Ndlela Leyi U Nga Pfunaka N’wana Wa Wena Ha Yona Leswaku A Rhandza Xikwembu

NAMUNTLHA swa tika swinene ku va munhu a hlakulela vuxaka lebyikulu na Yehovha Xikwembu. (Pisalema 16:8) Hilaha ku profetiweke hakona, hi hanya “[eminkarhini] ya mangava leyi swi nonon’hwaka ku langutana na yona.” Vanhu vo tala hi “lava rhandzaka mintsako ku ri ni ku rhandza Xikwembu.” (2 Timotiya 3:1-5) Ina, vanhu lava rhandzaka Xikwembu hakunene emisaveni namuntlha va kala.

Leswaku n’wana a rhandza Xikwembu a swi tiendlekeli. Vana va hina va fanele va pfuniwa leswaku va rhandza Yehovha Xikwembu. Hi nga swi endlisa ku yini leswi?

Ku Vulavurisana Hi Ku Ntshunxeka

Hi nga pfuna vana va hina leswaku va rhandza Xikwembu loko hina hi hexe hi xi rhandza swinene. (Luka 6:40) Bibele ya swi kombisa sweswo loko yi ku: “U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi matimba ya wena lamakulu hinkwawo. Marito lawa ndzi ku lerisaka wona namuntlha ma fanele ma va embilwini ya wena; u fanele u ma dyondzisa n’wana wa wena hi ku phindha-phindha.”—Deteronoma 6:4-7.

Hi nga n’wi pfuna njhani n’wana wa hina leswaku a rhandza Xikwembu? Xo sungula, hi fanele hi tiva leswi nga embilwini ya n’wana wa hina. Xa vumbirhi, hi fanele hi kombisa leswi nga embilwini ya hina.

Loko Yesu Kreste a ri endleleni yo ya aEmawusi a ri ni vadyondzisiwa va yena vambirhi, u rhange a va khutaza leswaku va phofula ntshembo wa vona ni leswi a swi va karhata. Yesu u rhange a va yingisela ivi a lulamisa ndlela leyi a va ehleketa ha yona hi ku va hlamusela Matsalwa. Endzhakunyana va te: “Xana timbilu ta hina a ti nga pfurhi loko a ri karhi a vulavula na hina?” Bulo rolero a ri ri xikombiso xa ku vulavurisana hi ku ntshunxeka. (Luka 24:15-32) Hi nga yi vona njhani ndlela leyi n’wana wa hina a titwaka ha yona?

Vatswari van’wana lava vana va vona se va kuleke kumbe va nga le kusuhi ni ku va vanhu lavakulu naswona va nga swikombiso leswinene evandlheni va ha ku vutisiwa malunghana ni ku vulavurisana hi ku ntshunxeka. Hi xikombiso, Glen wa le Mexico u ni vana va mune lava se va kuleke. * U ri: “Ku vulavurisana hi ku ntshunxeka exikarhi ka vatswari ni vana a swi tiendlekeli. Mina ni nsati wa mina hi tshika ku endla swilo leswi nga riki swa nkoka ngopfu leswaku hi tinyika nkarhi wa ku va ni vana va hina. Loko va ha ri emalembeni ya kondlo-a-ndzi-dyi, minkarhi yin’wana a hi xuxa na vona hi vulavula hi mhaka yin’wana ni yin’wana leyi a va lava ku vulavula ha yona. Naswona loko hi yingisela mabulo ya vona hi nkarhi wa swakudya, a hi xiya swiphiqo eka langutelo kumbe eka mahanyelo ya vona kutani hi lulamisa mboyamelo wo biha, hakanyingi vona va nga swi xiyi.”

Nakambe ku vulavurisana hi ku ntshunxeka swi katsa ku kombisa leswi nga le mbilwini ya hina. Yesu u te: “Munhu lonene u humesa leswinene exumeni lexinene xa mbilu yakwe, . . . hikuva nomu wakwe wu vulavula hi ku tala ka mbilu.” (Luka 6:45) Toshiki, loyi vana vakwe vanharhu va nga vatirheli va nkarhi hinkwawo le Japani u ri: “Ndzi va byele ko tala leswaku ha yini ndzi sungule ku va ni ripfumelo eka Yehovha—ndlela leyi ndzi pfumeleke ha yona hi mbilu ya mina hinkwayo leswaku u kona ni ndlela leyi swilo leswi ndzi humeleleke evuton’wini swi ndzi khorwiseke ha yona leswaku Bibele yi vulavula ntiyiso naswona i nkongomiso lowunene evuton’wini.” Cindy wa le Mexico u ri: “Nuna wa mina a a khongela ni vana va hina minkarhi hinkwayo. Loko va twe marito ya yena lama humaka embilwini, va swi xiyile leswaku Yehovha a a ri wa xiviri.”

Ndlela Leyi Xikombiso Xa Vatswari Xi Pfunaka Ha Yona

Ndlela leyi hi tikhomaka ha yona yi va khumba swinene vana ku tlula leswi hi swi vulaka, hikuva yi va kombisa ndlela leyi hi rhandzaka Xikwembu ha yona. Loko vanhu va xiya ndlela leyi Yesu Kreste a n’wi yingiseke ha yona Yehovha, va nga swi vona  leswaku a a xi rhandza swinene Xikwembu. Yesu u te: “Ku endlela leswaku misava yi swi tiva leswaku ndza n’wi rhandza Tatana, ndzi endla hilaha Tatana a ndzi leriseke ku endla hakona.”—Yohane 14:31.

Gareth, loyi a nga Mbhoni ya Yehovha ya le Wales, u ri: “Vana va hina va fanele va swi vona leswaku ha n’wi rhandza Yehovha naswona hi ringeta ku endla swilo hi ndlela ya yena. Hi xikombiso, loko ndzi pfumela swihoxo swa mina, vana va mina va swi xiya leswaku ndzi yingisa leswi Xikwembu xi hi byelaka swona. Sweswi vana va mina na vona va ringeta ku endla leswi fanaka.”

Greg, wa le Australia u ri: “A hi lava leswaku vana va hina va swi vona leswaku ntiyiso i nchumu wa nkoka swinene evuton’wini bya hina. Loko hi endla swiboho malunghana ni ntirho kumbe vuhungasi, hi rhanga hi kambisisa ndlela leyi vutihlamuleri bya hina bya Vukreste byi nga ta khumbeka ha yona. Swa hi tsakisa ku xiya leswaku n’wana wa hina wa nhwanyana wa malembe ya 19 hi vukhale na yena u endla leswi fanaka leswaku ntirho wa yena wa vuphayona bya nkarhinyana wu nga kavanyeteki.”

Ku Pfuna Vana Va Hina Leswaku Va Twisisa Xikwembu

A hi nge rhandzi kumbe ku tshemba munhu loyi hi nga n’wi twisisiki. Loko muapostola Pawulo a lave leswaku Vakreste va le Filipiya va antswisa ndlela leyi a va rhandza Yehovha ha yona, u tsarile: “Leswi ndzi hambetaka ndzi swi khongelela hi leswi, leswaku rirhandzu ra n’wina ri ya ri andza ngopfu hi vutivi lebyi kongomeke ni ku twisisa loku heleleke.” (Vafilipiya 1:9) Falconerio wa le Peru, loyi a kurisaka vana va mune, u ri: “Ku hlaya Bibele na vona nkarhi na nkarhi swi tiyisa ripfumelo ra vona. Minkarhi yin’wana a ndzi tsandzeka ku hlaya na vona, kutani ndzi vone leswaku ndlela leyi va rhandzaka Xikwembu ha yona ya tsana.” Gary wa le Australia u ri: “Hakanyingi ndzi komba vana va mina vumbhoni bya leswaku vuprofeta bya le Bibeleni bya hetiseka. Ndzi tlhela ndzi va komba vuyelo lebyinene bya ku tirhisa misinya ya milawu ya le Bibeleni. Ku va ni dyondzo ya ndyangu ya Bibele ya nkarhi na nkarhi hi swona swi pfuneke swinene ku tiyisa ripfumelo ra vona.”

N’wana u kota ku dyondza kahle loko dyondzo yi khomiwa hi ku ntshunxeka naswona yi tsakisa kambe yi va leyi xiximekaka. (Yakobo 3:18) Shawn na Pauline va le Britain, lava nga ni vana va mune va ri: “Hi nkarhi wa dyondzo ya ndyangu ya Bibele  a hi ringeta leswaku hi nga va khahli vana va hina, hambiloko va sungula ku tsaka ku tlula mpimo. Dyondzo leyi a hi yi fambisa hi tindlela to hambana-hambana. Minkarhi yin’wana a hi byela vana leswaku va hlawula mhaka leyi hi nga ta dyondza ha yona. A hi tirhisa tivhidiyo leti humesiweke hi nhlengeletano ya Yehovha. Minkarhi yin’wana a hi tlanga xiyenge xo karhi hi xi phindha-phindha kumbe hi yimisa vhidiyo leswaku hi ta burisana hi mhaka ya kona.” Kim, manana loyi na yena a nga wa le Britain u ri: “Ndzi lunghiselela dyondzo ya ndyangu hi vukheta leswaku ndzi ta kota ku vutisa swivutiso leswi nga ta tlhontlha mianakanyo ya vana va mina. Ha swi tsakela ku dyondza. Loko hi ri karhi hi dyondza hi hleka swinene.”

Ku Hlawula Vanghana

Vana va hina swi nga va olovela swinene ku rhandza Yehovha ni ku tlangela vugandzeri bya ntiyiso loko va hanya ni vanhu lava nga vanghana va Xikwembu. Ku kuma vanghana lava vana va hina va nga vuyeriwaka hi ku burisana na vona ni ku tlanga na vona swi nga ha lava matshalatshala. Kambe ku endla tano swa vuyerisa. Ku tlula kwalaho, vana va hina va nga vuyeriwa loko va hlangana ni Timbhoni ta Yehovha leti ngheneleke vutirheli bya nkarhi hinkwawo evuton’wini bya tona. Vo tala va nghenele vutirheli byebyo hikwalaho ko va ni xinghana ni malandza ya Xikwembu lama hisekaka. Makwerhu un’wana wa xisati la veke murhumiwa u ri: “Minkarhi yo tala vatswari va mina a va rhamba maphayona leswaku hi ta dya swakudya na wona. A swi ri erivaleni leswaku a va wu tsakela ntirho wa vona lerova ndzi tiyimisele ku tirhela Xikwembu hi ndlela yoleyo.”

Ina, langutelo ra vana va hina ri nga ha kuceteriwa hi ndlela leyinene ni hi ndlela yo biha. Hikwalaho khombo ra vanghana vo biha ri nga ringa vuswikoti bya hina tanihi vatswari. (1 Vakorinto 15:33) Swi lava vuswikoti ku dyondzisa vana ndlela yo papalata ku hungasa ni lava nga rhandziki Yehovha naswona va nga n’wi tiviki. (Swivuriso 13:20) Shawn loyi a tshahiweke eku sunguleni u ri: “Hi dyondzise vana va hina leswaku va hanyisana kahle ni vadyondzi-kulobye kambe vuxaka byebyo byi helela exikolweni. Vana va hina a va swi twisisa leswaku ha yini va nga fanelanga va hlanganyela eka swiendlakalo leswi endliwaka loko xikolo xi humile kumbe emintlangwini ya le xikolweni.”

Nkoka Wa Ku Va Letela

Loko hi letela vana va hina ku hlamusela van’wana leswi va swi pfumelaka, hi va pfuna leswaku va tsakela ku vulavula hi ndlela leyi va xi rhandzaka ha yona Xikwembu. Mark loyi a tshamaka eUnited States u ri: “A hi lava leswaku vana va hina va vafana va vona leswaku va nga swi tsakela ku byela van’wana hi leswi va swi pfumelaka nkarhi wihi na wihi, ku nga ri loko ntsena va ri ensin’wini. Kutani loko hi ya tihungasa kumbexana ephakini, eribuweni ra lwandle, kumbe ekhwatini, hi teka Bibele ni tibuku leti sekeriweke eBibeleni, kutani hi vulavula ni vanhu lava hi va kumaka kwalaho malunghana ni leswi hi swi pfumelaka. Vafana va hina va swi tsakela hakunene ku chumayela hi xitshuketa na hina hi ndlela yoleyo. Va hlanganyela ebulwini kutani va vulavula hi vupfumeri bya vona.”

Muapostola Yohane loyi se a a dyuharile u pfune vanhu vo tala leswaku va ya mahlweni va rhandza Xikwembu. U tsale leswi malunghana na vona: “Ndzi hava xivangelo lexikulu xa ku nkhensa ku tlula swilo leswi, ku twa leswaku vana va mina [va moya] va tama va famba entiyisweni.” (3 Yohane 4) Loko hi pfuna vana va hina leswaku va rhandza Xikwembu, na hina hi ta va ni ntsako lowu fanaka.

[Nhlamuselo ya le hansi]

[Swifaniso eka tluka 9]

Ku vulavurisana hi ku ntshunxeka hi leswi u swi pfumelaka a swi tiendlekeli

[Xifaniso eka tluka 10]

Letela vana va wena leswaku va vulavula hi ndlela leyi va xi rhandzaka ha yona Xikwembu

[N’wini wa Xifaniso]

Courtesy of Green Chimneys Farm