Swivutiso Swa Vahlayi

Xana nyoka leyi vulavuleke na Evha a yi ri ni milenge?

Hilaha swi tsariweke hakona eka Genesa 3:14, Yehovha Xikwembu u vulavule ni nyoka leyi kanganyiseke Evha entangeni wa Edeni. Xikwembu xi te: “U rhukaniwile eka swifuwo hinkwaswo ni le ka swivandzana hinkwaswo swa nhova hikwalaho ka leswi u swi endleke. U ta famba hi khwiri naswona u ta dya ntshuri vutomi bya wena hinkwabyo.” Bibele a yi vuli hi ku kongoma leswaku xikokovi lexi tirhisiweke ku ringa Evha xi tshame xi va ni milenge kambe se a xi nga ha ri na yona. Hambileswi ndlela leyi mhaka yi vekiweke ha yona eka Genesa 3:14 yi nga endlaka leswaku van’wana va ehleketa tano, a hi fanelanga hi gimeta hileswaku tinyoka a ti ri ni milenge loko ti nga si rhukaniwa. Hikwalaho ka yini?

Ngopfu-ngopfu hileswi xigwevo xa Yehovha a xi kongomisiwe eka Sathana—xivumbiwa xa moya lexi nga vonakiki lexi tirhiseke xikokovi xexo lexi solekeke hi ndlela yo biha. Bibele yi hlamusela Sathana tanihi “tata wa mavunwa” ni “nyoka ya khale.” Swi tikomba tinhlamuselo leti hatimbirhi ti kombetela eka ku tirhisiwa ka xikokovi lexi vonakaka, ku nga nyoka hi Sathana, tanihi muvulavuleri wakwe leswaku xi kanganyisa Evha leswaku a nga yingisi xileriso xa Xikwembu.—Yohane 8:44; Nhlavutelo 20:2.

Xikwembu xi vumbe tinyoka, naswona swi tikomba Adamu a thye tinyoka mavito ya tona emahlweni ka xiendlo xa Sathana xo kanganyisa. Nyoka leyi nga anakanyiki leyi vulavuleke na Evha a yi nga fanelanga yi soriwa. A yi nga swi tivi leswaku a yi tirhisiwa hi Sathana, naswona a yi nga xi twisisi xigwevo lexi Xikwembu xi xi byeleke lava nga yingisangiki.

Kutani ha yini Xikwembu xi vulavule hi xivumbeko xa nyoka lexi solekeke? Swiendlo swa nyoka swa ntumbuluko, ku famba hi khwiri ni ku humesa-humesa ririmi ra yona onge hiloko yi lava ku nantswa ritshuri, swi xi fanekisela kahle xiyimo xa Sathana xa ku tsongahatiwa. Hambileswi a tshameke a va ni xikhundlha lexi tlakukeke tanihi un’wana wa tintsumi ta Xikwembu, sweswi u chicheriwe exiyin’weni lexi nga nyawuriki lexi eBibeleni xi vuriwaka Thatharasi.—2 Petro 2:4.

Ku tlula kwalaho, ku fana ni nyoka ya xiviri leyi nga lumaka xirhendze xa munhu, Sathana a a ta “luma xirhendze” xa “mbewu” ya Xikwembu a ri exiyin’weni xa ku tsongahatiwa. (Genesa 3:15) Xiphemu lexikulu xa mbewu yoleyo ku ve Yesu Kreste, loyi a xanisiweke swa xinkarhana hi vayimeri va Sathana. Kambe eku heteleleni nhloko ya nyoka yo fanekisela yi ta pfotlosiwa hi ku helela hi Kreste ni vanghana vakwe lava totiweke lava nga Vakreste lava pfuxiweke. (Varhoma 16:20) Xisweswo, ndzhukano lowu Xikwembu xi wu kongomiseke eka nyoka leyi vonakaka wu xi kombise kahle xiyimo xa ku tsongahatiwa ni ku lovisiwa ko hetelela ka “nyoka ya khale” leyi nga vonakiki, Sathana Diyavulosi.