“Ha Yini Wena Hosi U Miyerile?”

LAWA a ku ri marito ya Mupapa Benedict wa Vukhume-tsevu, loyi hi May 28, 2006 a endzeleke khale ka kampa ya nxaniso ya Auschwitz, le Poland. Endhawini leyi Manazi ma dlayeke madzana ya magidi ya Vayuda ni van’wana, u engeterile a ku: “Endhawini leyi ku vutisiwa swivutiso swo tala! Nkarhi hinkwawo ku vutisiwa swivutiso leswi: Ha yini Xikwembu xi nga tekanga goza enkarhini wolowo? Ha yini xi miyerile? Xi nga swi pfumelela njhani leswaku ku va ni ku dlayeteriwa koloko loku nga heriki ka vanhu, ku hlula loku ka vubihi? . . . Hi fanele hi hambeta hi rila hi ku titsongahata kambe hi phikelela eka Xikwembu hi ku: Teka goza! U nga va rivali vanhu, swivumbiwa swa wena!”

Marito ya mupapa ma susumetele vanhu ku hlamula. Van’wana va xiye leswaku u tshike hi vomu ku vulavula hi timhaka tin’wana, to tanihi Ku Vengiwa ka Vayuda loku a ku fambisana ni swiendlo swa nsele eAuschwitz. Van’wana va anakanye leswaku marito yakwe i xiendlo xo ringeta ku tekela ehansi xikombelo xa Mupapa John Paul wa Vumbirhi xa ku kombela ku rivaleriwa swidyoho leswi endliweke hi kereke. Mutsari wa phepha-hungu wa Mukhatoliki, Filippo Gentiloni u te: “Hambiswiritano, a swi hlamarisi leswi loko vahaxi vo tala va mahungu va vutisiwa xivutiso xo tika xa leswaku Xikwembu a xi ri kwihi—ku nga xivutiso lexi nga riki na nhlamulo—ematshan’weni yo xi hlamula, va laveke ku tiva nhlamulo ya xivutiso xo olova lexi nge: A a ri kwihi Pius wa Vukhume-mbirhi?” Vahaxi va mahungu a va vulavula hi Mupapa Pius wa Vukhume-mbirhi loyi a tsandzekeke ku vulavula enkarhini wa ku Dlayiwa ka Vayuda va le Yuropa hi Manazi.

Ku Dlayiwa ka Vayuda va le Yuropa hi Manazi swin’we ni swiendlo swin’wana hinkwaswo swa ku dlayeteriwa ka rixaka ro karhi leswi humeleleke ematin’wini ya vanhu swi kombisa leswaku “munhu [u fuma] munhu ku n’wi endla swo biha.” (Eklesiasta 8:9) Ku tlula kwalaho, Muvumbi wa vanhu a nga miyelanga exiyin’weni lexi teleke makhombo yonghasi. Hi ku tirhisa Bibele, u hlamusele swivangelo swakwe swo pfumelela vubihi. Xikwembu xi tlhele xi hi tiyisekisa leswaku a xi va rivalanga vanhu. Kahle-kahle, nkarhi lowu Xikwembu xi pfumeleleke vanhu leswaku va tifuma wu ta hela ku nga ri khale. (Yeremiya 10:23) Xana u nga swi tsakela ku tiva swo tala malunghana ni xikongomelo xa Xikwembu hi hina? Timbhoni ta Yehovha ti ta swi tsakela ku ku pfuna leswaku u kuma tinhlamulo ta le Bibeleni ta swivutiso leswi pfilunganyeke Mupapa Benedict wa Vukhume-tsevu.

[Xifaniso lexi nga eka tluka 32]

Oświęcim Museum