“Xana Wa Ri Tiva Vito Ra Xikwembu?”

XIVUTISO xexo xi tsakise wansati un’wana wa le dzonga vupela-dyambu bya le Asia Xikarhi. Xivutiso xexo xi humelele eka xifunengeto xa nkandziyiso wa magazini wa hina wa Xalamuka! ya February 8, 2004. Wansati loyi u tsalele vakandziyisi va wona a ku: “To ho suka ntsena, ndzi sungule ku tsakela magazini wa n’wina naswona wu ndzi pfune ku anakanyisisa hi misinya ya milawu leyinene ya mahanyelo. Ndzi sungule ku va ni langutelo lerinene hi vutomi. Ndzi byela un’wana ni un’wana malunghana ni Xikwembu xa hina ni ku rhula loku tisiwaka hi vutivi lebyi.”

Etindhawini to tala, entiyisweni, “endhawini ya le kule swinene ya misava,” vanhu va sungula ku ri tolovela vito ra Xikwembu, ku nga Yehovha. (Mintirho 1:8) Hi xikombiso, vito leri hi Xiturkmen, Yehowa, u nga ri kuma hi ku olova eka vuhundzuluxeri bya Xiturkmen bya Matsalwa yo Kwetsima. Pisalema 8:1 yi hlayekisa xileswi: “Yehovha Hosi ya hina, vito ra wena i rikulu swinene emisaveni hinkwayo!”

Leswaku wansati loyi a kota ku dyondza leswi engetelekeke hi Yehovha Xikwembu, u kombele kopi ya broxara leyi nga ni matluka ya 32 leyi nge Vito Ra Xikwembu Leri Nga Ta Tshama Hi Masiku. Na wena u nga yi kombela broxara leyi eka un’wana wa Timbhoni ta Yehovha.