Yona Ya Olova Ku Yi Hlaya, Kambe Xana Yi Pakanisile?

HI September 2005, Kereke ya Nghilandhi yi ku amukele hi ku hiseka ku humesiwa ka The 100-Minute Bible. Vuhundzuluxeri lebyi lebyintshwa byi hleriwe hi ndlela ya leswaku u kota ku byi hlaya hi timinete ta 100, hikuva byi katsakanya Matsalwa ya Xiheveru ma va swiyenge swa 17, ha xin’we xi tata tluka rin’we ntsena, kasi Matsalwa ya Xigriki ma katsakanyiwe ma va swiyenge swa 33, ha xin’we xi tata tluka rin’we, xisweswo byi siya swiyenge leswin’wana swa Bibele “leswi nga tsakisiki,” hilaha mukambisisi un’wana a vulaka hakona. Ina, ya olova ku yi hlaya, kambe xana ya pakanisa?

Handle ka ku susiwa ka vito ra Xikwembu, ku nga Yehovha, swichudeni swa Bibele leswi nga ni vukheta swi nga kuma swihoxo swin’wana swo tala. (Pisalema 83:18) Hi xikombiso, xiyenge 1 xi kombisa leswaku Xikwembu xi “tumbuluxe tilo ni misava hi nkarhi lowu ringanaka masiku ya tsevu ya xiviri.” Hambiswiritano, leswi Genesa 1:1 yi vulaka swona hi leswi: “Eku sunguleni Xikwembu xi tumbuluxe matilo ni misava.” Endzhaku ka sweswo, xiviko lexi xo sungula xi hlamusela ku tumbuluxiwa ka swilo swin’wana swa laha misaveni, leswi tekeke “masiku” ya tsevu, kumbe mpimo wo karhi wa nkarhi. Kutani, Genesa 2:4 yi katsakanya nkarhi hinkwawo wa ku tumbuluxiwa ka swilo, yi ku i “[siku] leri Yehovha Xikwembu a endleke misava ni tilo ha rona.”

Hi ku ya hi The 100-Minute Bible, Yobo, wanuna wo tshembeka, u hlaseriwe “hi Sathana, un’wana wa malandza ya [Xikwembu], . . . loyi ntirho wakwe a ku ri ku hehla vanhu.” Xana wa ku vona ku hambana loku nga kona laha? Rito “Sathana” ri vula “Mukaneti.” Ematshan’weni yo va nandza wa Xikwembu, Sathana kahle-kahle i nala lonkulu wa Xikwembu naswona u lo tihlawulela ku va muhehli wa vanhu.—Nhlavutelo 12:7-10.

Ku vuriwa yini hi xiyenge xa Matsalwa ya Vukreste ya Xigriki eka The 100-Minute Bible? Eka xifaniso xa tinyimpfu ni timbuti, vuhundzuluxeri lebyi lebyintshwa byi vula leswaku Yesu u amukela lava pfuneke “mani na mani, hambiloko a nga nyawuli,” kasi Yesu entiyisweni u vule leswaku u katekisa lava endlaka leswinene eka valandzeri va mikondzo ya yena—“vamakwavo” va yena. (Matewu 25:40) Nkomiso wa Nhlavutelo wu byela vahlayi va yona leswaku “Rhoma, ku nga Babilona lonkulu, wu ta loviseriwa makumu.” Hambiswiritano, swichudeni swa Bibele swa swi tiva leswaku ematsalweni yo sungula a ku kona laha ku vuriwaka leswaku “Babilona Lonkulu” u vitaniwa hi ndlela yoleyo.—Nhlavutelo 17:15–18:24.

Eka lava va lavaka ku tiva Muvumbi wa hina ni ku twisisa xikongomelo xa yena, ku hava Bibele yin’wana leyi nga sivaka Bibele leyi heleleke. Ina, ku hlaya Bibele swi ta teka timinete to tlula 100, kambe ku endla tano swi tisa mikateko yo tala swinene. (Yohane 17:3) Onge u nga sungula ku yi hlaya, kutani u tikumela mikateko.—2 Timotiya 3:16, 17.