Matimba Ya Ririmi

RIRIMI ra nhutlwa ri lehe 45 wa tisentimitara naswona ri ni matimba lama eneleke yo kota ku kha matluka emirhini.

Ririmi ra munhu a hi nchumu loko hi ri pimanisa ni ku anama, ntiko ni matimba ya ririmi ra nhutlwa. Kambe ri kota ku endla swilo swo hlamarisa. Loko Bibele yi vulavula hi xirho lexi lexitsongo xa miri wa munhu, yi ri: “Rifu ni vutomi swi le matimbeni ya ririmi.” (Swivuriso 18:21) A swi kanakanisi leswaku i ko tala u twa hi ndlela leyi ririmi ri tirhisiweke ha yona ku luka mavunwa ni ku hembela vanhu lava nga riki na nandzu leswaku va onhiwa vito kumbe va dlayiwa.

Hilaha ku fanaka, vanhu lava heteke malembe yo tala va ri vanghana, va hetelele va ri valala hikwalaho ka marito lama vavisaka. Vanhu va twisiwa ku vava hikwalaho ka marito lama tlhavaka. Yobo loyi miri wa yena hinkwawo a wu fehla u te: “Xana mi ta hambeta mi karhata moya-xiviri wa mina ku fikela rini naswona mi hambeta mi ndzi pfotlosa hi marito?” (Yobo 19:2) Mudyondzisiwa Yakobo u yi hlamusela kahle ndlela leyi ririmi ri nga onhaka ha yona loko a ku: “Ririmi i xirho lexitsongo, kambe ke, ri tikurisa ngopfu. Waswivo! Swi lava ndzilonyana lowutsongo ku lumeka khwati lerikulu swinene! Kunene, ririmi i ndzilo.”—Yakobo 3:5, 6.

Hi hala tlhelo, ririmi ri nga swi kota ku hanyisa. Marito yo twela van’wana vusiwana ni lama chavelelaka ma ponise van’wana eka gome ni ku lava ku tidlaya. Vanhu vo tala lava tirhisaka swidzidzirisi ni swigevenga swa tihanyi swi pone rifu hikwalaho ko yingisa ndzayo leyinene. Entiyisweni, mihandzu ya munhu wa ririmi ro lulama “i murhi wa vutomi,” naswona “rito leri vuriweke hi nkarhi wa kona ri fana ni maapula ya nsuku exibyeni xa silivhere.”—Swivuriso 15:4; 25:11.

Hambiswiritano, ndlela leyinene yo tirhisa ririmi, i ku dzunisa Yehovha Xikwembu, hi chumayela mahungu lamanene ya Mfumo wa Xikwembu ni ku dyondzisa van’wana tidyondzo ta risima ta Bibele. Hikwalaho ka yini? Yesu u te: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.”—Yohane 17:3; Matewu 24:14; 28:19, 20.