Matshalatshala Yo Kuma Tinhlamulo Leti Nga Tona

Ndzi nga endla yini leswaku ndzi tshama ndzi hanye kahle?

Ndzi nga endla yini leswaku ndyangu wa mina wu va ni ntsako?

Ndzi nga endla yini leswaku ndzi nga lahlekeriwi hi ntirho?

XANA u tshame u tivutisa xin’wana xa swivutiso leswi? Xana u kume tinhlamulo leti khorwisaka? Lembe na lembe, ku kandziyisiwa tibuku to hambana-hambana ta kwalomu ka 2 000 leti nyikelaka switsundzuxo malunghana ni timhaka teto ni tin’wana ta nkoka. Le Britain ntsena, vahlayi va tirhisa mali leyi endlaka tipondho ta 80 wa timiliyoni (kwalomu ka R1 100 000 000) hi lembe va xava tibuku leti nyikelaka switsundzuxo swa ndlela yo hlangavetana ni swiphiqo swa vutomi. Le United States, tibuku ta ku tihlayela ti endla ntsengo wa 600 wa timiliyoni ta tidolara (R4 400 000 000) hi lembe. Kutani a hi wena ntsena u lavaka switsundzuxo leswinene swa ku hlangavetana ni vutomi bya siku na siku.

Malunghana ni switsundzuxo leswi kumekaka etibukwini to tala, mutsari un’wana u te: “Tibuku to tala letintshwa to phindha-phindha ntsena leswi ana se swi tsariweke.” Kunene, switsundzuxo swo tala leswi kumekaka etibukwini leti swi phindha marito ya vutlhari lama tsariweke eka yin’wana ya tibuku ta khale swinene emisaveni. Buku ya kona hi yona leyi hangalasiweke ku tlula hinkwato emisaveni. Yi hundzuluxeriwe hi tindzimi ta kwalomu ka 2 400 yi helerile kumbe yi nga helelanga. Emisaveni hinkwayo ku kandziyisiwe tikopi to tlula 4,6 wa tibiliyoni. Buku ya kona i Bibele.

Bibele yi vula hi ku kongoma yi ku: “Matsalwa hinkwawo ma huhuteriwe hi Xikwembu naswona ma pfuna ku dyondzisa, ku tshinya, ku lulamisa swilo, ku laya eku lulameni.” (2 Timotiya 3:16) Kambe Bibele a hi buku leyi tsaleriweke ku tihungasa ha yona. Xikongomelo-nkulu xa yona i ku paluxa ku rhandza ka Xikwembu hi vanhu. Hambiswiritano, Bibele yi vula swo tala malunghana ni ndlela ya ku hlangavetana ni swiphiqo swa vutomi, naswona yi tshembisa leswaku lava va namarhelaka nkongomiso wa yona va ta pfuneka hakunene. (Esaya 48:17, 18) Loko munhu a tirhisa ndzayo ya yona wa humelela minkarhi hinkwayo, ku nga khathariseki rixaka, ndhavuko kumbe dyondzo ya yena. Ha yini u nga kambisisi xihloko lexi landzelaka kutani u vona loko leswi Bibele yi swi vulaka etimhakeni to tanihi rihanyo, ndyangu ni ntirho wa ku tihanyisa swi tirha hakunene?