Swivutiso Swa Vahlayi

Xana Swivuriso 22:6 yi tiyisekisa leswaku loko vana va Vakreste va leteriwe kahle, a va nge hambuki endleleni ya Yehovha?

Ndzimana leyi yi ri: “Letela mufana hi ndlela leyi nga yakwe; hambiloko a kurile a nge hambuki eka yona.” Tanihi leswi xirhabyana xi lavaka ku seketeriwa leswaku xi kota ku kula kukondza xi va murhi, hakanyingi vana lava leteriweke kahle va ya emahlweni va tirhela Yehovha loko va kurile. Tanihi leswi mutswari un’wana ni un’wana a tivaka hakona, ku letela hi ndlela yoleyo swi teka nkarhi naswona swi lava ku tikarhata. Leswaku vatswari va endla vana va vona va va vadyondzisiwa lava nga Vakreste, va fanele va va letela hi vukheta, va va tsundzuxa, va va khutaza ni ku va tshinya va tlhela va va xikombiso lexinene eka vona. Va fanele va heta malembe yo tala va ri karhi va endla tano hi ku phikelela ni hi rirhandzu.

Kambe, xana leswi swi vula leswaku loko n’wana a tshika ku tirhela Yehovha, ku va ku tsandzeke vatswari? Minkarhi yin’wana, vatswari va nga ha debyisa mavoko loko va kurisa vana va vona ni loko va va tshinya hi nkongomiso wa mianakanyo wa Yehovha. (Vaefesa 6:4) Hi hala tlhelo, ndzimana leyi a yi tiyisekisi leswaku loko vana va leteriwe kahle va ta tshembeka eka Xikwembu. Vatswari a va nge swi koti ku endlisa vana va vona leswi vona va swi lavaka. Ku fana ni vanhu lava kuleke, vana va ni ntshunxeko wo tihlawulela leswi va swi lavaka naswona va fanele va tihlawulela ndlela leyi va lavaka ku hanya hi yona. (Deteronoma 30:15, 16, 19) Ku nga khathariseki matshalatshala hinkwawo lawa vatswari va ma endleke, vana van’wana va hetelela va nga tshembeki, ku fana na Solomoni, loyi a tsaleke ndzimana leyi hi vulavulaka ha yona. Hambi ku ri Yehovha u ve ni vana lava nga tshembekangiki.

Xisweswo, ndzimana leyi a yi vuli swona leswaku n’wana un’wana ni un’wana ‘a nge hambuki endleleni’ leyinene leyi a kurisiweke ha yona kambe hi ntolovelo swi va tano. Marito lawa ma khutaza eka vatswari! Va fanele va khutaziwa hi ku tiva leswaku matshalatshala ya vona yo letela vana va vona hi ndlela ya Yehovha ma ta humesa vuyelo lebyinene. Tanihi leswi ntirho wa vona wu nga wa nkoka nileswi nkucetelo wa vona wu nga ni matimba swinene, vatswari va khutaziwa ku teka xiavelo xa vona xi ri xa nkoka.—Deteronoma 6:6, 7.

Hambiloko vana va vona va nga hambuka endleleni yo tirhela Yehovha, vatswari lava phikeleleke ku letela vana va vona va nga ha va ni ntshembo wa leswaku vana va vona va ta tsundzuka leswi va dyondzisiweke swona kutani va vuyela endleleni leyinene. Dyondzo ya Bibele yi ni matimba, naswona vana a va nge hatliseli ku rivala leswi vatswari va vona va va leteleke swona.—Pisalema 19:7.