Maswivo! Ku Vonakala Ka Hlamarisa!

LOKO u tshame u mbamba emunyameni wa swi tiva leswaku swi heta matimba. Mawaku mpfuno lowu tisiwaka hi ku vonakala! Kumbexana u tshame u va exiyin’weni lexi ku endleke u titwa onge u le munyameni lowukulu. Kumbexana sweswo swi humelele loko u tsandzeka ku kuma ntlhantlho wa xiphiqo xo karhi. Kutani hakatsongo-tsongo u vone ku vonakala—hiloko ku va ni ntlhantlho. Ku huma emunyameni wo tano u ya eku vonakaleni i nchumu lowu tsakisaka.

Hi lembe-xidzana ro sungula, vanhu vo tala a va ri emunyameni wa moya. Loko muapostola Petro a vulavula ni lava tshikeke tidyondzo ta vona ta khale kutani va amukela Vukreste, u tsarile: “[Xikwembu] xi mi [vitane] mi huma emunyameni mi nghena eku vonakaleni [ka xona] loku hlamarisaka.” (1 Petro 2:9) Eka vona leswi a swi fana ni ku huma emunyameni lowukulu va ya eku vonakaleni loku vangamaka. Swi nga tlhela swi fanisiwa ni ku va u ri wexe, u nga ri na ntshembo ivi u va xirho xa ndyangu lowu nga ni vumundzuku lebyi sirhelelekeke.—Vaefesa 2:1, 12.

“U Lahle Rirhandzu Leri A Wu Ri Na Rona Eku Sunguleni”

Vakreste vo sungula va kume “ntiyiso”—ripfumelo ra Vukreste bya ntiyiso. (Yohane 18:37) Va vone ku vonakala loku hlamarisaka ka ntiyiso kutani va huma emunyameni wa moya va ya eku vonakaleni loku voningaka. Hambiswiritano, hi ku famba ka nkarhi ku hiseka loku Vakreste van’wana a va ri na kona eku sunguleni ku herile. Hi xikombiso, eku heleni ka lembe-xidzana ro sungula, ku ve ni xiphiqo lexikulu evandlheni ra le Efesa. Yesu Kreste la pfuxiweke u vule xiphiqo xa kona, a ku: “Ndzi ni mhaka na wena, ya leswaku u lahle rirhandzu leri a wu ri na rona eku sunguleni. Hikokwalaho, tsundzuka lomu u weke kona, kutani u hundzuka, u endla swiendlo swo sungula.” (Nhlavutelo 2:4, 5) Vakreste va le Efesa a va fanele va pfuxeta ndlela leyi va rhandzaka Xikwembu ni ntiyiso ha yona.

Ku vuriwa yini hi hina? Na hina hi tsakile loko hi vone ku vonakala ka ku tiva ntiyiso lowu hlamarisaka wa Rito ra Xikwembu. Hi sungule ku rhandza ntiyiso. Kambe swikarhato leswi tolovelekeke eka vanhu swi nga tsanisa ndlela leyi hi rhandzaka ntiyiso ha yona. Ku engetela eka swikarhato sweswo, ku nga ha va na swiphiqo leswi nga tolovelekangiki swa ‘masiku yo hetelela.’ Hi hanya emisaveni laha ku nga ni “minkarhi ya mangava leyi swi nonon’hwaka ku langutana na yona”—misava leyi nga ni vanhu lava “tirhandzaka, varhandzi va mali, lava titivaka, lava titlakusaka, vasandzi, lava nga yingisiki vatswari, lava nga nkhensiki, lava nga tshembekiki.” (2 Timotiya 3:1, 2) Nkucetelo wa vona wu nga tsanisa ku hiseka ka hina kutani wu vanga leswaku hi nga ha n’wi rhandzi ngopfu Yehovha.

Loko hi heleriwe hi rirhandzu leri a hi ri na rona eku sunguleni, hi fanele hi “tsundzuka lomu [hi] weke kona, kutani [hi] hundzuka.” Hi fanele hi tlhelela exiyin’weni xa moya lexi a hi ri eka xona eku sunguleni. Ku tlula kwalaho, hi fanele hi va ni vuxiyaxiya leswaku hi nga pfumeleli ndlela leyi hi rhandzaka ntiyiso ha yona yi tsana. Hakunene i swa nkoka leswaku hinkwerhu hi tshama hi ri ni ntshembo ni langutelo lerinene naswona hi hambeta hi rhandza Xikwembu ni ntiyiso wa xona!

‘Ntiyiso Lowu Hi Ntshunxaka’

Ku vonakala ka ntiyiso wa Matsalwa ka hlamarisa hikuva Bibele yi hlamula swivutiso swa nkoka leswi pfilunganyeke vanhu ku ringana magidi ya  malembe. Swin’wana swa swivutiso swoleswo hi leswi: Ha yini hi ri laha misaveni? Xikongomelo xa vutomi i yini? Ha yini ku ri ni vubihi? Xana ku ni vutomi endzhaku ka rifu? Yehovha u hi voningele hi ntiyiso wo hlamarisa eka tidyondzo ta le Bibeleni. Xana a hi fanelanga hi tsaka ngopfu? Hi nga tshuki hi swi tekela ehansi swilo leswi hi swi dyondzeke!

Yesu u byele vadyondzisiwa vakwe a ku: “Mi ta tiva ntiyiso, kutani ntiyiso wu ta mi ntshunxa.” (Yohane 8:32) Nkutsulo wa xitlhavelo wa Yesu wu endle leswaku ku va ni ku ntshunxeka eka xidyoho ni rifu. Kambe ntiyiso lowu wa nkoka wu tlhele wu hi ntshunxa eka ku pfumala vutivi ni ku kanakana ka misava leyi funengetiweke hi munyama. Ku anakanyisisa hi ntsako hi swilo leswi hi swi dyondzeke swi ta hi pfuna ku tiyisa ndlela leyi hi rhandzaka Yehovha ni Rito rakwe ha yona.

Muapostola Pawulo u tsalele Vakreste va le Tesalonika a ku: “Loko mi amukela rito ra Xikwembu, leri mi ri tweke eka hina, mi ri amukerile, ku nga ri kukotisa rito ra vanhu, kambe, mi ri amukele hilaha ri nga hakona hakunene rito ra Xikwembu, leri ri tirhaka ntsena ni le ka n’wina vapfumeri.” (1 Vatesalonika 2:13) Vatesalonika va twile kutani va ‘amukela rito ra Xikwembu hi ntsako.’ A va nga ha ri ‘emunyameni.’ Ematshan’weni ya sweswo, se a va hundzuke “vana va ku vonakala.” (1 Vatesalonika 1:4-7; 5:4, 5) Vakreste volavo va dyondze leswaku Yehovha i Muvumbi ni leswaku hi lowa matimba hinkwawo, la tlhariheke, la nga ni rirhandzu ni la nga ni tintswalo. Ku fana ni valandzeri van’wana va Kreste, va tlhele va dyondza leswaku Yehovha u endle lunghiselelo ro sula swidyoho swa vona hi ku tirhisa nkutsulo wa xitlhavelo wa N’wana wakwe, Yesu Kreste.—Mintirho 3:19-21.

Hambileswi Vatesalonika a va nga ri na vutivi lebyi heleleke bya ntiyiso wa le Bibeleni, a va ku tiva laha va nga byi kumaka kona vutivi. Matsalwa lama huhuteriweke ma nga endla munhu wa Xikwembu “a faneleka hi ku helela, a hlomisiwa hi ku helela eka ntirho wun’wana ni wun’wana lowunene.” (2 Timotiya 3:16, 17) Vakreste va le Tesalonika a va ta ya emahlweni va dyondza, va vona hi ku phindha-phindha leswaku ku vonakala loku humaka eka Xikwembu ka hlamarisa hakunene. A va ri ni xivangelo xo tsaka minkarhi hinkwayo. (1 Vatesalonika 5:16) Na hina hi na xona.

Ku Vonakala eNdleleni Ya Hina

Loko mupisalema a vula xivangelo xa leswaku ha yini ku vonakala ku hlamarisa, u yimbelerile a ku: “Rito ra wena i rivoni enengeni wa mina, ni ku vonakala endleleni ya mina.” (Pisalema 119:105) Nkongomiso lowu hi wu kumaka eRitweni ra Xikwembu wu nga hi pfuna ku hlela vutomi bya hina ni ku hanya vutomi lebyi enerisaka. A hi fanelanga hi fana ni xikepe lexi nga riki na nsomo. Ku tiva ntiyiso ni ku wu tirhisa swa hi sirhelela leswaku hi nga “ndlengandlengisiw[i] hi magandlati ni ku yingayingisiwa hi mheho yin’wana ni yin’wana ya ku dyondzisa.”—Vaefesa 4:14.

Bibele yi ri: “Mi nga tshembi vanhu va xiyimo xa le henhla, hambi ku ri n’wana wa munhu wa nyama, loyi a tsandzekaka ku ponisa.” Nakambe yi ri: “Wa tsaka loyi Xikwembu xa Yakobe xi nga mupfuni wa yena, loyi ntshembo wakwe wu nga eka Yehovha Xikwembu xakwe.” (Pisalema 146:3, 5) Ku tlula kwalaho, ku veka ntshembo eka Yehovha swi hi pfuna ku hlula ku chava ni ku vilela. Muapostola Pawulo u tsarile: “Mi nga vileli ha nchumu, kambe eka hinkwaswo tivisani Xikwembu swikombelo swa n’wina hi xikhongelo ni xikombelo swin’we ni ku nkhensa swikombelo swa n’wina; kutani ku rhula ka Xikwembu loku tlulaka miehleketo hinkwayo ku ta rindza timbilu ta n’wina ni matimba ya n’wina ya mianakanyo ha Kreste Yesu.” (Vafilipiya 4:6, 7) Ku kongomisiwa hi ku vonakala ka Rito ra Xikwembu swa hi vuyerisa hakunene.

 Voningani Kukota Mavoningo eMisaveni

Kambe xivangelo xin’wana lexi endlaka ku vonakala ka Rito ra Xikwembu ku hlamarisa hileswi ku nyikaka vanhu lunghelo ro amukela xiavelo xa nkoka. Yesu u lerise valandzeri vakwe a ku: “Fambani mi ya endla vanhu va matiko hinkwawo va va vadyondzisiwa, mi va khuvula hi vito ra Tatana ni ra N’wana ni ra moya lowo kwetsima, mi va dyondzisa ku hlayisa swilo hinkwaswo leswi ndzi mi leriseke swona. Kutani, maswivo, ndzi na n’wina masiku hinkwawo ku fikela emakumu ka mafambiselo ya swilo.” Loko a nga si vula xileriso xexo, u te: “Ndzi nyikiwe vulawuri hinkwabyo etilweni ni le misaveni.”—Matewu 28:18-20.

Xiya leswaku i vamani lava pfunaka Vakreste va ntiyiso entirhweni wa ku chumayela mahungu lamanene ni ku dyondzisa vanhu va matiko hinkwawo ntiyiso wa le Bibeleni. Yesu u tshembise valandzeri vakwe leswaku a a ta va na vona. Hakunene u karhi wa va pfuna ni ku va seketela entirhweni wa vona loko va ri karhi va ‘endla leswaku ku voninga ka vona ku vonakala’ hi ndlela yoleyo ni hi ‘mintirho yin’wana leyinene.’ (Matewu 5:14-16) Tintsumi na tona ta katseka entirhweni lowu wa ku chumayela evhangheli. (Nhlavutelo 14:6) Ku vuriwa yini hi Yehovha Xikwembu? Muapostola Pawulo u tsarile a ku: “Mina ndzi byarile, Apolosi a cheleta, kambe Xikwembu hi xona lexi hambeteke xi swi kurisa.” Hakunene i lunghelo ku va exikarhi ka “vatirhi-kulobye ni Xikwembu”!—1 Vakorinto 3:6, 9.

Nakambe ehleketa hi ndlela leyi matshalatshala ya hina ma katekisiwaka ha yona entirhweni lowu lowu hi averiweke wona hi Xikwembu. Lunghelo leri hi nyikiweke hi Xikwembu ra ku “[voninga] kukota mavoningo emisaveni” a ri nge pimanisiwi na nchumu. Hi nga swi kota ku nyikela mpfuno wa xiviri eka vanhu va timbilu letinene hi ku kombisa ku vonakala loku humaka eRitweni ra Xikwembu hi mavulavulelo ni hi swiendlo swa hina. (Vafilipiya 2:15) Nakambe hi nga tsaka loko hi ri karhi hi chumayela ni ku dyondzisa hi ku hiseka, “hikuva Xikwembu a xi pfumali ku lulama lerova xi nga rivala ntirho wa [h]ina ni rirhandzu leri [h]i ri kombiseke hikwalaho ka vito ra xona.”—Vaheveru 6:10.

‘Xava Murhi Wo Tota Mahlo Ya Wena’

Eka rungula leri yaka evandlheni ra le Lawodikiya ra lembe-xidzana ro sungula, Yesu u te: “Xava . . . eka mina . . . murhi wo tota mahlo ya wena leswaku u ta vona. Hinkwavo lava ndzi nga ni xinakulobye eka vona ndza va tshinya ni ku va laya.” (Nhlavutelo 3:18, 19) Murhi wa xiviri wa vubofu bya moya i “murhi wa mahlo”—ku nga tidyondzo ni ku tshinya ka Yesu. Loko hi lava ku tshama hi ri ni langutelo lerinene ra moya, hi fanele hi amukela ndzayo ni ku tlhela hi tiveka ehansi ka nkongomiso lowu kumekaka eBibeleni. Nakambe hi fanele hi va ni langutelo ra mianakanyo ro fana ni ra Kreste hi tlhela hi tekelela xikombiso xakwe. (Vafilipiya 2:5; 1 Petro 2:21) Murhi wa mahlo a wu kumiwi mahala. Yesu u te: ‘Wu xave eka mina.’ Nxavo wa kona wu katsa nkarhi ni ku tikarhata ka hina.

Loko hi suka endhawini leyi nga ni munyama kutani hi nghena ekamareni leri nga ni ku vonakala, swi nga ha teka nkarhi leswaku mahlo ya hina ma tolovela ku vonakala. Hi ndlela leyi fanaka, swi teka nkarhi ku dyondza Rito ra Xikwembu ni ku vona ku vonakala ka ntiyiso. Swi teka nkarhi ku anakanyisisa hi leswi hi swi dyondzaka ni ku anakanyisisa hi ndlela leyi ntiyiso wu nga wa nkoka ha yona. Kambe nxavo wa kona a wu talanga ngopfu. Ha yini? Hikuva ku vonakala ka hlamarisa!

[Xifaniso lexi nga eka tluka 14]

“Xava . . . eka mina . . . murhi wo tota mahlo ya wena leswaku u ta vona”