Ku Hlula Ehubyeni Ya Le Yuropa Ya Timfanelo Ta Vanhu

HI JANUARY 11, 2007, Huvo ya le Yuropa ya Timfanelo ta Vanhu le Strasbourg, eFurwa, yi endle xiboho lexi yimaka ni Timbhoni ta Yehovha ta le Rhaxiya leti mangaleleke Mfumo wa le Rhaxiya. Xiboho xexo xi seketele ntshunxeko wa vukhongeri wa Timbhoni ta Yehovha ni mfanelo ya tona ya leswaku ti tengisiwa hi ndlela leyi faneleke. A hi kambisiseni leswaku i yini lexi vangeleke leswaku ti ya mangala.

Vandlha ra Timbhoni ta Yehovha edorobeni-nkulu ra Chelyabinsk, eRhaxiya, ri ni vanhu vo tala lava feke tindleve. Ndhawu leyi a ti hlanganyela eka yona a ku ri kholichi yo dyondzela ntirho leyi a ti yi hirhile. Hi Sonto, April 16, 2000, nhlangano wa tona wu kavanyetiwe hi wansati loyi a nga Khomixinara wa muganga wa Huvo ya Timfanelo ta Vanhu loyi a a famba ni maphorisa mambirhi lama nga ni xikhundlha lexi tlakukeke ni phorisa leri a ri nga ambalanga yunifomo. Khomixinara yoloye loyi a nga rhandziki Timbhoni, u yimise nhlangano wa tona hi swihehlo swa mavunwa swa leswaku ti fambisa minhlangano handle ko pfumeleriwa hi nawu. Ku sukela hi May 1, 2000, a ta ha pfumeleriwanga ku khomela minhlangano endhawini yoleyo.

Timbhoni ta Yehovha ti ye ti ya mangala eka muchuchisi wa le Chelyabinsk, kambe a ku vanga na nhlanga yo huma ngati. Milawu ya le Rhaxiya ni Nhlangano wa ku Sirhelela Timfanelo ta Vanhu ni Ntshunxeko wa Vaaka-tiko swi tiyisekisa leswaku vanhu va gandzela va ntshunxekile ni ku hlangana va ntshunxekile. Hikwalaho ku mangariwile ehubyeni ya xifundzha ni ya muganga. Hi July 30, 1999, huvo leyi tlakukeke a yi endle xiboho eka nandzu wun’wana xa leswaku “hi ku ya hi Nawu wa le Rhaxiya wa ku tirhisa ripfalo hi ku ntshunxeka ni ku khoma minhlangano ya vukhongeri hi ku ntshunxeka, xiga lexi nge ‘handle ka xihinga’ xi vula leswaku ku hava mpfumelelo wa valawuri lowu lavekaka wo endla minhlangano ya vukhongeri etindhawini leti ti akeriweke [xikongomelo xexo].” (Swiangi i swa vona.) Ku nga khathariseki matshalatshala lawa hinkwawo, swivilelo leswi yisiweke eka huvo ya xifundzha ni ya muganga swi honisiwile.

Hi December 17, 2001, nandzu lowu wu yisiwe eka Huvo ya le Yuropa ya Timfanelo ta Vanhu. Wu tengiwe hi September 9, 2004. Xiboho lexi endliweke hi Huvo hi lexi:

“Huvo yi kume leswaku mfanelo ya vamangali ya ku gandzela hi ku ntshunxeka a yi xiximiwanga, hikuva hi 16 April 2000, vatirheli va Mfumo va yimise nhlangano wa vamangali wa vukhongeri wu nga si hela.”

“Xivangelo xa vatirhela-mfumo xo yimisa nhlangano wa vukhongeri lowu a wu khomeriwe endhawini leyi hirhiweke ximfumo a xi twali.”

“[Huvo] yi xixima nawu lowu nga hundzukiki wa Huvo leyi Tlakukeke ya le Rhaxiya lowu vulaka leswaku a swi bohi leswaku ku kumiwa mpfumelelo ka ha ri emahlweni eka valawuri kumbe ku va tivisa loko ku ta khomiwa minhlangano ya vukhongeri.”

“Hikwalaho ku tluriwe Nawu wa vu-9 [ntshunxeko wa vukhongeri] wa Nhlangano wa ku Sirhelela Timfanelo ta Vanhu ni Ntshunxeko wa Vaaka-tiko emhakeni yo yimisa nhlangano wa vukhongeri wa vamangali hi 16 April 2000 hi Khomixinara ni vapfuni va yena.”

“Huvo yi kume leswaku huvo ya xifundzha ni ya muganga ti tsandzekile ku endla ntirho wa tona . . . wa ku tenga milandzu handle ka xihlawuhlawu. Ku . . . tluriwe Nawu wa vu-6 [mfanelo yo tengisiwa hi ndlela leyi faneleke] wa Nhlangano.”

Timbhoni ta Yehovha ti nkhensa Xikwembu hileswi xi endleke leswaku ti hlula eHubyeni ya le Yuropa ya Timfanelo ta Vanhu. (Pisalema 98:1) Xana xiboho lexi tekiweke hi Huvo xi ta va ni vuyelo lebyikulu ku fikela kwihi? Joseph K. Grieboski, muungameri wa Vumbiwa lebyi vulavulaka hi Vukhongeri ni Nawu lowu khumbaka Mani na Mani, u ri: “Lexi i xiboho xin’wana xa nkoka swinene lexi khumbaka ntshunxeko wa vukhongeri eYuropa hinkwaro, tanihi leswi xiboho lexi xi nga ta khumba timfanelo ta vukhongeri ematikweni hinkwawo lama nga ehansi ka Huvo ya le Yuropa ya Timfanelo ta Vanhu.”