Misava Leyi Nga Ni Tihanyi Ya Nnamuntlha

MARÍA a a ri ni malembe ya 64 hi vukhale naswona a a tshama yexe. U kumiwe a file ekaya ra yena, a a biwile naswona a tlimbiwe nkolo hi darata.

Ntshungu wa vapfukeri lowu hlundzukeke wu be maphorisa manharhu, wu ma hehla hileswaku ma tlhakise swifanyana swimbirhi. Ntshungu wolowo wa vapfukeri wu chele maphorisa mambirhi hi petirolo kutani wu ma lumeka, ma dlayiwe hi malangavi. Phorisa ra vunharhu ri kote ku baleka.

Riqingho leri swi nga tiviwiki leswaku ri biwe hi mani ri endle leswaku ku tshuburiwa mhaka leyi tsemaka nhlana. Vavanuna va mune lava a va endzele ndhawu yoleyo va pfukuriwile entangeni. A va pfariwe mahlo naswona mavoko ya vona a ma bohiwile. Loko ku kamberiwe mintsumbu ya vona leswaku ku kumiwa xivangelo xa rifu ra vona, ku kumiwe leswaku va celeriwe va ha hanya.

Swiendlo leswi swo chavisa a hi swiendlakalo leswi voniweke eka tifilimi leti chavisaka leti nga ni tihanyi ni madzolonga. Swiviko leswi hinkwaswo i timhaka ta xiviri leti ta ha ku endlekaka naswona ti veke mahungu-nkulu etikweni rin’wana ra le Latin-Amerika. Kambe, a swi kanakanisi leswaku tiko rero a hi rona ntsena ri langutanaka ni swiendlo swo tano swa tihanyi emisaveni ya namuntlha.

Swiendlo swa tihanyi se i tshamelo maxelo. Ku buluka ka tibomo, minhlaselo ya matherorisi, ku dlaya hi vomu, ku hlaseriwa, ku duvulana ni ku pfinya i swiendlo swi nga ri swingani ntsena swa tihanyi. Nkarhi na nkarhi, swihaxa-mahungu swi hi komba swifaniso swa tihanyi, naswona vanhu vo tala a va ha chavi ku vona kumbe ku twa hi swiendlo swo tano leswi nga ni tihanyi.

Hakunene u nga ha tivutisa u ku: ‘Ku humelela yini hi misava ya namuntlha? Xana vanhu a va ha ri na wona moya wo anakanyela ndlela leyi van’wana va titwaka ha yona ni ku xixima vutomi?’ Ha yini hi fanele hi hanya emisaveni leyi nga hi ndlela leyi?

Sweswi xiya xikombiso xa Harry, wanuna la nga ni malembe ya 69 hi vukhale, loyi a nga ni vuvabyi bya khensa. Nsati wakwe u ni vuvabyi bya fambiselo ra misiha ya switwi lebyi lamataka miri lebyi vuriwaka multiple sclerosis, kambe vaakelani ni vanghana va ta hi ku tirhandzela leswaku va ta va pfuna. Harry u ri: “A ndzi tivi leswaku a hi ta endla yini loko vanhu lava va hi pfunaka a va nga ri kona.” ECanada, laha a tshamaka kona, nkambisiso wun’wana wu kombisa leswaku vanhu lava tlulaka 50 wa tiphesente, lava khathalelaka vadyuhari, va pfuna munhu la nga riki xaka ra vona. A swi kanakanisi leswaku wa va tiva vanhu lava tolovelekeke lava nkarhi na nkarhi va kombisaka musa swin’we ni moya wo pfuna. Ina, vanhu va na byona vuswikoti byo kombisa ntwela-vusiwana ni musa ematshan’weni ya ku va ni tihanyi.

Loko swi ri tano, ha yini ku ri ni swiendlo swa tihanyi? I yini lexi endlaka vanhu va va ni tihanyi? Xana lava khomaka van’wana hi tihanyi va nga hundzuka? Xana tihanyi ti ta kala ti hela? Nakambe loko swi ri tano, ti ta hela njhani naswona rini?

[Xifaniso lexi nga eka tluka 3]

Train: CORDON PRESS