa swa swibalo swi endla leswaku tihulumendhe ti nga kumi mali leyi lavekaka ya ku pfuna vaaka-tiko. Valavisisi va lahlekeriwa hi mintirho leyinene hikwalaho ko nyikela swiviko swa mavunwa naswona sweswo swi endla leswaku tikhampani leti va ti tirhelaka ti sala ni mavito yo biha. Switokofela swa ku kuma mali yo tala hi xihatla swi tekela vavekisi lava nga xalamukangiki mali leyi va nga yi dzukela nyuku kumbe swi va ni vuyelo byin’wana byo biha ni ku tlurisa. A swi hlamarisi leswi Bibele yi hi byelaka leswaku xin’wana xa swilo leswi nyenyetsaka emahlweni ka Yehovha Xikwembu i “ririmi ra vunwa” ni “mbhoni ya vunwa leyi tisungulelaka mavunwa”!—Swivuriso 6:16-19.

Mavunwa lama hangalasiweke ma nga va ni vuyelo byo biha eka vanhu ni tiko hinkwaro. A nga kona loyi a nga kanetaka mhaka yoleyo. Kutani, ha yini munhu a vula mavunwa hi vomu? Naswona, xana nchumu wihi ni wihi lowu nga riki wona i mavunwa? Hi ta kumisisa tinhlamulo ta swivutiso sweswo ni swin’wana eka xihloko lexi landzelaka.

[Xifaniso lexi nga eka tluka 3]

Mavunwa ma tswala moya wa ku nga tshembani exikarhi ka vatekani