Xikombiso Xa Ku Tshembeka

NELMA la tirhaka ku lunghisa misisi edorobeni ra Cruzeiro do Sul, eBrazil, wa ha ku langutana ni ndzingo wa vutshembeki bya yena bya Vukreste. Loko ku ve ni ndhambi endhawini ya ka vona, Nelma u nyikiwe swiambalo hi un’wana wa lava a va lunghisaka misisi. Loko a ri karhi a hlela swiambalo leswi, u kume mali leyi ringanaka R7 400 eswikhwameni swa maburuku man’wana.

Mali leyi Nelma a yi kumeke a yi ringana ni muholo wa yena wa tin’hweti ta kwalomu ka nkombo naswona a a yi lava swinene mali. Yindlu ya yena a yi onhiwe hi ndhambi naswona tata wa yena ni vamakwavo va yena a va lahlekeriwe hi swilo swa vona swo tala. A a ta swi kota ku tirhisa mali yoleyo ku lunghisa swilo hinkwaswo leswi onhakeke endlwini ya yena swin’we ni ku tlhela a pfuna maxaka ya yena. Hambiswiritano, ripfalo ra Nelma leri leteriweke hi Bibele a ri n’wi pfumelelanga leswaku a teka mali yoleyo.—Vaheveru 13:18.

Hi siku leri landzeleke nimpundzu, u ye entirhweni wu nga si ba na nkarhi lowu tolovelekeke wa ntirho kutani a ya vulavurisana ni wansati loyi la nga ni mabindzu loyi a n’wi nyikeke swiambalo. Nelma u n’wi nkhensile hikwalaho ka swiambalo leswi a n’wi nyikeke swona kambe u vule leswaku a a nge teki leswi a swi kumeke endzeni ka swiambalo. Wansati loyi u tsake ngopfu hikwalaho ka leswi a kumeke mali leyi. A a yi vekele ku hakela vatirhi va yena ha yona. Wansati loyi loyi a nga ni mabindzu u te: “Vanhu lava tshembekeke a va ha talanga.”

I ntiyiso leswaku van’wana va nga ha vona onge ku tshembeka a hi swa nkoka ngopfu. Kambe, ku tshembeka i mfanelo leyi tekiwaka yi ri ya nkoka swinene hi lava tikarhatelaka ku tsakisa Xikwembu xa ntiyiso, ku nga Yehovha. (Vaefesa 4:25, 28) Nelma u te: “A byi nga ta phaha loko a ndzi lo yi teka.”