Ku Rhangisa Xikongomelo Xa Xikwembu Namuntlha

“[Kreste] u fele hinkwavo leswaku lava va hanyaka va nga ha tihanyeli.”—2 VAKORINTO 5:15.

1. Hlamusela ntokoto lowu murhumiwa un’wana a veke na wona loko a ri exiavelweni xa yena.

MURHUMIWA un’wana la vuriwaka Aaron * u ri: “Movha wa hina a ku ri wona wo sungula ku nghena emugangeni wun’wana laha Afrika loko nyimpi ya xin’wana-manana yi herile. A swi nga ha koteki ku vulavurisana ni vandlha leritsongo ra kwalaho, kutani a hi fanele hi khathalela swilaveko swa vamakwerhu. Hi va yisele swakudya, swiambalo, tibuku ta Bibele kun’we ni vhidiyo leyi nge Jehovah’s Witnesses—The Organization Behind the Name. * Vanhu va khitikanile va ya yi hlalela ‘endlwini ya mintlangu’ ya le mugangeni wolowo—leyi a yi ri yindlu leyikulu ya mabyanyi leyi a yi ri na muchini wun’we wo tlanga vhidiyo naswona a ku ri na TV yin’we—lerova hi boheke ku yi kombisa kambirhi. Minkombiso leyi yimbirhi yi endle leswaku ku va ni tidyondzo to tala ta Bibele. Kunene a hi tirhelanga esakeni ro boxeka.”

2. (a) Ha yini Vakreste va tsakela ku tirhisa vutomi bya vona va tirhela Xikwembu? (b) Hi swihi swivutiso leswi hi nga ta swi tlhuvutsa?

² Ha yini Aaron ni vatirhi-kulobye va endle matshalatshala yo tano? Hikuva va ri tlangele swinene gandzelo ra nkutsulo ra Yesu Kreste lerova va nyikela vutomi bya vona eka Xikwembu ivi va byi tirhisa hi ku pfumelelana ni xikongomelo xa Xikwembu. Ku fana na vona, Vakreste hinkwavo lava tinyiketeleke va tibohe leswaku “va nga ha tihanyeli,” kambe va endla leswi va nga swi kotaka “hikwalaho ka mahungu lamanene.” (2 Vakorinto 5:15; 1 Vakorinto 9:23) Va swi tiva leswaku loko nkarhi wa mafambiselo lawa ya swilo wu hela, rifuwo hinkwaro ni swikhundlha swa misava a swi nge va pfuni nchumu. Kutani tanihi leswi va nyikiweke vutomi ni rihanyo, va lava ku tirhisa swilo sweswo hi ku pfumelelana ni xikongomelo xa Xikwembu. (Eklesiasta 12:1) Hina hi nga swi endlisa ku yini sweswo? Hi nga endla yini leswaku hi kuma vurhena ni matimba yo endla tano? Naswona hi tihi tindlela leti hi pfulekeleke leswaku hi hlanganyela entirhweni lowu?

Ku Teka Goza Ha Rin’we

3. Hi wahi magoza ya xisekelo lama katsekaka eku endleni ka ku rhandza ka Xikwembu?

³ Eka Vakreste va ntiyiso, ku endla ku rhandza ka Xikwembu i mhaka ya vutomi hinkwabyo. Swi sungula hi magoza ya xisekelo yo tanihi ku tsarisa eXikolweni xa Vutirheli bya le Tilweni, ku hlaya Bibele siku na siku, ku hlanganyela entirhweni wo chumayela ni ku endla nhluvuko ku fikela loko u khuvuriwa. Loko hi ri karhi hi endla nhluvuko, hi tsundzuka marito ya muapostola Pawulo lama nge: “Anakanyisisa hi swilo leswi; u dzika eka swona, leswaku ku ya emahlweni ka wena ku vonaka eka vanhu hinkwavo.” (1 Timotiya 4:15) Nhluvuko wo tano a wu endleriwi ku titlakusa, kambe wu kombisa ku tiyimisela ka hina ku endla ku rhandza ka Xikwembu hi ku titsongahata. Ku teka goza rero swi kombisa leswaku hi pfumelela Xikwembu xi kongomisa mikondzo ya hina etimhakeni hinkwato ta vutomi, naswona xi hi kongomisa kahle ku tlula leswi hina a hi ta endlisa swona.—Pisalema 32:8.

4. Hi nga endla yini leswaku hi tshika ku karhateka swi nga fanelanga?

⁴ Hambiswiritano, ku kanakana kumbe ku titsetselela ngopfu swi nga hi sivela ku endla nhluvuko eku tirheleni ka hina Xikwembu. (Eklesiasta 11:4) Leswaku hi kuma ntsako wa xiviri loko hi tirhela Xikwembu ni van’wana, hi nga boheka ku rhanga hi tshika ku karhateka hi swilo swo karhi. Hi xikombiso, Erik a a anakanya ku ya tirha evandlheni ra ririmi rimbe. Kambe a a tivutisa: ‘Xana ndzi ta titwa ndzi nga lahlekanga? Xana ndzi ta va tsakela  vamakwerhu va kona? Xana vona va ta ndzi tsakela?’ U ri: “Eku heteleleni ndzi lemuke leswaku ndzi fanele ndzi karhateka ngopfu hi vamakwerhu ku ri ni ku karhateka ngopfu hi mina n’wini. Ndzi vone swi antswa leswaku ndzi tshika ku tivutisa swo tala ivi ndzi pfuna hilaha swi nga kotekaka hakona. Ndzi khongelele mpfuno ivi ndzi ya emahlweni ni makungu ya mina. Sweswi ndzi swi tsakela swinene ku tirha ni vandlha rero.” (Varhoma 4:20) Ina, loko hi tirhela Xikwembu hi mbilu hinkwayo ni ku endlela van’wana leswinene, hi ta kuma ntsako ni ku eneriseka.

5. Ha yini ku rhangisa xikongomelo xa Xikwembu swi lava leswaku hi kunguhata swilo kahle? Kombisa.

⁵ Leswaku hi kota ku kumisisa xikongomelo xa Xikwembu, nakambe hi fanele hi kunguhata timhaka ta hina hi vukheta. Hi fanele hi papalata ku tirhwexa swikweleti swo tala leswi nga endlaka leswaku hi hundzuka mahlonga ya mafambiselo lawa ya swilo kutani hi nga ha swi koti kahle ku endla ntirho wa Xikwembu. Bibele ya hi tsundzuxa: “Mulombi i nandza wa mulombisi.” (Swivuriso 22:7) Ku tshemba Yehovha ni ku rhangisa timhaka ta moya emahlweni swi hi pfuna ku hlela swilo swa hina hi mfanelo. Hi xikombiso, Guoming ni vamakwavo vambirhi va xisati va tshama ni mana wa vona laha ku va ni yindlu swi durhaka swinene kasi ni ku kuma ntirho a swi olovi. Va kota ku ya emahlweni ni vutomi hi ku tirhisa mali hi vukheta ni hi ku pfunana ku hakelela swilo, hambileswi van’wana va vona va nga tirhiki. Guoming u ri: “Minkarhi yin’wana n’hweti ya hela hi nga kumanga mali. Kambe hi kota ku ya emahlweni ni ntirho wa vuphayona hi tlhela hi khathalela mana wa hina. Ha tsaka hileswi Manana a nga laviki leswaku hi tshika vuphayona hi ya n’wi tirhela leswaku a kota ku hanya emafurheni.”—2 Vakorinto 12:14; Vaheveru 13:5.

6. I yini lexi kombisaka leswaku hi nga swi kota ku pfumelelanisa vutomi bya hina ni xikongomelo xa Xikwembu?

⁶ Loko ana se u ri erivilweni ro hlongorisa swilo swa misava—ku nga ha va mali kumbe swin’wana—ku rhangisa xikongomelo xa Xikwembu swi nga lava leswaku u endla mindzulamiso leyikulu. Hakanyingi a swi koteki ku yi endla hi ku copeta ka tihlo, naswona loko u pfa u endla swihoxo loko wa ha ku sungula a wu fanelanga u anakanya leswaku se u tsandzekile. Anakanya hi Koichi, loyi a a ri ni xiphiqo xa ku heta nkarhi wo tala eka swilo swa vuhungasi. Koichi a a tshame a dyondza Bibele loko a ha ri eka malembe ya kondlo-a-ndzi-dyi, kambe se a ku hundze malembe yo tala a dzike a twelela emintlangwini ya tivhidiyo. Siku rin’wana Koichi u tibyele a ku: ‘Ha yini ndzi endla leswi? Phela se ndzi ni malembe yo tlula 30 hi vukhale, kambe a ku na xo nyawula lexi ndzi xi endlaka evuton’wini!’ Koichi u tlhele a sungula ku dyondza Bibele a tlhela a amukela mpfuno lowu vandlha a ri n’wi nyika wona. Hambileswi a a teka nkarhi ku endla nhluvuko, a nga tshikanga. U hetelele a hlule mikhuva yakwe hi ku khongela hi matimba ni hi ku pfuniwa hi van’wana. (Luka 11:9) Sweswi Koichi i nandza wa vutirheli loyi a tsakeke.

Dyondza Ku Ringanisela

7. Ha yini hi fanele hi endla ntirho wa Xikwembu hi ku ringanisela?

⁷ Ku rhangisa xikongomelo xa Xikwembu swi lava ku tinyikela hi mbilu hinkwayo. Hi nga tshuki hi endla tano hi ku titsetselela kumbe hi ku loloha. (Vaheveru 6:11, 12) Hambiswiritano, Yehovha a nga lavi leswaku hi tidlaya kunene lerova hi sala hi hlakarile. Loko hi tibyela hi ku titsongahata leswaku a hi nge koti ku hetisisa ntirho wa Xikwembu hi matimba ya hina, hi ta va hi dzunisa xona naswona sweswo swi ta komba leswaku ha ringanisela. (1 Petro 4:11) Yehovha u hi tshembisa leswaku u ta hi nyika matimba lawa hi ma lavaka leswaku hi endla ku rhandza ka yena, kambe a hi fanelanga hi tidlaya kunene, hi ringeta ku endla swilo leswi a nga swi langutelangiki eka hina. (2 Vakorinto 4:7) Leswaku hi hambeta hi tirhela Xikwembu handle ko tidlaya, hi fanele hi tirhisa matimba ya hina hi vutlhari.

8. Ku humelele yini loko muntshwa un’wana la nga Mukreste a ringete ku tirha hi matimba emisaveni hi hala tlhelo a tikarhata swinene eku tirheleni Yehovha, naswona i ndzulamiso wihi lowu a wu endleke?

⁸ Hi xikombiso, Ji Hye, wa le Asia Vuxa, u hete malembe mambirhi a tirha entirhweni wo tihanyisa lowu a wu nga n’wi nyiki ni nkarhi wa ku hefemula, kasi hi hala tlhelo a a ri phayona. Wa hlamusela: “Ndzi ringete hi matimba ku tirhela Yehovha kambe ndzi nga debyisi voko entirhweni wo tihanyisa, hambileswi a ndzi etlela tiawara ta ntlhanu ntsena nivusiku. Eku heteleleni a ndzi nga ha wu hisekeli ngopfu ntiyiso, naswona a ndzi  nga ha swi tsakeli ngopfu swilo swa moya.” Leswaku a tirhela Yehovha hi ‘mbilu yakwe hinkwayo, hi moya-xiviri wakwe hinkwawo, hi mianakanyo yakwe hinkwayo ni hi ntamu wakwe hinkwawo,’ Ji Hye u lave ntirho lowu nga ta n’wi nyika nkarhi wa ku hefemula. (Marka 12:30) U ri: “Hambileswi ndyangu wa ka hina a wu sindzisa leswaku ndzi tikumela mali yo tala, ndzi tiyimisele ku rhangisa xikongomelo xa Xikwembu. Mali leyi ndzi yi holaka ya ha ndzi pfuna ku kuma swilo swa xisekelo, swo tanihi swiambalo leswi langutekaka. Naswona ndza tsaka leswi ndzi kumaka nkarhi lowu eneleke wo etlela! Nsimu ndza yi tsakela swinene, naswona sweswi ndzi titwa ndzi tiyile emoyeni. Sweswo swi endliwa hileswi ndzi nga pfumeleriki misava yi ndzi yenga hi swilo swa yona kumbe yi ndzi hambukisa.”—Eklesiasta 4:6; Matewu 6:24, 28-30.

9. Matshalatshala ya hina ma nga va khumba njhani vanhu ensin’wini?

⁹ A swi nge koteki leswaku hinkwerhu hi tirhela Xikwembu tanihi vachumayeri va nkarhi hinkwawo. Loko u xi tirhela u ri karhi u hlangavetana ni swiphiqo swa vudyuhari, swa rihanyo kumbe swin’wana, tiyiseka leswaku Yehovha wa ku tlangela swinene ku tshembeka ka wena ni ntirho wihi ni wihi lowu u n’wi endlelaka wona swi huma embilwini. (Luka 21:2, 3) Hikwalaho, hi nga tshuki hi rivala leswaku leswi hi ringetaka hi matimba ku swi endla, hambiloko swi nga nyawuli, swi nga va khumba swinene van’wana. Hi xikombiso, a hi nge hi nghene emakaya yo hlayanyana kambe ku nga ri na un’we loyi a vonakaka a tsakela rungula ra hina. Loko hi fambile, vini va miti va nga sala va vulavula nkarhi wo leha hi riendzo ra hina, ni laha va nga hi amukelangiki! A swi vuli leswaku un’wana ni un’wana loyi a twaka mahungu lamanene u ta ma amukela, kambe van’wana va ta ma amukela. (Matewu 13:19-23) Van’wana va nga ma amukela endzhaku loko ku cinca swin’wana emisaveni kumbe evuton’wini bya vona. Ntsena loko hina hi endla leswi hi nga swi kotaka ensin’wini, hi ta va hi endla ntirho wa Xikwembu. Hi “vatirhi-kulobye ni Xikwembu.”—1 Vakorinto 3:9.

10. Hi byihi vutihlamuleri lebyi un’wana ni un’wana a nga na byona evandlheni?

¹⁰ Ku tlula kwalaho, hinkwerhu ka hina hi nga pfuna swirho swa mindyangu ya hina ni vamakwerhu va moya. (Vagalatiya 6:10) Nhlohlotelo wa hina lowunene wu nga va ni vuyelo lebyinene eka van’wana. (Eklesiasta 11:1, 6) Loko vakulu ni malandza ya vutirheli va hetisisa vutihlamuleri bya vona hi ku hiseka, va pfuna swirho swa vandlha leswaku swi va ni vuxaka lebyinene na Yehovha, naswona swi wu hisekela swinene ntirho wa Vukreste. Ha tiyiseka leswaku loko hi va ni “swo tala swo swi endla entirhweni wa Hosi,” ntirho wa hina “a hi wa hava.”—1 Vakorinto 15:58.

 Ku Rhangisa Xikongomelo Xa Xikwembu Minkarhi Hinkwayo

11. Handle ko tirha ni vandlha ra ka hina, hi wahi malunghelo man’wana lama hi pfulekeleke?

¹¹ Tanihi Vakreste, hi tsakela vutomi, naswona hi rhandza ku dzunisa Xikwembu eka hinkwaswo leswi hi swi endlaka. (1 Vakorinto 10:31) Loko hi tikarhata swinene eku chumayeleni ka mahungu lamanene ya Mfumo ni le ku dyondziseni ka van’wana leswaku va yingisa swilo hinkwaswo leswi Yesu a swi leriseke, hi ta pfulekeriwa hi tindlela to tala ta ku tirhela Xikwembu leti nga ta hi tisela ntsako. (Matewu 24:14; 28:19, 20) Handle ko tirha ni vandlha ra ka hina, hi nga pfulekeriwa hi lunghelo ro ya tirha laha ku nga ni xilaveko lexikulu, ku nga ha va ensin’wini yin’wana, eka vanhu va ririmi rimbe kumbe etikweni rimbe. Vakulu ni malandza ya vutirheli lama fanelekaka lama nga si tekaka va nga ha rhambiwa ku ya eXikolweni xa Ndzetelo wa Vutirheli, endzhaku va ya tirha emavandlheni lama nga ni xilaveko xa mpfuno wa Vakreste lava vupfeke, etikweni ra ka vona kumbe etikweni rimbe. Mimpatswa leyi tekaneke leyi nga evutirhelini bya nkarhi hinkwawo yi nga fanelekela ku ya leteriwa ntirho wa vurhumiwa eGiliyadi, kutani yi ya tirha etikweni rimbe. Naswona ku ni xilaveko lexi kulaka xa vamakwerhu lava nga endlaka mintirho yo hambana-hambana eBethele kun’we ni ya ku aka ni ku pfuxeta tindhawu ta minhlangano ni marhavi.

12, 13. (a) I yini lexi nga ku pfunaka ku hlawula ntirho lowu u nga wu endlelaka Yehovha? (b) Kombisa ndlela leyi ntokoto lowu kumiweke eka xiavelo xo karhi wu nga pfunaka ha yona eka swiavelo swin’wanyana.

¹² Hi wahi malunghelo man’wana lama ku pfulekeleke lawa u faneleke u ma tirhisa? Tanihi nandza wa Yehovha la tinyiketeleke, minkarhi hinkwayo lava vukongomisi bya yena ni bya nhlengeletano yakwe. “Moya wa [yena] lowunene” wu ta ku pfuna leswaku u endla swiboho leswi faneleke. (Nehemiya 9:20) Hakanyingi xiavelo xo karhi xi ku letela leswaku u kuma xiavelo xin’wanyana, naswona ntokoto lowu u wu kumeke entirhweni wo karhi wu nga pfuna eka xiavelo xin’wana endzhaku.

¹³ Hi xikombiso, Dennis ni nkatakwe Jenny va pfuneta nkarhi na nkarhi emintirhweni ya ku aka Tiholo ta Mfumo. Endzhaku ka loko Xidzedze lexi vuriwaka Katrina xi hlasele ndhawu ya le dzongeni wa United States, va tinyiketele ku ya phalala. Dennis wa vika: “Ku tirhisa vutshila lebyi hi veke na byona eku akeni ka Tiholo ta Mfumo leswaku hi pfuna vamakwerhu swi hi tisele ntsako lowukulu. Ku tlangela loku kombisiweke hi lava hi va pfuneke ka tsakisa swinene. Vunyingi bya mintlawa yin’wana yo phalala a yi humelelanga kahle loko swi ta eku akeni. Timbhoni ta Yehovha ana se ti lunghise tindlu to tlula 5 300 kumbe ti ti aka hi vuntshwa, ku katsa ni Tiholo to tala ta Mfumo. Vanhu va swi vone hi mahlo ya vona leswi,  kutani sweswi va ri tsakela swinene rungula ra hina.”

14. U nga endla yini loko u navela ku nghenela vutirheli bya nkarhi hinkwawo?

¹⁴ Xana u nga rhangisa xikongomelo xa Xikwembu hi ku hlawula vutirheli bya nkarhi hinkwawo? Loko swi ri tano, tiyiseka leswaku u ta kuma mikateko yo tala. Loko swiyimo swi nga ku pfumeleli namuntlha, kumbexana u nga endla mindzulamiso yo karhi. Khongela hilaha Nehemiya a endleke hakona loko a ve ni torha ra ku byarha vutihlamuleri bya nkoka: “Oho Yehovha, ndzi kombela . . . u endla leswaku nandza wa wena swi n’wi fambela kahle.” (Nehemiya 1:11) Hikwalaho, tshemba “Mutwi wa xikhongelo,” u teka goza hi ku ya hi leswi u khongeleleke swona. (Pisalema 65:2) Leswaku Yehovha a katekisa matshalatshala ya wena ya ku n’wi tirhela hi xitalo, hi wena u faneleke u rhanga u endla matshalatshala ya kona. Loko se u endle xiboho xa ku nghenela vutirheli bya nkarhi hinkwawo, khomelela eka xiboho xexo. Hi ku famba ka nkarhi, ntokoto wa wena wu ta hambeta wu kula, naswona ntsako wa wena wu ta engeteleka.

Vutomi Lebyi Faneleke Hakunene

15. (a) Hi pfuneka njhani loko hi vulavula ni lava ku nga khale va tirhela Xikwembu kumbe loko hi hlaya ha vona? (b) Hlamusela mhaka ya vutomi leyi yi ku khutazeke ngopfu.

¹⁵ Hi byihi vuyelo lebyi u nga byi langutelaka loko u rhangisa xikongomelo xa Xikwembu? Vulavula ni lava ku nga khale va tirhela Yehovha, ngopfu-ngopfu lava nga ni malembe yo tala va ri evutirhelini bya nkarhi hinkwawo. Va hanya vutomi lebyi enerisaka ni lebyi nga ni xikongomelo hakunene! (Swivuriso 10:22) Va ta ku byela leswaku Yehovha u va pfune swinene minkarhi hinkwayo loko va langutane ni swiyimo swo tika, ivi va kuma ndzalo ya leswi va swi pfumalaka hakunene. (Vafilipiya 4:11-13) Ku sukela hi 1955 ku ya eka 1961, Xihondzo xo Rindza (xa Xinghezi) xi humese nxaxamelo wa timhaka ta vutomi ta vanhu vo tshembeka, ehansi ka nhloko-mhaka leyi nge “Ku Namarhela Xikongomelo Xa Mina eVuton’wini.” Ku sukela enkarhini wolowo, ku kandziyisiwe swihloko swa madzana swa timhaka ta vutomi bya vanhu van’wana. Mhaka yin’wana ni yin’wana yi hlamusela moya wa ku hiseka ni ntsako lowu hi tsundzuxaka leswi buku ya Bibele ya Mintirho yi vulavulaka ha swona. Ku hlaya swiviko swo tano leswi khutazaka swi ta ku susumetela ku vula u ku, ‘Lebyi i vutomi lebyi na mina ndzi lavaka ku hanya byona!’

16. I yini lexi endlaka leswaku vutomi bya Mukreste byi va ni xikongomelo naswona byi tsakisa?

¹⁶ Aaron, loyi a boxiweke eku sunguleni, u ri: “EAfrika, hakanyingi a ndzi hlangana ni vantshwa lava a va tsendzeleka etikweni va lava xikongomelo evuton’wini. Vo tala a va xi kumanga. Kambe hina a hi rhangisa xikongomelo xa Xikwembu hi ku chumayela mahungu lamanene ya Mfumo, naswona a hi tisolanga hi leswi hi swi endleke hi vutomi bya hina. Hi swi vonile hakunene leswaku ku nyika swi tisa ntsako lowukulu ku tlula ku amukela.”—Mintirho 20:35.

17. Ha yini hi fanele hi rhangisa xikongomelo xa Xikwembu sweswi?

¹⁷ Ku vuriwa yini hi wena? Hi xihi xikongomelo lexi u xi rhangisaka? Loko u nga ri na tipakani to karhi leti ku pfunaka ku rhangisa xikongomelo xa Xikwembu, u ta fikeriwa hi swilo swin’wana leswi u nga ta tikuma u khomeke ha swona. Ha yini u tlangisa vutomi bya wena eka swilo leswi mafambiselo ya Sathana ma swi tekaka swi ri swa nkoka? Ku nga ri khale loko “nhlomulo lowukulu” wu fika, rifuwo ni swikhundlha swa misava a swi nge pfuni nchumu. Lexi nga ta va xa nkoka i vuxaka lebyi hi nga na byona na Yehovha. Hi ta tsaka hakunene hi leswi hi swi endleleke Xikwembu ni vanhu van’wana, ni loko hi rhangise xikongomelo xa Xikwembu evuton’wini bya hina!—Matewu 24:21; Nhlavutelo 7:14, 15.

[Tinhlamuselo ta le hansi]

U Nga Hlamusela Xana?

• Yehovha u titwa njhani hi leswi hi n’wi endlelaka swona?

• Ku ringanisela swi hi pfuna njhani leswaku hi tirhela Xikwembu ni ku endlela van’wana leswinene?

• Hi tihi tindlela to pfuna van’wana leti hi pfulekeleke?

• Hi nga endla yini leswaku hi hanya vutomi lebyi nga ni xikongomelo hakunene?

[Swivutiso Swa Dyondzo]

[Swifaniso eka tluka 23]

Hi fanele hi hanya hi ku ringanisela leswaku hi hambeta hi tirhela Yehovha hi moya-xiviri hinkwawo

[Swifaniso eka tluka 24]

Ntirho wo kwetsima wu endliwa hi tindlela to tala