“Ntiyiso I Yini?”

LEXI i xivutiso xo hlekula, lexi Ndhuna-nkulu ya Murhoma, Pontiyo Pilato a xi vutiseke Yesu. Loko a vutisa a a nga lavi ku tiva ni nhlamulo ya kona, kutani Yesu a nga n’wi hlamulanga. Kumbexana Pilato a a anakanya leswaku a nga kona munhu loyi a nga tivaka ntiyiso.—Yohane 18:38.

Moya lowu wo hlekula ntiyiso wu tele ninamuntlha, wu kona eka varhangeri va vukhongeri, vadyondzisi ni le ka van’watipolitiki. Va anakanya leswaku ntiyiso—ngopfu ngopfu loko swi ta etimhakeni ta mahanyelo ni ta moya—wa cinca wu pfumelelana ni swiyimo. Kahle-kahle, leswi swi vula leswaku vanhu hi vona va nga tihlawulelaka leswaku i yini leswi nga swinene ni leswi nga swo biha. (Esaya 5:20, 21) Nakambe leswi swi endla vanhu va namuntlha va fularhela mimpimanyeto ni misinya ya milawu ya mahanyelo ya vanhu va khale, va vula leswaku i xikhale.

A hi kambisiseni marito lama endleke Pilato a vutisa xivutiso lexi. Yesu u te: “Leswi ndzi velekeriweke swona, ni leswi ndzi teleke swona emisaveni i ku ta nyikela vumbhoni malunghana ni ntiyiso.” (Yohane 18:37) Yesu a a nga vuli leswaku ntiyiso wa tika ku wu twisisa. U tshembise vadyondzisiwa va yena a ku: “Mi ta tiva ntiyiso, kutani ntiyiso wu ta mi ntshunxa.”—Yohane 8:32.

Xana ntiyiso wolowo wu nga kumiwa kwihi? Siku rin’wana loko Yesu a ri karhi a khongela eka Xikwembu u te: “Rito ra wena i ntiyiso.” (Yohane 17:17) Bibele, leyi huhuteriweke hi Xikwembu, yi paluxa ntiyiso lowu nyikelaka nkongomiso lowu tshembekaka ni ntshembo lowu tiyisekisiweke wa nkarhi lowu taka—ku nga vutomi lebyi nga heriki.—2 Timotiya 3:15-17.

Pilato u ri arile lunghelo rero ro dyondza ntiyiso wo tano. Ku vuriwa yini hi wena? Hikwalaho ka yini u nga vutisi Timbhoni ta Yehovha leswaku “ntiyiso” lowu Yesu a a vulavula ha wona i yini? Ti ta swi tsakela ku ku byela wona.