Swivutiso Swa Vahlayi

Hi nga ma twisisa njhani marito ya Pawulo ya leswaku noni yi fanele yi va “nsati wa nuna un’we” leswaku yi fanelekela ku pfuniwa hi vandlha ra Vukreste?—1 Timotiya 5:9.

Tanihi leswi muapostola Pawulo a a vulavula hi noni, xiga lexi nge “nsati wa nuna un’we” xi fanele xi vulavula hi xiyimo xa yena loko a nga si va noni. Xana leswi swi vula leswaku noni a yi fanele yi tekiwe kan’we ntsena? Kumbe, xana marito ya Pawulo a ma vula swin’wana? *

Van’wana va ringanyete leswaku Pawulo a a vulavula hi tinoni leti a ti tekiwe kan’we ntsena. I ntiyiso leswaku emigangeni ni le matikweni yo tala, noni leyi tshamaka yi nga tekiwanga a yi langutiwa yi ri leyi tengeke. Hambiswiritano, langutelo ro fana ni rero ri hambana swinene ni marito man’wana ya Pawulo. Hi xikombiso, eka Vakreste va le Korinto, u swi veke erivaleni leswaku hambileswi a a anakanya leswaku noni a yi ta tsaka loko a yi tshama yi nga tekiwanga, “[yi] ntshunxekile ku tekana ni loyi [yi] n’wi lavaka, eHosini ntsena.” (1 Vakorinto 7:39, 40; Varhoma 7:2, 3) Ku tlhandlekela kwalaho, eka papila ra yena leri yaka eka Timotiya, Pawulo u te: “Ndzi navela leswaku tinoni letitsongo ti tekiwa.” (1 Timotiya 5:14) Xisweswo, a ku nga ri na xivangelo xo sola noni loko yo hlawula ku tekiwa.

Kutani, hi nga ma twisisa njhani marito ya Pawulo lama yaka eka Timotiya? Xiga lexi nge “nsati wa nuna un’we” xi humelela eka ndzimana leyi ntsena. Eka ririmi ro sungula, hi ku kongoma xi vula “wansati wa wanuna un’we.” Lexi tsakisaka, xiga lexi xi yelana swinene ni lexi Pawulo a xi tirhiseke ko hlayanyana eka mapapila ya yena, lexi nge, “nuna la nga ni nsati un’we,” kumbe “nuna wa nsati un’we” hi ririmi ro sungula. (1 Timotiya 3:2, 12; Tito 1:6) Pawulo u tirhise xiga lexi xo hetelela loko a xaxameta timfanelo ta valanguteri ni malandza ya vutirheli lava nga Vakreste. Eka mongo wolowo, xiga lexi xi vula leswaku loko wanuna a ta fanelekela ku va ni vutihlamuleri evandlheni ra Vukreste, loko a tekile, u fanele a tshembeka eka nsati wakwe naswona a pfumala xisandzu emahanyelweni. * Hikwalaho, xiga lexi nga eka 1 Timotiya 5:9 xi vonaka xi ri ni mongo lowu fanaka: Leswaku noni yi fanelekela ku kuma mpfuno wa vandlha, yi fanele yi ve nsati la tinyiketeleke loyi a a tshembekile eka nuna wakwe loko a ha hanya naswona yi fanele yi pfumala xisandzu. Swilaveko leswi engetelekeke leswi xaxametiweke hi Pawulo swi kombetela eka noni leyi.—1 Timotiya 5:10.

[Tinhlamuselo ta le hansi]