Ku Tsakela “Ku Hlula Ni Xinyimpfana”

EKA papila leri Carey W. Barber a ri tsaleke hi 1971, u anakanyisise hi malembe ya yena yo sungula ya 50 a tirhela Xikwembu xa ntiyiso, a ku: “Malembe lawa ndzi ma heteke ndzi tirhela Yehovha a ma ri manene hi ndlela yo hlawuleka. Ku tshama ni vanhu va yena; ku sirheleleka eka vanhu lava endlaka leswo homboloka va misava ya Sathana; ntshembo wo hlula ni Xinyimpfana, Yesu Kreste; ni vumbhoni bya leswaku Yehovha wa hi rhandza, hinkwaswo leswi swi ndzi tisela ku rhula lokukulu ni ku eneriseka loku rindzaka mbilu swi tlhela swi ndzi nyika ntshembo lowu tiyeke wa leswaku ndzi ta swi kota ku hlula ro hetelela.”

Endzhaku ka malembe ya tsevu, Makwerhu Barber, Mukreste la totiweke hi moya, u ve xirho xa Huvo leyi Fumaka ya Timbhoni ta Yehovha. Loko a ri karhi a ri xirho xa Huvo leyi Fumaka eka malembe ya 30 lama landzeleke, u hambete a langutela hi mahlo-ngati “ku hlula ni Xinyimpfana.” U swi kotile ku endla tano hi ku tshama a tshembekile ku fikela loko a fa hi Sonto, April 8, 2007, a ri ni malembe ya 101.—1 Vakorinto 15:57.

Carey Barber loyi a tswaleriweke le Nghilandhi hi 1905 u khuvuriwe edorobeni ra Winnipeg, eCanada, hi 1921. Endzhaku ka malembe mambirhi yena ni hahlwa ra yena, Norman, va ye eBrooklyn, le New York, leswaku va ya pfuneta eka ntirho lowuntshwa lowu a wu lava ku sunguriwa. Hi nkarhi wolowo, vanhu va Yehovha se a va ta sungula ku tikandziyisela tibuku ta vona leswaku va twarisa mahungu lamanene ya Mfumo “emisaveni hinkwayo leyi akiweke.” (Matewu 24:14) Xin’wana xa swiavelo swo sungula swa Makwerhu Barber a ku ri ku tirhisa muchini lowutsongo wo kandziyisa. Swin’wana swa swilo leswi a swi kandziyisiwa a ku ri maphepha ya xitatimendhe xa nandzu wa la mangaleriwaka lawa a ma yisiwa eka Huvo leyi Tlakukeke ya le United States loko ku tengiwa nandzu. Hi ku famba ka nkarhi, Makwerhu Barber u tirhe eka Ndzawulo ya Ntirho, a tamela timhaka leti khumbaka mavandlha ni ntirho wo chumayela etikweni hinkwaro.

Leswi Makwerhu Barber a a ri ni ntokoto etimhakeni teto, u swi fanelekele kahle loko hi 1948 a averiwe ku va mulanguteri la famba-fambaka, a endzela tinhlengeletano ni mavandlha exiphen’wini hinkwaxo xa le vupela-dyambu bya United States. U vule leswaku nchumu lowu ngopfu-ngopfu a a wu tsakela a ku ri ku humela ehandle a chumayela. Xiavelo lexi xi endle leswaku Makwerhu Barber a tiviwa hi vamakwerhu vo tala. Leswi a a hatla a khoma swilo naswona a a hisekela nsimu swi n’wi pfune swinene loko endzhaku ka nkarhi a ve xichudeni eka ntlawa wa vu-26 wa Xikolo xa Bibele xa Giliyadi xa Watchtower. Loko a ha ri exikolweni xexo, u tolovelane na xichudeni-kulobye lexi humaka eCanada, ku nga Sydney Lee Brewer. Endzhaku ko thwasa exikolweni va tekanile naswona masiku ya vona yo sungula ya vukati va ma hete va ri eriendzweni ro koma ro ya endzela mavandlha ya le Chicago, eIllinois. Makwerhu wa xisati Barber u tikombe a ri munghana wa nkoka ni xihlovo xa nseketelo xa nkarhi na nkarhi eka nuna wa yena eka makume mambirhi ya malembe lawa va ma heteke va ri evutirhelini byo famba-famba.

Lava va koteke ku hlangana na Makwerhu Barber ni ku n’wi tiva eka makume ya malembe lawa a ma heteke a ri mulanguteri wa muganga kumbe wa xifundzha kumbe eka malembe ya 30 lawa a ma heteke a tirha ni ku famba-famba tanihi xirho xa Huvo leyi Fumaka va nge ti rivali tinkulumo ni tinhlamuselo ta yena leti khutazaka. Hi ni xivangelo xo tsakela “ku hlula [ka yena] ni Xinyimpfana.”