Yehovha U Teka Ku Yingisa Ka Wena Ku Ri Ka Nkoka

“N’wananga, tlhariha u tsakisa mbilu yanga.”—SWIVURISO 27:11.

1. I moya wihi lowu teleke eka vanhu va namuntlha?

MOYA wa ku tilawula ni ku nga yingisi wu tele emisaveni namuntlha. Muapostola Pawulo u hlamusele xivangelo xa kona eka papila ra yena leri yaka eka Vakreste va le Efesa, a ku: “Mi [tshame] mi famba eka swona hi ku ya hi mafambiselo ya swilo ya misava leyi, hi ku ya hi mufumi wa vulawuri bya moya, moya lowu sweswi wu tirhaka eka vana lava nga yingisiki.” (Vaefesa 2:1, 2) Ina, u nga ha vula leswaku Sathana Diyavulosi, “mufumi wa vulawuri bya moya,” u nghenise moya wa ku nga yingisi emisaveni hinkwayo. A a wu nghenisile ni hi lembe-xidzana ro sungula, naswona u wu nghenise swinene ku sukela loko a hlongoriwe etilweni hi nkarhi wa Nyimpi yo Sungula ya Misava.—Nhlavutelo 12:9.

2, 3. Hi ni swivangelo swihi swo yingisa Yehovha?

² Hambiswiritano, leswi hi nga Vakreste ha swi tiva leswaku Yehovha Xikwembu u faneriwa hi ku va hi n’wi yingisa hi mbilu hinkwayo hikuva i Muvumbi wa hina, Muhlayisi wa vutomi bya hina, Hosi leyi nga ni rirhandzu ni Mukutsuri wa hina. (Pisalema 148:5, 6; Mintirho 4:24; Vakolosa 1:13; Nhlavutelo 4:11) Vaisrayele va le nkarhini wa Muxe a va swi tiva leswaku Yehovha i Munyiki wa vona wa Vutomi ni Mukutsuri wa vona. Hikwalaho, Muxe u va byele leswi: “N’wina mi fanele mi khathalela ku endla hilaha Yehovha Xikwembu xa n’wina a mi leriseke hakona.” (Deteronoma 5:32) Ina, a va fanele va yingisa Yehovha. Kambe, va hatle va tshika ku yingisa Hosi ya vona.

³ I swa nkoka ku fikela kwihi leswaku hi yingisa Muvumbi wa vuako hinkwabyo? Xikwembu xi tshame xi byela muprofeta Samuwele leswaku a ya byela Hosi Sawulo marito lawa: “Ku yingisa swa antswa ku ri ni xitlhavelo.” (1 Samuwele 15:22, 23) Ha yini swi ri tano?

Ndlela Leyi Ku Yingisa ‘Swi Antswaka Ha Yona Ku Ri Ni Xitlhavelo’

4. Hi nga nyika Yehovha swo karhi hi ndlela yihi?

⁴ Leswi a nga Muvumbi, xilo xin’wana ni xin’wana lexi vonakaka lexi hi nga na xona i xa Yehovha. Loko swi ri tano, xana xi kona lexi hi nga n’wi nyikaka xona? Ina, hi nga n’wi nyika nchumu wa risima swinene. I yini nchumu wa kona? Nhlamulo hi nga yi kuma eka xitsundzuxo lexi landzelaka: “N’wananga, tlhariha u tsakisa mbilu yanga, leswaku ndzi ta angula loyi a ndzi tlhontlhaka.” (Swivuriso 27:11) Hi nga nyika Xikwembu ku yingisa ka hina. Hambileswi swiyimo  swa hina ni ndlela leyi hi kurisiweke ha yona swi hambanaka, loko hi yingisa, un’wana ni un’wana wa hina a nga nyikela nhlamulo eka xihehlo xo biha xa Sathana Diyavulosi xa leswaku vanhu a va nge tshembeki eka Xikwembu loko va langutane ni miringo. Rolero i lunghelo lerikulu swonghasi!

5. Ku nga yingisi ku n’wi khumba njhani Muvumbi? Kombisa.

⁵ Xikwembu xa khathala hi swiboho leswi hi swi endlaka. Loko hi nga xi yingisi swa xi khumba. Njhani? Xi twa ku vava loko xi vona munhu a teka goza leri nga riki ra vutlhari. (Pisalema 78:40, 41) A hi nge munhu la nga ni vuvabyi bya chukela a nga dyi swakudya leswi nga ni rihanyo leswi a byeriweke ku dya swona. Xana dokodela wa yena la khathalaka u ta titwa njhani? Hi nga tiyiseka leswaku Yehovha wa vaviseka loko vanhu va nga n’wi yingisi, hikuva wa byi tiva vuyelo bya ku honisa swileriso swa yena leswi hi faneleke hi swi endla leswaku hi hanya.

6. I yini leswi nga ta hi pfuna ku yingisa Xikwembu?

⁶ I yini lexi nga ta hi pfuna ha un’we-un’we leswaku hi yingisa? Swi fanerile leswaku un’wana ni un’wana wa hina a kombela eka Xikwembu “mbilu leyi yingisaka,” hilaha Hosi Solomoni a endleke hakona. U kombele mbilu yo tano leswaku a ta “xiya exikarhi ka leswinene ni leswo biha” leswaku a ta avanyisa Vaisrayele-kulobye. (1 Tihosi 3:9) Leswaku hi kota ku hambanisa leswinene ni leswo biha emisaveni leyi teleke moya wa ku nga yingisi hi fanele hi va ni “mbilu leyi yingisaka.” Xikwembu xi hi nyike Rito ra xona, minkandziyiso leyi pfunetaka ku twisisa Bibele, minhlangano ya Vukreste ni vakulu va vandlha lava khathalaka leswaku hi ta hlakulela “mbilu leyi yingisaka.” Xana hi ma tirhisa kahle malunghiselelo wolawo ya rirhandzu?

7. Ha yini Yehovha a kandziyisa ku yingisa ku ri ni switlhavelo?

⁷ Emhakeni leyi, tsundzuka leswaku enkarhini lowu hundzeke Yehovha u paluxele vanhu va yena va khale leswaku ku yingisa a swi ri swa nkoka swinene ku tlula switlhavelo swa swiharhi. (Swivuriso 21:3, 27; Hosiya 6:6; Matewu 12:7) Ha yini a swi ri tano kasi a ku ri Yehovha la leriseke vanhu va yena leswaku va nyikela switlhavelo swo tano? Munhu la nyikelaka xitlhavelo u xi nyikela hi xikongomelo xihi? Xana u xi endlela ku tsakisa Xikwembu? Kumbe u landzelela mihiva-hivani yo karhi ntsena? Loko mugandzeri a swi navela hakunene ku tsakisa Xikwembu, u ta tikarhatela ku yingisa swileriso swa xona hinkwaswo. Xikwembu a xi swi pfumali switlhavelo swa swiharhi, kambe ku yingisa ka hina i nchumu wa nkoka lowu hi nga xi nyikaka wona.

Xikombiso Lexi Nga Xitsundzuxo

8. Ha yini Xikwembu xi fularhele Sawulo leswaku a nga ha vi hosi?

⁸ Xiviko xa le Bibeleni xa Hosi Sawulo xi kandziyisa nkoka wa ku yingisa. Loko Sawulo a sungula ku fuma a a titsongahata, ‘a ri ntsongo ematihlweni ya yena.’ Kambe, endzhaku ka nkarhi, swiboho swa yena swi sungule ku lawuriwa hi ku tikukumuxa ni mianakanyo ya mavunwa. (1 Samuwele 10:21, 22; 15:17) Siku rin’wana, Sawulo a a fanele a ya lwa ni Vafilista. Samuwele u byele hosi leswaku yi n’wi rindza leswaku a ta endlela Yehovha switlhavelo ni ku yi nyika swileriso leswi engetelekeke. Kambe, Samuwele u hlwerile, hiloko vanhu va sungula ku hangalaka. Loko Sawulo a vona sweswo u “nyikel[e] xitlhavelo xo hisiwa.” Sweswo a swi n’wi tsakisanga Yehovha. Loko Samuwele a hetelele a fikile, hosi yi tiyimelerile hileswi yi nga yingisangiki, yi vula leswaku leswi Samuwele a hlweleke, yi ‘tisindzise’ ku nyikela xitlhavelo xo hisiwa leswaku yi ta tsakeriwa hi Yehovha. Eka Hosi Sawulo, ku nyikela xitlhavelo xolexo a swi ri swa nkoka swinene ku tlula ku yingisa nkongomiso lowu a wu kumeke wa leswaku a rindza Samuwele leswaku a ta endla xitlhavelo xexo. Samuwele u n’wi byele leswi: “U endle vuphukuphuku. A wu xi hlayisanga xileriso xa Yehovha Xikwembu xa wena lexi a ku leriseke xona.” Ku nga yingisi Yehovha ku vangele Sawulo leswaku a lahlekeriwa hi vuhosi bya yena.—1 Samuwele 10:8; 13:5-13.

9. Sawulo u swi kombise njhani leswaku a ri ni mukhuva wa ku nga yingisi Xikwembu?

⁹ Xana hosi leyi yi dyondze swo karhi emhakeni leyi? Doo! Endzhakunyana Yehovha u lerise Sawulo leswaku a herisa rixaka ra Vaamaleke,  leri ri tshameke ri hlasela Vaisrayele va nga ri endlanga nchumu. Sawulo a a nga fanelanga a tsetselela hambi ku ri swifuwo swa vona. U yingisile hileswi a nga “dlaya Amaleke ku suka eHavhila ku ya fika eXure.” Loko Samuwele a ta hlangana na yona, hosi leyi a yi tsakile hileswi yi hluleke kutani yi ku: “Wena u katekisiwile hi Yehovha. Ndzi hetisise rito ra Yehovha.” Kambe, ematshan’weni yo yingisa swileriso leswi a swi ri erivaleni leswi va lerisiweke swona, Sawulo ni vanhu va yena va tsetselele Hosi Agaga swin’we ni “leswinene swa ntlhambi wa tinyimpfu ni swa ntlhambi wa tihomu ni le ka leswo nona ni . . . makhuna ni . . . hinkwaswo leswi a swi ri leswinene.” Hosi Sawulo u tiyimelerile hileswi a nga yingisangiki a ku: “Vanhu va ve ni ntsetselelo eka leswinene swa ntlhambi wa tinyimpfu ni ntlhambi wa tihomu, hi xikongomelo xa ku endlela Yehovha Xikwembu xa wena xitlhavelo.”—1 Samuwele 15:1-15.

10. I dyondzo yihi leyi Sawulo a tsandzekeke ku yi dyondza?

¹⁰ Hi nkarhi wolowo, Samuwele u byele Sawulo a ku: “Xana Yehovha u tsakisiwa hi magandzelo yo hisiwa ni switlhavelo ku fana ni ku yingisa rito ra Yehovha? Waswivo! Ku yingisa swa antswa ku ri ni xitlhavelo, ku nyikela nyingiso ku ri ni mafurha ya makhuna.” (1 Samuwele 15:22) Leswi Yehovha a a endle xiboho xa leswaku swiharhi swoleswo swi lovisiwa, a swi nga amukeleki ku endla ha swona switlhavelo.

Yingisa Eka Swilo Hinkwaswo

11, 12. (a) Yehovha u ma languta njhani matshalatshala ya hina yo n’wi tsakisa evugandzerini bya hina? (b) Munhu a nga tixisa hi ku anakanya leswaku u endla ku rhandza ka Xikwembu kasi entiyisweni u le ku dyoheni hi ndlela yihi?

¹¹ Yehovha wa tsaka swinene loko a vona malandza ya yena yo tshembeka ma tshama ma tiyile ku nga khathariseki nxaniso, ma chumayela hi Mfumo hambiloko vanhu va nga yingisi naswona ma ya eminhlanganweni ya Vukreste hambiloko ma boheka ku tirha leswaku ma hanya! Ku yingisa ka hina etimhakeni to tano ta nkoka ta swilo swa moya swi tsakisa mbilu ya yena! Matshalatshala ya hina yo gandzela Yehovha i ya risima eka yena loko hi ma endla hikwalaho ka rirhandzu. Vanhu va nga ha honisa ntirho wa hina wa matimba, kambe Xikwembu xa swi xiya switlhavelo swa hina leswi humaka embilwini naswona xa swi tsundzuka.—Matewu 6:4.

¹² Hambiswiritano, leswaku hi tsakisa Xikwembu hi ku helela, hi fanele hi xi yingisa eka swilo hinkwaswo evuton’wini. A hi fanelanga hi tixisa hi ku anakanya leswaku hi nga tlula milawu yin’wana ya Xikwembu ntsendze loko hi nga yi tlulanga yin’wana. Hi xikombiso, munhu a nga ha tixisa hi ku anakanya leswaku loko a gandzelela ku hetisa nawu, a nge xupuriwi loko a tikhome hi ndlela yo biha hi tlhelo ra rimbewu kumbe  a endla swidyoho swin’wana leswikulu. Xexo ku ta va ku ri xihoxo!—Vagalatiya 6:7, 8.

13. Ku yingisa ka hina Yehovha ku nga ringiwa njhani loko hi ri exihundleni?

¹³ Hilaha ku faneleke hi nga tivutisa, ‘Xana ndzi yingisa Yehovha eka swilo leswi ndzi swi endlaka siku ni siku, ni le ka swilo leswi vonakaka swi ri swa le xihundleni?’ Yesu u te: “Munhu la tshembekeke eka leswitsongo wa tshembeka ni le ka swo tala, naswona munhu la nga lulamangiki eka leswitsongo a nga lulamanga ni le ka swo tala.” (Luka 16:10) Xana hi ‘famba-famba hi ku tshembeka ka mbilu ya hina’ hambiloko hi ri ‘endzeni ka yindlu ya hina,’ laha van’wana va nga hi voniki? (Pisalema 101:2) Ina, vutshembeki bya hina byi nga ha ringiwa loko hi ri endlwini ya hina. Ematikweni yo tala laha vanhu vo tala va nga ni tikhompyuta emakaya ya vona, swifaniso leswi thyakeke swi kumeka hi ku olova. Malembe ma nga ri mangani lama hundzeke, munhu a a nga ta swi vona swifaniso sweswo handle ka loko o ya etindhawini leti nga ni vuhungasi lebyi thyakeke. Xana hi ta ma yingisa hi mbilu hinkwayo marito ya Yesu lama nge: “Un’wana ni un’wana la tshamelaka ku languta wansati lerova a n’wi navela, ana se u endle vuoswi na yena embilwini yakwe”? Ina, xana hi ta ala hambi ku ri ku languta swifaniso leswi thyakeke? (Matewu 5:28; Yobo 31:1, 9, 10; Pisalema 119:37; Swivuriso 6:24, 25; Vaefesa 5:3-5) Ku vuriwa yini hi minongonoko ya TV leyi nga ni madzolonga? Xana hi twanana ni Xikwembu xa hina, lexi moya-xiviri wa xona wu ‘vengaka un’wana ni un’wana la rhandzaka madzolonga hakunene’? (Pisalema 11:5) Kumbe ku vuriwa yini hi ku tirhisiwa ngopfu ka xihoko exihundleni? Bibele ya byi sola vudakwa, kambe yi tlhela yi tsundzuxa Vakreste leswaku va nga swi endli mukhuva ku nwa “vhinyo yo tala.”—Tito 2:3; Luka 21:34, 35; 1 Timotiya 3:3.

14. Hi tihi tindlela tin’wana leti hi nga kombisaka leswaku hi yingisa Xikwembu ha tona eka swa timali?

¹⁴ Mhaka yin’wana leyi hi faneleke hi tivonela eka yona i ya swa timali. Hi xikombiso, xana hi nga hlanganyela eka marhengu yo fuwa hi ku hatlisa lama fanaka ni vukanganyisi? Xana hi ringeka ku tirhisa tindlela leti nga riki enawini leswaku hi nga hakeli swibalo? Kumbe, ematshan’weni yo endla tano, hi xi yingisa hi ku tshembeka xileriso xa leswaku hi “[nyika] hinkwavo timfanelo ta vona, loyi a lavaka xibalo [hi] n’wi [nyika] xibalo”?—Varhoma 13:7.

Ku Yingisa Loku Susumetiwaka Hi Rirhandzu

15. Ha yini u yingisa swileriso swa Yehovha?

¹⁵ Ku yingisa milawu ya Xikwembu ya mahanyelo swi tisa mikateko. Hi xikombiso, loko hi papalata ku dzaha fole, hi va ni mahanyelo lamanene naswona hi xixima ku kwetsima ka ngati, hi nga ha papalata ku ngheniwa hi mavabyi yo karhi. Ku engetela kwalaho, loko hi hanya hi ku pfumelelana ni ntiyiso wa le Bibeleni etimhakeni tin’wana ta vutomi bya hina, hi nga tirhisa mali hi vutlhari, hi va ni ku rhula ni vanhu van’wana, kumbe ni le mindyangwini ya hina. (Esaya 48:17) Vuyelo byin’wana ni byin’wana byo tano lebyi vonakaka, swi ta va swi fanerile loko byi tekiwa tanihi mikateko leyi kombisaka leswaku milawu ya Xikwembu ya tirha. Hambiswiritano, xivangelo lexikulu lexi endlaka hi yingisa Yehovha hileswaku ha n’wi rhandza. A hi tirheli Xikwembu hikwalaho ka swivangelo swa vutianakanyi. (Yobo 1:9-11; 2:4, 5) Xikwembu xi hi nyike ntshunxeko wo hlawula ku yingisa munhu loyi hi lavaka ku n’wi yingisa. Hi hlawula ku yingisa Yehovha hileswi hi lavaka ku n’wi tsakisa ni hileswi hi lavaka ku endla leswinene.—Varhoma 6:16, 17; 1 Yohane 5:3.

16, 17. (a) Yesu u xi yingise njhani Xikwembu hikwalaho ka rirhandzu leri enteke? (b) Hi nga n’wi tekelela njhani Yesu?

¹⁶ Yesu u veke xikombiso lexi hetisekeke hi ku yingisa Yehovha hikwalaho ka leswi A a n’wi rhandza hi ndlela leyi enteke. (Yohane 8:28, 29) Loko a ha ri emisaveni, Yesu “u dyondze ku yingisa eka swilo leswi a xanisekeke ha swona.” (Vaheveru 5:8, 9) Njhani? Yesu “u titsongahatile kutani a yingisa ku ya fika eku feni, ina, rifu emhandzini ya nxaniso.” (Vafilipiya 2:7, 8) Hambileswi ku nga khale Yesu a yingisa etilweni, ku yingisa ka yena ku tlhele ku ringiwa emisaveni. Hi nga tiyiseka leswaku Yesu u swi fanelekela hi  tindlela hinkwato ku va Muprista Lonkulu wa vamakwavo va yena va moya swin’we ni vanhu van’wana lava pfumelaka.—Vaheveru 4:15; 1 Yohane 2:1, 2.

¹⁷ Ku vuriwa yini hi hina? Hi nga tekelela Yesu hi ku endla ku rhandza ka Xikwembu minkarhi hinkwayo. (1 Petro 2:21) Hi nga eneriseka loko ndlela leyi hi rhandzaka Xikwembu ha yona yi hi susumetela ku endla leswi Yehovha a swi lerisaka, hambi ku ri eminkarhini leyi hi tshikilelekeke kumbe hi ringekaka ku endla leswi hoxeke. (Varhoma 7:18-20) Leswi swi katsa ku tiyimisela ka hina ku yingisa swileriso swa lava rhangelaka evugandzerini bya ntiyiso, hambileswi va nga hetisekangiki. (Vaheveru 13:17) Ku yingisa ka hina swileriso swa Yehovha loko hi ri hexe i swa risima ematihlweni ya yena.

18, 19. Ku yingisa Xikwembu swi huma embilwini swi tisa vuyelo byihi?

¹⁸ Namuntlha, ku yingisa ka hina Yehovha ku nga ha katsa ku tiyisela nxaniso leswaku hi ta tshama hi tshembekile. (Mintirho 5:29) Nakambe, ku yingisa ka hina xileriso xa Yehovha xo chumayela ni ku dyondzisa swi lava leswaku hi tiyisela ku fika emakumu ya mafambiselo lawa ya swilo. (Matewu 24:13, 14; 28:19, 20) Hi fanele hi tiyisela leswaku hi ta hambeta hi hlanganyela swin’we ni vamakwerhu, hambiloko mintshikilelo ya misava leyi yi hi tikela. Xikwembu xa hina lexi nga ni rirhandzu xi ma vona kahle matshalatshala ya hina yo yingisa etimhakeni to tano. Hambiswiritano, leswaku hi yingisa hi ku hetiseka, hi fanele hi lwisana ni nyama ya hina leyi nga ni xidyoho kutani hi fularhela leswo biha, hi hlakulela ku rhandza leswinene.—Varhoma 12:9.

¹⁹ Loko hi tirhela Yehovha hikwalaho ka leswi hi n’wi rhandzaka ni hi mbilu leyi teleke ku tlangela, eka hina u va “muhakeri wa lava va [n’wi] lavaka hi mbilu hinkwayo.” (Vaheveru 11:6) Switlhavelo leswi faneleke swa laveka naswona swa tsakisa, kambe lexi tsakisaka Yehovha hi ku helela i ku n’wi yingisa hileswi hi n’wi rhandzaka.—Swivuriso 3:1, 2.

A Wu Ta Hlamurisa Ku Yini?

• Ha yini hi nga vulaka leswaku hi ni nchumu lowu hi nga wu nyikaka Yehovha?

• Sawulo u endle swihoxo swihi?

• U nga swi kombisa njhani leswaku wa pfumela leswaku ku yingisa swi antswa ku tlula switlhavelo?

• I yini lexi ku susumetelaka ku yingisa Yehovha?

[Swivutiso Swa Dyondzo]

[Xifaniso lexi nga eka tluka 26]

Dokodela la khathalaka a a ta titwa njhani hi muvabyi la nga swi yingisiki leswi a n’wi byelaka swona?

[Xifaniso lexi nga eka tluka 28]

Ha yini Hosi Sawulo a tivangele ku nga tsakeriwi hi Yehovha?

[Xifaniso lexi nga eka tluka 30]

Xana wa swi yingisa swileriso swa Xikwembu loko u ri wexe ekaya ka wena?