Vantshwa Mi—Khumba Timbilu Ta Vatswari Va N’wina

“NDZI HAVA xivangelo lexikulu xa ku nkhensa ku tlula swilo leswi, ku twa leswaku vana va mina va tama va famba entiyisweni,” ku tsala muapostolaYohane loyi se a a dyuharile. (3 Yohane 4) Hambileswi vana lava ku vulavuriwaka ha vona eka ndzimana leyi ya Bibele ku nga vadyondzisiwa lava nga Vakreste, mutswari la chavaka Xikwembu u swi twisisa kahle leswi vuriweke hi Yohane. Tanihi leswi vatswari va vaka ni nhlohlotelo lowukulu evuton’wini bya vana va vona, kutani vana na vona va byi khumba swinene vutomi bya vatswari va vona.

Hosi Solomoni wa Israyele u hlamusele ndlela leyi vana va nga khumbaka vatswari va vona ha yona. U tsarile: “N’wana wo tlhariha hi loyi a tsakisaka tata wakwe, naswona n’wana wo hunguka i gome eka mana wakwe.” (Swivuriso 10:1) Hikwalaho, vana hinkwavo—hambi lava kuleke—va ta va va endla kahle loko va ehleketa hi ndlela leyi vatswari va vona va khumbekaka ha yona hi swilo leswi va swi endlaka. Hikwalaho ka yini swi ri tano?

Ehleketa hi nkhathalelo lowu vatswari va wena lava chavaka Xikwembu va ku nyikeke wona loko va ri karhi va ku kurisa! I khale va karhateka hi wena va endla ni swikhongelo u nga si tswariwa ni ku tswariwa. Endzhaku ka ku va u tswariwile, vatswari ha vambirhi va tsakisiwe hi vuxaka lebyi veke kona exikarhi ka vona na wena naswona a swi kanakanisi leswaku va nkhense Xikwembu hi lunghelo leri ra nkoka ra ku ku kurisa. N’wana loyi a nga kotiki ku endla nchumu se a a lava nkhathalelo wa vona, naswona tanihi vagandzeri va Yehovha, va swi yimele hi milenge sweswo.

Tanihi leswi vatswari va wena va nga Vakreste va ntiyiso, va ye eBibeleni ni le tibukwini leti sekeriweke eBibeleni leswaku va kuma nkongomiso lowu tshembekaka, naswona va kombele xitsundzuxo eka lava va tshameke va kurisa vana. Naswona va hambete va vulavula ni Xikwembu hi xikhongelo, va phofula leswi va karhatekaka ha swona. (Vaavanyisi 13:8) Loko u ri karhi u kula, vatswari va wena a va yi xiya mikhuva ya wena leyinene ni leyi nga riki yinene. (Yobo 1:5) Loko u fika eka malembe ya kondlo-a-ndzi-dyi ku sungule swiphiqo leswintshwa. Minkarhi yin’wana, u nga ha va u tikhome hi ndlela leyi kombisaka ku xandzuka kutani vatswari va wena va tikuma va khongela va nga heti, va tshamela ku hlaya, naswona va ehleketa ngopfu hi leswaku va nga ku pfunisa ku yini leswaku u hambeta u gandzela Tata wa wena wa le matilweni, Yehovha.

Vatswari va wena va ta tshama va ri vatswari. Va  ta hambeta va karhateka hi vuhlayiseki bya wena emirini, emianakanyweni, emintlhavekweni ni le moyeni hambiloko se u kurile. Hambiswiritano, vatswari va swi tiva leswaku u ni lunghelo ro tiendlela swiboho, kambe a va swi tivi leswaku u ta hetelela u ri munhu wa muxaka muni. Eku heteleleni hi wena u nga ta hlawula leswaku u lava vutomi bya wena byi va njhani.

Hikwalaho, loko vatswari va vula leswaku va “hava xivangelo lexikulu xa ku nkhensa” ku tlula ku twa leswaku vana va vona “va tama va famba entiyisweni,” swi le rivaleni leswaku a va nge tsaki loko hi endla swo hambana ni sweswo. Kunene vana lava endlaka swiboho swa vuhunguki va khomisa vatswari gome. Solomoni u te: “N’wana la hungukeke u dyisa tata wakwe mbitsi naswona u karhata loyi a n’wi velekeke.” (Swivuriso 17:25) Vatswari va karhateka swinene loko n’wana a tshika ku gandzela Xikwembu xa ntiyiso!

Kunene, ndlela leyi u endlaka swilo ha yona ya va khumba swinene va ka n’wina ni vanhu van’wana. Mahanyelo ya wena ya va khumba swinene vatswari va wena. Loko u fularhela Xikwembu ni misinya ya xona ya milawu, vatswari va wena va ta karhateka. Kambe loko u papalata sweswo ku ta va ni vuyelo lebyi hambaneke. Loko u tshama u tshembekile eka Yehovha naswona u n’wi yingisa, vatswari va wena va ta tsaka. Tiyimisele ku tsakisa mbilu ya vatswari va wena! A ku na nyiko yin’wana ya risima leyi u nga yi nyikaka lava ku kuriseke, va ku hlayisa va tlhela va ku rhandza!