Xana Xikwembu Xa Ku Vona?

XANA Yehovha, Mutumbuluxi Lonkulu, wa swi kota ku vona ke? Ina, wa swi kota! Bibele yi swi veka kahle loko yi ku: “Loyi a vumbaka tihlo, xana a nge voni?” (Pisalema 94:9) Ndlela leyi Yehovha a vonaka ha yona yi hambane swinene ni ya vanhu. Hambileswi a kotaka ku vona ku languteka ka hina ka le handle kambe u tlhela a va “mukambisisi wa timbilu” naswona wa swi kota ku “pimanyeta timbilu.” (Swivuriso 17:3; 21:2) Ina, u na byona vuswikoti byo vona leswi hi swi ehleketaka, minsusumeto ya hina ni leswi hi swi navelaka.

Yehovha wa swi lemuka swiphiqo leswi hi langutanaka na swona evuton’wini, naswona wa swi hlamula swikombelo swa hina. Mupisalema u tsarile: “Mahlo ya Yehovha ma le henhla ka lavo lulama, ni tindleve takwe ti yingisa xirilo xa vona xo kombela mpfuno. Yehovha u le kusuhi ni lava va tshovekeke mbilu; ni lava va pfotlokeke emoyeni wa va ponisa.” (Pisalema 34:15, 18) Swa hi chavelela ku tiva leswaku Yehovha wa swi twisisa swiyimo swo tika leswi hi langutanaka na swona naswona u tiyimisele ku yingisa swikhongelo swa hina leswi humaka embilwini!

Yehovha Xikwembu wa swi vona swilo leswi hi swi endlaka exihundleni. Ina, “swilo hinkwaswo swi lo dla, swi paluxeka erivaleni ematihlweni ya loyi hi nga ta tihlamulela eka yena.” (Vaheveru 4:13) Xikwembu xi vona swilo hinkwaswo leswi hi swi endlaka hambi swi lulamile kumbe a swi lulamanga. (Swivuriso 15:3) Hi xikombiso, Genesa 6:8, 9 yi kombisa leswaku “Nowa [u kume] tintswalo ematihlweni ya Yehovha,” nileswaku a a “famba ni Xikwembu xa ntiyiso.” Ina, Nowa u amukeriwile hi Yehovha a tlhela a kuma mikateko leyi humaka eka yena hikwalaho ka leswi a yingiseke ni ku hanya hi ku landza misinya ya milawu ya Xikwembu leyinene. (Genesa 6:22) Ku hambana na Nowa, vanhu lava a va hanya enkarhini wa yena a va ri ni vukarhi ni mahanyelo yo biha. Xikwembu a xi swi vona swiendlo swa vona. Xi “von[e] leswaku vubihi bya munhu byi andzile emisaveni nileswaku mboyamelo hinkwawo wa miehleketo ya mbilu yakwe wu bihile nkarhi hinkwawo.” Hiloko Yehovha a lovisa vanhu hinkwavo lava a va endla swilo swo biha kambe a ponisa Nowa ni ndyangu wa yena.—Genesa 6:5; 7:23.

Xana Yehovha u ta ku amukela? Ina, mahlo ya Yehovha ma “famba-famba emisaveni hinkwayo leswaku a kombisa ntamu wakwe eka lava mbilu ya vona yi hetisekeke eka yena.” (2 Tikronika 16:9) Ku nga ri khale u ta tlhela a susa hinkwavo lava endlaka vubihi emisaveni kutani a kutsula vanhu vo rhula.—Pisalema 37:10, 11.