Swivutiso Swa Vahlayi

Hikwalaho ka yini Hosi Sawulo a vutise Davhida a ku, “U n’wana wa mani, wena mufana?” endzhaku ka loko Davhida a dlaye Goliyadi, hambileswi emahlweni ka sweswo Sawulo a a rhumele rito leswaku ku landziwa Davhida a ta n’wi tirhela?—1 Samuwele 16:22; 17:58.

Swi nga ha endleka Sawulo a a rivele leswaku Davhida i mani hikwalaho ka leswi va vonaneke swa xinkarhana loko va hlangana ro sungula. Hambiswiritano, leswi a swi twisiseki hikuva 1 Samuwele 16:18-23 yi kombisa leswaku Hosi Sawulo u lerise hi ku kongoma leswaku ku ya landziwa Davhida leswaku a ta n’wi tirhela, naswona u sungule ku n’wi rhandza swinene kutani a n’wi endla murhwali wa swihlomo swakwe swa nyimpi. Sawulo a a n’wi tiva kahle Davhida.

Swidyondzi swin’wana swa Bibele swi vula leswaku 1 Samuwele 17:12-31 na 17:55–18:5 yi hundzuluxeriwe endzhaku hikuva tindzimana leti a ti kumeki eka vuhundzuluxeri byin’wana bya Xigriki bya Septuagint, ni le ka vuhundzuluxeri bya Matsalwa ya Xiheveru lebyi hetiweke ku tsariwa hi lembe-xidzana ra vumbirhi B.C.E. Hambiswiritano, a hi vutlhari ku endla xiboho xo tano hi titshege hi leswi vuriweke eka matsalwa ya Septuagint ntsena, hikuva tindzimana leti ta kumeka eka Matsalwa man’wana yo kwetsima ya Xiheveru lama tshembekaka. *

Swi vonaka onge loko Sawulo a vutisa Abinere ku sungula ivi endzhakunyana a vutisa Davhida, a a nga lavi ku tiva vito ra tata wa Davhida. Sawulo a a lava ku tiva leswaku i wanuna wa muxaka muni loyi a kuriseke mufana loyi hileswi a voneke mfanelo yin’wana ya Davhida, ku nga ripfumelo ra yena lerikulu ni xivindzi lexi a a ri na xona loko a ha ku hlula Goliyadi. Swi nga ha endleka leswaku Sawulo a anakanya ku hoxa Yese, tata wa Davhida, kumbe swirho swin’wana swa ndyangu wa yena eka vuthu ra yena ra nyimpi, hi ku anakanya leswaku na vona va ni xivindzi ku fana na Davhida.

Hambileswi 1 Samuwele 17:58 yi katsaka nhlamulo yo koma ya Davhida leyi nge “ndzi n’wana wa nandza wa wena Yese lowa le Betlehema,” loko tsalwa leri ri ya emahlweni ri kombisa leswaku bulo ra vona a ri helelanga kwalaho. Eka mhaka leyi, C. F. Keil na F. Delitzsch va ri: “Swi le rivaleni leswaku eka marito lama tsariweke eka [1 Samuwele 18:1], lama nge ‘loko a hete ku vulavula na Sawulo,’ Sawulo u ye emahlweni a vulavula na yena [Davhida] a lava ku tiva hi ta ndyangu wa ka vona, tanihi leswi marito wolawo ma kombisaka leswaku va burisane nkarhi wo leha.”

Eka vumbhoni lebyi hinkwabyo, hi nga gimeta hi leswaku loko Sawulo a lava ku tiva leswaku, “U n’wana wa mani, wena mufana?” a a nga lavi ku tiva Davhida hikuva ana se a n’wi tiva, kambe a lava ku tiva ndlela leyi a kurisiweke ha yona.

[Nhlamuselo ya le hansi]

[Xifaniso lexi nga eka tluka 31]

Hikwalaho ka yini Sawulo a vutise Davhida leswaku i n’wana wa mani?