Ha Yini Hi Hlangana Swin’we?

HI XITSHUKETA, nuna wa Christine u n’wi tshikile endzhaku ka malembe ya 20 va tekanile. Christine u boheke ku kurisa vana va nkombo va majaha ni nhwanyana un’we a ri yexe. Malembe ya vona a ma sukela eka 7 ku ya eka 18. U ri: “Sweswi se a ndzi fanele ku tiendlela swiboho swa nkoka. Vutihlamuleri lebyi byi ndzi hete matimba kutani a ndzi navela ku kuma nseketelo ni nkongomiso.” Xana u wu kume kwihi mpfuno lowu a a wu lava?

Christine u ri: “Minhlangano ya Vukreste yi hi sirhelerile mina ni vana va mina. Eminhlanganweni, hi kume xikhutazo lexi humaka eka vanghana va hina ni nkongomiso lowu humaka eRitweni ra Xikwembu. Ku va kona eminhlanganweni nkarhi ni nkarhi swi hi pfune etimhakeni hinkwato ta nkoka ta vutomi bya ndyangu wa hina.”

“[Eminkarhini leyi] ya mangava leyi swi nonon’hwaka ku langutana na yona,” hinkwerhu ka hina hi fanele hi langutana ni miringo yo hambana-hambana. (2 Timotiya 3:1) Ku fana na Christine, u nga ha teka minhlangano ya Timbhoni ta Yehovha tanihi nchumu wa nkoka eripfumelweni ra wena, xiyenge xa nkoka xa vugandzeri bya wena eka Yehovha. A swi kanakanisi leswaku minhlangano ya ntlhanu ya vandlha leyi hleriweke vhiki ni vhiki yi ku susumetela leswaku u rhandza Xikwembu, yi tiyisa ntshembo wa wena hi vumundzuku naswona yi ku nyika nkongomiso lowu sekeriweke eBibeleni wa ndlela leyi u nga langutanaka ni miringo ha yona.

Hambiswiritano, ku ni vanhu lava swi va tikelaka ku va kona eminhlanganweni nkarhi na nkarhi. Endzhaku ka mintirho ya siku va sala va karhele, lerova ku cinca swiambalo va ambala leswi fanelekaka ivi va ya eminhlanganweni ku nga ha va nchumu lowu tikaka. Van’wana va kuma leswaku matirhelo ya vona ya nkarhi na nkarhi ma va sivela ku ya eminhlanganweni. Leswaku va kota ku va kona eminhlanganweni hinkwayo, va nga ha boheka ku hanya hi mali yitsongo kumbe va lahlekeriwa hi mintirho ya vona. Van’wana va nga ha xwa eminhlanganweni hikuva va ehleketa leswaku muxaka wun’wana wa ku tihungasa wu ta va phyuphyisa swinene ku tlula ku ya evandlheni.

Kutani, hi swihi swivangelo swa nkoka leswi ku susumetelaka ku va kona eminhlanganweni ya Vukreste? U nga endla njhani leswaku minhlangano leyi yi va leyi ku phyuphyisaka? Leswaku hi kota ku hlamula swivutiso leswi, a hi kambisiseni xirhambo xa rirhandzu xa Yesu lexi tsariweke eka Matewu 11:28-30. U te: “Tanani eka mina, n’wina hinkwenu lava tirhaka hi matimba ni lava tikeriwaka, ndzi ta mi phyuphyisa. Tlhandlekani joko ra mina ehenhla ka n’wina mi tlhela mi dyondza eka mina, hikuva ndzi ni moya wo rhula ni mbilu yo titsongahata, kutani mi ta kumela mimoya-xiviri ya n’wina ku phyuphya. Hikuva joko ra mina ra olova ni ndzhwalo wa mina wa vevuka.”

“Tanani Eka Mina”

Yesu u te: “Tanani eka mina.” Ndlela yin’wana leyi hi nga hlamulaka ha yona  eka xirhambo xexo i ku va kona eminhlanganweni nkarhi na nkarhi. Ku ni xivangelo lexinene xo va kona eminhlanganweni, hikuva siku rin’wana Yesu u te: “Laha ku nga na vambirhi kumbe vanharhu lava hlengeletaneke swin’we hi vito ra mina, ndzi kona exikarhi ka vona.”—Matewu 18:20.

Hi lembe-xidzana ro sungula, Yesu hi byakwe u rhambe vanhu vo hambana-hambana leswaku va n’wi landzela. Xisweswo u va nyike lunghelo ra ku va ni vunakulobye lebyikulu na yena. Van’wana va amukele xirhambo xolexo hi ku hatlisa. (Matewu 4:18-22) Van’wana va pfumelele swilo swo tanihi swilo leswi vonakaka swi va tshikisa ku amukela xirhambo xolexo. (Marka 10:21, 22; Luka 9:57-62) Yesu u tiyisekise lava n’wi landzeleke hi marito lawa: “A mi ndzi hlawulanga, kambe mina ndzi mi hlawurile.”—Yohane 15:16.

Endzhaku ka rifu ni ku pfuxiwa kakwe, Kreste a a nga ha ta tlhela a va ni vadyondzisiwa vakwe hi ndlela ya nyama. Kambe a a ta hambeta a va na vona hi mongo wa leswaku a a ta kongomisa ntirho wa vona ni ku xiya ndlela leyi a va ta angula ha yona eka ndzayo yakwe. Hi xikombiso, endzhaku ka malembe ya kwalomu ka 70 Yesu a pfuxiwile, u nyikele ndzayo ni xikhutazo emavandlheni ya nkombo ya le Asia Minor. Marito yakwe ma kombise leswaku a a ti tiva kahle timfanelo letinene ni ku tsana ka munhu un’wana ni un’wana wa le mavandlheni wolawo.—Nhlavutelo 2:1–3:22.

Yesu wa ha khathala swinene hi mudyondzisiwa un’wana ni un’wana wakwe. Wa tshembisa: “Maswivo, ndzi na n’wina masiku hinkwawo ku fikela emakumu ka mafambiselo ya swilo.” (Matewu 28:20) Sweswi hi hanya enkarhini wa makumu, hikokwalaho hi fanele hi landzela Yesu hi ku pfumelelana ni xirhambo xa yena. Xilo xin’wana lexi nga hi pfunaka ku endla tano, i ku va kona eminhlanganweni nkarhi na nkarhi. Yesu u lava leswaku hi n’wi yingisa ni ku “dyondzisiwa ha yena” hi tidyondzo leti sekeriweke eBibeleni ni tinkulumo leti tshamelaka ku nyikeriwa eminhlanganweni. (Vaefesa 4:20, 21) Xana wa xi amukela xirhambo xa Yesu lexi nge: “Tanani eka mina”?

‘N’wina Lava Tirhaka Hi Matimba Ni Lava Tikeriwaka’

Xivangelo xa nkoka xa ku va kona eminhlanganweni ya Vukreste i ku ya kuma xikhutazo. (Vaheveru 10:24, 25) Hakunene vo tala va hina va ‘tirha hi matimba ni ku tikeriwa’ hi tindlela to hambana-hambana. U nga ha va u tikeriwa hi swikarhato swa munhu hi yexe swo tanihi swiphiqo swa rihanyo. Eminhlanganweni ya Vukreste, u nga tsakela ku khutazana ni van’wana. (Varhoma 1:11, 12) Hi xikombiso, u ta twa tinhlamulo leti tiyisaka ripfumelo, u ta tsundzuxiwa hi ntshembo wa wena lowu sekeriweke eBibeleni ni ku xiya ripfumelo ra van’wana lava tiyiselaka miringo. Swilo leswi hinkwaswo swi nga ku pfuna ku tiyisela ni ku va ni langutelo leri faneleke hi swiphiqo swa wena.

Xiya leswi vuriweke hi wansati un’wana la nga Mukreste loyi a siveriwaka hi vuvabyi lebyi tshamelaka ku n’wi karhata. Wa hlamusela: “Vuvabyi bya mina byi lava leswaku ndzi heta nkarhi wo karhi ndzi ri exibedlhele. Ku ya eminhlanganweni endzhaku ka loko ndzi hete nkarhi ndzi ri exibedlhele swi nga tika hi ndlela yo karhi, kambe hi yona ndhawu leyi ndzi faneleke ku va eka yona. Moya wa xinghana ni rirhandzu ra vamakwerhu swi ndzi endla leswaku ndzi va ni ntsako lowukulu, naswona dyondzo ni nkongomiso lowu nyikeriwaka hi Yehovha na Yesu wu endla leswaku vutomi bya mina byi va ni xikongomelo.”

“Joko Ra Mina Ra Olova Ni Ndzhwalo Wa Mina Wa Vevuka”

Xiya leswaku eka tindzimana leti hi ti kambisisaka, Yesu u te: ‘Dyondzani eka mina.’ Hi ku dyondza eka Yesu, hi hundzuka vadyondzisiwa vakwe naswona hi teka joko rakwe loko hi tinyiketela eka Xikwembu kutani hi khuvuriwa. (Matewu 28:19, 20) I swa nkoka leswaku hi va kona nkarhi na nkarhi eminhlanganweni loko hi lava ku tshama hi ri vadyondzisiwa va Yesu. Ha yini? Hikuva hi le minhlanganweni ya Vukreste laha hi dyondzisiwaka kona malunghana na Yesu, tidyondzo takwe ni maendlelo yakwe ya swilo.

Hi wihi ndzhwalo lowu Kreste a lavaka leswaku hi wu rhwala? Wu fana ni lowu yena hi byakwe a wu rhwalaka—lunghelo ro endla ku rhandza ka Xikwembu. (Yohane 4:34; 15:8) Swi lava matshalatshala  ku yingisa swileriso swa Xikwembu, kambe ndzhwalo lowu a wu tiki ngopfu lerova swi nga hi tikela ku wu rhwala. Wu nga ha tikomba wu tika loko hi ringeta ku wu rhwala hi ri hexe hi nga lavi mpfuno. Hambiswiritano, loko hi khongelela moya wa Xikwembu ni ku dya swakudya swa moya leswi phameriwaka eminhlanganweni, hi ta kuma “matimba lama tlulaka lama tolovelekeke” lama humaka eka Xikwembu. (2 Vakorinto 4:7) Ku lunghiselela minhlangano ni ku hlanganyela eka yona swi endla leswaku rirhandzu ra hina hi Yehovha ri kula swinene. Nakambe loko hi susumeteriwa hi rirhandzu, swileriso swa Xikwembu “a swi tiki.”—1 Yohane 5:3.

Vanhu hi ntolovelo va langutana ni swiphiqo swo tanihi ku kuma mali yo tihanyisa ha yona, timhaka ta rihanyo ni swiphiqo swa munhu hi yexe. Hambiswiritano, leswaku hi langutana na swona hi ndlela leyi humelelaka a hi fanelanga hi titshega hi vutlhari bya munhu ntsena. Minhlangano ya vandlha yi hi pfuna ku ‘tshika ku vilela,’ hikuva Yehovha wa hi nyika swilaveko swa hina naswona u hi pfuna ku langutana ni swiphiqo. (Matewu 6:25-33) Hakunene, minhlangano ya Vukreste i xikombiso xa ndlela leyi Xikwembu xi hi rhandzaka ha yona.

“Ndzi Ni Moya Wo Rhula Ni Mbilu Yo Titsongahata”

Yesu a a tolovele ku ya esinagogeni, laha Rito ra Xikwembu a ri tlhuvutsiwa kona. Siku rin’wana, Yesu u teke buku-nsongwa ya Esaya ivi a yi hlaya a ku: “Moya wa Yehovha wu le henhla ka mina, hikuva u ndzi tote leswaku ndzi vula mahungu lamanene eka swisiwana, u ndzi rhume leswaku ndzi chumayela ku ntshunxiwa ka makhumbi ni ku endliwa ka lava feke mahlo leswaku va tlhela va vona, ku ntshunxa lava tshikeleriweke va tifambela, ku chumayela lembe ra Yehovha ra ku amukeriwa.” (Luka 4:16, 18, 19) Mawaku ndlela leyi a swi tsakisa ha yona ku twa Yesu a hlamusela marito wolawo a ku: “Namuntlha tsalwa leri ma ha ku ri twaka ri hetisekile”!—Luka 4:21.

Yesu “murisi lonkulu” loyi a nga ni moya wo rhula, wa ha hambeta a langutela ku risiwa ka valandzeri vakwe. (1 Petro 5:1-4) Ehansi ka nkongomiso wakwe, “hlonga ro tshembeka ni ro tlhariha” ri veke vavanuna ku va varisi emavandlheni ya Timbhoni ta Yehovha emisaveni hinkwayo. (Matewu 24:45-47; Tito 1:5-9) Vavanuna lava va “risa vandlha ra Xikwembu” hi rirhandzu naswona va veka xikombiso lexinene hi ku va kona eminhlanganweni nkarhi ni nkarhi. U nga kombisa ku tlangela ka wena “tinyiko [leti] leti nga vanhu” hi ku ya eminhlanganweni, laha u nga khutazaka van’wana hi ku va kona ni ku hlanganyela ka wena.—Mintirho 15:30-33; 20:28; Vaefesa 4:8, 11, 12.

“Mi Ta Kumela Mimoya-xiviri Ya N’wina Ku Phyuphya”

Loko u ye eminhlanganweni ya Vukreste, u nga endla njhani leswaku minkarhi yoleyo yi va leyi phyuphyisaka hakunene? Ndlela yin’wana i ku tirhisa ndzayo ya Yesu leyi nge: “Nyikelani nyingiso eka ndlela leyi mi yingisaka ha yona.” (Luka 8:18) Vanhu lava a va swi navela swinene ku dyondza, va nyikele nyingiso lowukulu eka Yesu. Va n’wi kombele leswaku a hlamusela swifaniso swakwe naswona hikwalaho ka sweswo va katekisiwe hi ku va ni ku twisisa loku enteke.—Matewu 13:10-16.

U nga tekelela vanhu vo tano lava nga ni ndlala ya moya hi ku yingisela tinkulumo eminhlanganweni ya hina hi vukheta. (Matewu 5:3, 6) Leswaku u kota ku tshama u dzikise mianakanyo ya wena, ringeta ku landzelela tinhla ta xivulavuri. Tivutise swivutiso swo tanihi leswi embilwini: ‘Ndzi nga ri tirhisa njhani rungula leri evuton’wini bya mina? Ndzi nga ri tirhisa njhani leswaku ndzi pfuna van’wana? Ndzi nga yi hlamusela njhani yinhla leyi?’ Ku engetela kwalaho, hlaya matsalwa lama tirhisiwaka hi xivulavuri leswaku xi seketela tinhla-nkulu ta xona. Loko u hambeta u nyikela nyingiso endleleni leyi u yingisaka ha yona, u ta kuma leswaku minhlangano yi va leyi phyuphyisaka swinene.

Endzhaku ka nhlangano, bula ni van’wana hi nongonoko wa kona. Dzika eka rungula leri mi ri dyondzeke ni ndlela leyi mi nga ri tirhisaka ha yona. Mabulo lama akaka ma endla leswaku minhlangano yi phyuphyisa swinene.

A swi kanakanisi leswaku hi ni swivangelo leswinene swo va kona eminhlanganweni. Endzhaku ko pfuxeta mikateko leyi ha ha ku yi tlhuvutsaka, ha yini u nga tivutisi: ‘Ndzi hlamula njhani eka xirhambo xa Yesu lexi nge: “Tanani eka mina”?’

[Swifaniso leswi nga eka tluka 11]

Xana mintirho yin’wana ya ku sivela leswaku u nga vi kona eminhlanganweni?