Tidyondzo Ta Nkoka Eka Vana

GLADYS u tirha exikolweni xa le Mendoza, eArgentina. Siku rin’wana loko a ri karhi a hundza ekusuhi ni tlilasi yin’wana, u xiye mudyondzisi a ri karhi a hlayela swichudeni swa yena swa gredi ya vumune buku leyi nge Buku Yanga Ya Timhaka Ta Bibele. * Gladys u titivisile eka mudyondzisi leswaku i Mbhoni ya Yehovha kutani a n’wi byela leswaku a nga swi tsakela ku n’wi komba ndlela leyi buku leyi yi nga n’wi pfunaka ha yona. Hi ku tsakisiwa hi leswi Gladys a n’wi byeleke swona, mudyondzisi u lave leswaku buku leyi yi katsiwa eka tibuku ta xikolo. Hambiswiritano, u lave mpfumelelo eka vafambisi va xikolo. U tsakile loko xikombelo xa yena xi amukeriwa.

Hi ku famba ka nkarhi, hi Siku ro Hlaya Tibuku, mudyondzisi u avele swichudeni swa yena leswaku swi hlaya ndzima yin’we ya buku emahlweni ka swichudeni-kulobye. Hikwalaho ka vuyelo lebyinene lebyi veke kona hi ku khutaza vana ku hlaya, mudyondzisi u rhambiwile leswaku a va kona eka wun’wana wa minongonoko ya thelevhixini ya kwalaho. Loko ku vulavuriwa hi ku tikhoma ka vana va xikolo, mufambisi wa nongonoko u vutise mudyondzisi a ku, “I yini lexi u xi endlaka leswaku vana va wena va tikhoma kahle etlilasini?” Mudyondzisi u hlamusele leswaku u tirhisa Buku Yanga Ya Timhaka Ta Bibele. U vule leswaku hambileswi a nga dyondzisiki tidyondzo ta vukhongeri etlilasini ya yena, buku leyi yi n’wi pfunile leswaku a dyondzisa swichudeni swa yena ku va ni mahanyelo lamanene yo tanihi xichavo, ku rivalela, ku va ni vun’we, ku tirhisana, ku yingisa ni ku rhandzana. Hinkwavo va pfumerile leswaku dyondzo leyi vana va dyondzisiwaka yona i ya nkoka.

Xana wa swi lava ku dyondzisa vana va wena mahanyelo yo tano lamanene? U nga kombela Buku Yanga Ya Timhaka Ta Bibele eka Timbhoni ta Yehovha.

[Nhlamuselo ya le hansi]