‘U Hi Sindzise Ku Nghena’

KU HANANA swi tolovelekile ematikweni ya le Vuxeni. Hi xikombiso, le Indiya ndyangu wu nga nyika muendzi la nga rindzeriwangiki swakudya, wona wu sala wu dlawa hi ndlala. Manana un’wana wa le Iran minkarhi hinkwayo u tata xigwitsirisi hi swakudya leswaku a ta kombisa malwandla eka vaendzi lava a nga va rindzelangiki.

Moya wo tano wa ku hanana a wu tolovelekile eka vanhu vo tala lava ku vulavuriwaka hi vona eBibeleni. Xikombiso xin’wana lexi xiyekaka i xa Lidiya, wansati loyi kumbexana a amukeleke vukhongeri bya Vayuda loyi a a tshama eFilipiya, ku nga muti lowukulu wa muganga wa Makedoniya. Hi siku rin’wana ra savata, muapostola Pawulo ni vanghana va yena lava a a famba na vona va kume Lidiya ni vavasati van’wana va hlengeletane ekusuhi ni nambu ehandle ka Filipiya. Yehovha u pfule mbilu ya yena loko Pawulo a ri karhi a vulavula hi nkarhi wolowo. Hikwalaho, u khuvuriwile swin’we ni swirho swa ndyangu wa yena. Kutani u kombele vafambi lava a ku: “Loko n’wina mi ndzi avanyise leswaku ndzi tshembekile eka Yehovha, nghenani endlwini ya mina mi tshama.” Luka munghana wa Pawulo u ri: “A hi sindzisa ku nghena.”—Mintirho 16:11-15.

Ku fana na Lidiya, namuntlha Vakreste va kombisa malwandla eka vapfumeri-kulobye, vo tanihi valanguteri lava famba-fambaka ni vasati va vona. Lava va va amukelaka va va ‘sindzisa leswaku va nghena.’ Kutani, lava va kombisaka malwandla va vuyeriwa eka mabulo lama akaka ni xinakulobye xa moya. Hambileswi Timbhoni ta Yehovha to tala ti nga swisiwana, ti “landzela ndlela ya malwandla.” (Varhoma 12:13; Vaheveru 13:2) Moya wa tona wa ku hanana wu ti endla ti tsaka. Yesu a a tiyisile loko a te: “Ku nyika swi tisa ntsako lowukulu ku tlula ku amukela.”—Mintirho 20:35.