Nchumu Lowu Adryana A A Wu Navela

ADRYANA, xinhwanyetana lexi nga ni malembe ya tsevu hi vukhale xa le Tulsa, eOklahoma, le U.S.A., a xi navela nchumu wo karhi. Nchumu wa kona a a wu fana ni lowu a wu naveriwa hi mupisalema Davhida, loyi a yimbeleleke a ku: “Nchumu wun’we lowu ndzi wu kombeleke eka Yehovha—hi lowu ndzi nga ta wu rindzela, leswaku ndzi tshama endlwini ya Yehovha masiku hinkwawo ya vutomi bya mina, ndzi vona ku tsakisa ka Yehovha ni ku languta tempele yakwe hi ku tlangela.”—Pisalema 27:4.

Loko Adryana a ri ni tin’hweti ta tsevu ntsena hi vukhale, u kumeke a ri ni vuvabyi lebyi vitaniwaka neuroblastoma, ku nga tshumba leri nga ni khombo leri kulaka etindhawini to karhi ta fambiselo ra misiha ya switwi. Vuvabyi lebyi lebyi nga ni khombo byi n’wi siye a lamale milenge hamimbirhi. Madokodela ma n’wi endle vuhandzuri byo hlayanyana ma tlhela ma n’wi tshungula lembe hinkwaro hi vutshunguri byo tirhisa tikhemikhali.

Tata wa Adryana, loyi a nga hlanganyeliki eka vukhongeri bya Adryana ni mana wakwe, u vulavurisane ni nhlangano wo karhi a kombela leswaku n’wana wa yena a endzela ndhawu yo titsakisa eka yona leyi dumeke swinene. Emahlweni ko hetisisa xikombelo xexo, nhlangano lowu wu vulavurisane na Adryana. U tlangele swinene leswi va kambisiseke xikombelo xa tata wakwe kambe u va byele leswaku a swi ta antswa ku va a endzela eBethele, ku nga ndhawu leyi ku endliwaka ntirho wa misava hinkwayo wa Timbhoni ta Yehovha eNew York. Endzhaku ka loko Adryana a twe hi ta xikombelo xa tata wa yena, u khongele eka Yehovha leswaku a n’wi pfuna a kota ku endzela eBethele. Hambileswi eku sunguleni nhlangano lowu a wu karhatekile hileswaku Bethele yi nga tshuka yi nga n’wi tsakisi n’wana loyi, wu n’wi pfumelerile leswaku a famba loko tata wa yena na yena a pfumerile.

Adryana u ye eNew York a ya endzela eBethele ro sungula, a famba ni mana wa yena, sesi wa yena ni munghana wa vona. Adryana u te: “Yehovha u ndzi hlamurile. A ndzi swi tiva leswaku u ta hi endla hi titwa hi amukelekile eBethele. Ndzi vone ndlela leyi tibuku, timagazini ni Tibibele ti endliwaka ha yona. Yi tlula ndhawu yo titsakisa eka yona.”

Adryana u “[vone] ku tsakisa ka Yehovha” naswona u tlangele ndlela leyi ku tirhiwaka ha yona laha ku endliwaka mintirho ya vanhu va Yehovha namuntlha. Na wena wa khutaziwa leswaku u endzela eBethele. Handle ka yindlu-nkulu ya misava hinkwayo ya Timbhoni ta Yehovha le New York, ku ni marhavi ematikweni yo hambana-hambana ya misava.