“Silivhere I Ya Mina, Ni Nsuku I Wa Mina”

HI LEMBE-XIDZANA ra vutsevu B.C.E., Hosi Korexe wa le Peresiya u ntshunxe vanhu va Xikwembu evuhlongeni bya le Babilona. Kutani magidi ya vona va tlhelele eYerusalema leswaku va ya pfuxeta tempele ya Yehovha leyi a yi ri marhumbi. Vanhu lava vuyeke evuhlongeni a va langutane ni xiphiqo lexikulu xa ku pfumala mali naswona vaakelani va vona lava nga ni mona va sivele ntirho lowu wo aka. Hikwalaho, van’wana lava a va aka a va nga tshembi leswaku va ta swi kota ku heta ntirho wolowo.

Yehovha u tirhise muprofeta wa yena Hagayi leswaku a tiyisekisa lava a va aka leswaku U na vona. U te: “Ndzi ta ninginisa matiko hinkwawo, kutani swilo leswi navelekaka swa matiko hinkwawo swi fanele swi nghena; ndzi ta tata yindlu leyi hi ku vangama.” Leswi vanhu volavo lava a va aka a va karhatekile hileswi a va nga ri na mali, Hagayi u va byele leswi: “‘Silivhere i ya mina, ni nsuku i wa mina,’ ku vula Yehovha wa mavuthu.” (Hagayi 2:7-9) Ku nga si hela malembe ya ntlhanu Hagayi a vule marito wolawo lama khutazaka, ntirho wo aka tempele wu hetiwile.—Ezra 6:13-15.

Marito ya Hagayi ma tlhele ma khutaza malandza ya Xikwembu eminkarhini ya sweswinyana loko ma endla mintirho leyikulu leyi fambisanaka ni vugandzeri bya Yehovha. Hi 1879 loko ntlawa wa hlonga ro tshembeka ni ro tlhariha wu sungula ku kandziyisa magazini lowu, lowu hi nkarhi wolowo a wu vitaniwa Zion’s Watch Tower and Herald of Christ’s Presence, a wu ri ni rungula leri nge: “Ha pfumela leswaku museketeri wa magazini lowu wa ‘Zion’s Watch Tower’ i YEHOVHA naswona leswi swi nga tano wu nga ka wu nga kombeli kumbe ku rilela vanhu leswaku va wu seketela. Loko Loyi a nge: ‘Silivhere ni nsuku hinkwawo lowu nga etintshaveni i swa mina,’ a nga ha swi koti ku nyikela mali leyi lavekaka, hi ta swi tiva leswaku i nkarhi wo yimisa ku kandziyisiwa ka magazini lowu.”

Nkandziyiso wa Xihondzo xo Rindza a wu si tshama wu yimisiwa. Ku kandziyisiwe tikopi ta 6 000 hi Xinghezi ntsena ta nkandziyiso wolowo wo sungula. Namuntlha, hi xiringaniso ku kandziyisiwa tikopi ta 28 578 000 ta nkandziyiso ha wun’we wa Xihondzo xo Rindza hi tindzimi ta 161. * Kutani Xalamuka! ku nga magazini lowu fambisanaka ni Xihondzo xo Rindza, hi xiringaniso ku kandziyisiwa tikopi ta 34 267 000 hi tindzimi ta 81.

Timbhoni ta Yehovha ti endla mintirho yo tala leyi nga ni xikongomelo xo fana ni xa Xihondzo xo Rindza—ku nga ku tlakusa Yehovha tanihi Hosi Leyi Lawulaka ya vuako hinkwabyo ni ku twarisa mahungu lamanene ya Mfumo wa yena. (Matewu 24:14; Nhlavutelo 4:11) Ku tiyiseka loku Timbhoni ti nga na kona namuntlha ku fana ni loku vuriweke eka magazini lowu hi 1879. Ti tshemba leswaku Xikwembu xi seketela ntirho wa tona naswona xi ta ti nyika mali yo endla mintirho leyi xi yi amukelaka. Kambe, hi ku kongoma mintirho leyi Timbhoni ta Yehovha ti yi endlaka yi seketeriwa njhani hi tlhelo ra timali? Naswona i mintirho ya muxaka muni leyi ti yi endlaka leswaku ti kota ku chumayela mahungu lamanene emisaveni hinkwayo?

Ntirho Wu Seketeriwa Njhani Hi Tlhelo Ra Timali?

Loko Timbhoni ta Yehovha ti ri karhi ti chumayela erivaleni, swi tolovelekile ku va vanhu va ti vutisa va ku: “Xana ma hakeriwa ku endla ntirho lowu?” Nhlamulo hileswaku a ti hakeriwi. Ti tirhisa nkarhi wa tona hi ku tirhandzela. Vavuri lava va evhangeli va heta nkarhi wo tala va ri karhi va vulavula ni van’wana hi Yehovha ni hi xitshembiso xa le Bibeleni xa vutomi byo antswa bya nkarhi lowu taka, va susumetiwa hi rirhandzu. Va swi tlangela leswi Xikwembu xi va endleleke swona ni ndlela leyi rungula ra mahungu lamanene ri byi antswiseke ha yona vutomi bya vona ni langutelo ra vona. Hikwalaho, va lava ku avelana ni van’wana swilo leswi leswinene. Hi ku endla tano, va  landzela nsinya wa nawu lowu Yesu a wu vuleke loko a ku: “Mi amukele mahala, nyikani mahala.” (Matewu 10:8) I ntiyiso leswaku ku navela ka vona ku va timbhoni ta Yehovha ni ta Yesu swi va susumetele ku tirhisa mali ya vona hi ku tirhandzela leswaku va kota ku byela vanhu hi vupfumeri bya vona, hambi ku ri lava va tshamaka ekule na vona.—Esaya 43:10; Mintirho 1:8.

Mpimo wa ntirho wo chumayela ni swilo leswi tirhisiwaka leswaku wu hetisisiwa—ku nga vugandliselo, marhavi, Tiholo ta Tinhlengeletano, makaya ya varhumiwa ni swin’wana—swi lava mali yo tala. Xana mali yoleyo hinkwayo yi huma kwihi? Yi huma eka minyikelo yo tirhandzela. Timbhoni ta Yehovha a ti swi sindzisi swirho swa vandlha leswaku swi humesa mali leswaku ku ta khathaleriwa mintirho leyi endliwaka hi nhlengeletano naswona a ti hakerisi vanhu ntsengo wo karhi leswaku va kuma minkandziyiso leyi ti yi fambisaka. Loko mani na mani a lava ku nyikela leswaku a seketela ntirho wa tona wo dyondzisa, Timbhoni ti swi amukela hi mandla mambirhi. A hi xiyeni leswaku ku katseka yini eka wun’wana wa mintirho leyi endlaka leswaku ku chumayeriwa mahungu lamanene emisaveni hinkwayo—ku nga ntirho wa ku hundzuluxela.

Minkandziyiso Hi Tindzimi Ta 437

Ku hele makume yo tala ya malembe minkandziyiso ya Timbhoni ta Yehovha yi ri yin’wana ya minkandziyiso leyi hundzuluxeriwaka ngopfu emisaveni. Ku hundzuluxeriwe swiphephana, tibroxara, timagazini ni tibuku hi tindzimi ta 437. I ntiyiso leswaku ntirho wo hundzuluxela wu lava mali yo tala, ku fana ni mintirho yin’wana leyi katsekaka eku chumayeriweni ka mahungu lamanene. Kahle-kahle ntirho wo hundzuluxela wu katsa yini?

Loko vatsari va minkandziyiso ya Timbhoni ta Yehovha va lunghiselela xihloko xa nkandziyiso wa Xinghezi, va teka rungula ra xona va ri hoxa eka khompyuta leswaku ri ta kumiwa hi mintlawa ya vahundzuluxeri lava leteriweke kahle ematikweni yo hambana-hambana emisaveni. Ntlawa ha wun’we wa vahundzuluxeri wu ni vutihlamuleri byo hundzuluxela minkandziyiso hi ririmi ra rikwavo. Mintlawa leyi yi nga va ni swirho swa ntlhanu ku ya eka swa 25, swi ya hi mpimo wa ntirho lowu swi wu  hundzuluxelaka ni xiyimo xa ririmi leri hundzuluxeriwaka.

Rungula leri hundzuluxeriweke ra kambisisiwa ivi ri hlayiwa leswaku ku khuthuleriwa swihoxo hinkwaswo. Xikongomelo xa kona i ku hundzisa rungula ra Xinghezi hi ndlela leyi kongomeke ni leyi twisisekaka swinene. Leswi swi endla leswaku vahundzuluxeri va langutana ni swiphiqo swo tala. Loko vahundzuluxeri va hundzuluxela rungula leri nga ni marito yo tika, swi nga ha lava leswaku vona ni lava khutulelaka swihoxo va endla vulavusisi lebyi dzikeke bya rungula ra ririmi leri va hundzuluxelaka ku suka eka rona (ku nga Xinghezi kumbe loko rungula ra kona se ri hundzuluxeriwe hi ririmi rin’wana ro kota Xifurwa, Xirhaxiya kumbe Xipaniya) ni ririmi ra rikwavo, ku tiyiseka leswaku leswi va swi hundzuluxelaka swa pakanisa. Hi xikombiso, loko nkandziyiso wa Xalamuka! wu vulavula hi mhaka leyi khumbaka swilo swa thekiniki kumbe matimu, ku laveka leswaku ku endliwa vulavusisi lebyi dzikeke hi mhaka yoleyo.

Vahundzuluxeri vo tala va tirha emarhavini ya Timbhoni ta Yehovha, ku ni lava tirhaka nkarhi hinkwawo ni va nkarhinyana. Van’wana va tirha laha ririmi leri va ri hundzuluxelaka ri vulavuriwaka kona. Vahundzuluxeri a va holeriwi. Kambe lava va nyikeleke nkarhi wa vona hinkwawo entirhweni wo hundzuluxela va nyikiwa ntsena kamara, swakudya ni mali yo karhi leswaku va kota ku tixavela leswi va swi pfumalaka. Emisaveni hinkwayo ku ni Timbhoni ta kwalomu ka 2 800 leti nga vahundzuluxeri. Sweswi, ku ni marhavi ya Timbhoni ta Yehovha ya 98 lama nga ni mintlawa ya vahundzuluxeri kumbe lama kongomisaka mintlawa ya vahundzuluxeri etindhawini tin’wana. Hi xikombiso, rhavi ra le Rhaxiya ri kongomisa vahundzuluxeri vo tlula 230 lava tirhaka nkarhi hinkwawo ni va nkarhinyana, lava hundzuluxelaka tindzimi to tlula 30, ku katsa ni tindzimi leti nga tirhisiwiki ngopfu hi vanhu va ndhawu yoleyo to tanihi Xichuvash, Xiossetia na Xiuighur.

Ku Antswisa Vuhundzuluxeri

Ku hundzuluxela rungula leri rharhanganeke swi fana ni ku dyondza ririmi rin’wana. Pakani i ku hlamusela mongo wa mhaka hi ndlela leyi twisisekaka leyi nga ta endla leswaku rungula leri hundzuluxeriweke ri hlayeka hi ku olova onge a ri  hundzuluxeriwanga. Sweswo swi lava vuswikoti byo karhi. Swi teka malembe leswaku vahundzuluxeri lavantshwa va kota ku hundzuluxela kahle naswona Timbhoni ta Yehovha ti tshama ti ri karhi ti va letela. Minkarhi yin’wana valeteri va endzela mintlawa ya vahundzuluxeri leswaku va va pfuna ku antswisa vuswikoti bya vona byo hundzuluxela ni matirhiselo ya tiprogreme ta khompyuta.

Ndzetelo lowu wu ve ni vuyelo lebyinene. Hi xikombiso, rhavi ra Timbhoni ta Yehovha ra le Nicaragua ri tsale ri ku: “I ro sungula vahundzuluxeri va hina va ririmi ra Ximiskito va dyondzisiwa matirhelo ni ndlela leyi va faneleke va hundzuluxela ha yona hi muleteri la humaka erhavini ra le Mexico. Leswi swi yi antswise ngopfu ndlela leyi vahundzuluxeri va hundzuluxelaka ha yona. Vuhundzuluxeri byi antswisiwe hi ndlela leyi hlamarisaka.”

Marito Lama Khumbaka Mbilu

Ku endliwa matshalatshala yo hundzuluxela Bibele swin’we ni mikandziyiso yin’wana leyi sekeriweke eBibeleni hi ku tirhisa ririmi leri vanhu va ri vulavulaka hi xikongomelo xo fikelela timbilu ta vona. Hi 2006, Timbhoni ta Yehovha ta le Bulgaria a ti tsakile swinene loko ku humesiwa Vuhundzuluxeri Bya Misava Leyintshwa Bya Matsalwa Ya Vukreste Ya Xigriki hi Xibulgaria. Rhavi ra le Bulgaria ri vule leswaku vanhu vo tala va yi tsakerile Bibele leyi. Swirho swa vandlha swi vula leswaku “sweswi Bibele yi khumba mianakanyo ni timbilu ta swona.” Mukhalabye un’wana loyi a humaka eSofia u te: “Ndzi hlaye Bibele ku ringana malembe yo tala kambe a ndzi si tshama ndzi hlaya vuhundzuluxeri lebyi twisekaka ni lebyi khumbaka mbilu hi ndlela leyi.” Hilaha ku fanaka, Mbhoni yin’wana ya le Albania, loko yi kume Bibele leyi heleleke ya Vuhundzuluxeri Bya Misava Leyintshwa hi Xialbania,  yi te: “Rito ra Xikwembu ri twisiseka swinene hi Xialbania! Ku va Yehovha a vulavula na hina hi ririmi ra rikwerhu i lunghelo lerikulu!”

Ku hundzuluxela Bibele hinkwayo swi nga teka vahundzuluxeri malembe yo hlayanyana. Kambe sweswo a hi ku tlanga hi nkarhi loko vuyelo bya kona ku va leswaku timiliyoni ta vanhu ti sungula ku twisisa Rito ra Xikwembu!

“Hi Vatirhi-kulobye Ni Xikwembu”

I ntiyiso leswaku ntirho wo hundzuluxela i wun’wana wa mintirho yo tala leyi lavekaka leswaku ku chumayeriwa mahungu lamanene hi ndlela leyi humelelaka. Ku tsariwa, ku kandziyisiwa ni ku rhumeriwa ka minkandziyiso leyi sekeriweke eBibeleni swin’we ni mintirho yin’wana yo tala leyi endliwaka emarhavini, eswifundzheni ni le mavandlheni ya Timbhoni ta Yehovha, swi lava ku tikarhata swinene ni mali. Kambe vanhu va Xikwembu ‘va tinyikela hi ku tirhandzela’ leswaku va khathalela ntirho lowu. (Pisalema 110:3) Va swi teka ku ri lunghelo ku humesa minyikelo ya ku tirhandzela naswona va vona Yehovha a va fundzhile leswi a va tekaka tanihi “vatirhi-kulobye.”—1 Vakorinto 3:5-9.

I ntiyiso leswaku loyi a nge “silivhere i ya mina ni nsuku i wa mina,” a nga titsheganga hi mali ya hina leswaku a endla ntirho wa yena. Kambe, Yehovha u fundzha malandza ya yena hi lunghelo ro hlanganyela eku kwetsimisiweni ka vito ra yena hi ku va ma humesa minyikelo ya wona yo seketela ntirho wo chumayela ntiyiso lowu ponisaka vutomi “ematikweni hinkwawo.” (Matewu 24:14; 28:19, 20) Xana a wu susumeteleki ku endla hilaha u nga kotaka hakona leswaku u seketela ntirho lowu, lowu wu nga ta ka wu nga ha endliwi nakambe?

[Nhlamuselo ya le hansi]

[Bokisi eka tluka 18]

“TI ENDLA LESWAKU HI ANAKANYISISA”

Xinhwanyetana xa malembe ya 14 hi vukhale xi tsalele rhavi ra le Cameroon ra Timbhoni ta Yehovha xi ku: “Endzhaku ka loko ndzi xave swilo swa xikolo leswi a ndzi ta swi tirhisa lembe hinkwaro, ndzi swi kotile ku xavisa tibuku timbirhi leti a ndzi ti tirhisa n’wexemu hi R37,00. Ndzi nyikela hi mali yoleyo swin’we ni R13,50 leyi a ndzi yi hlayisile. Ndzi mi khutaza leswaku mi ya emahlweni mi endla ntirho lowunene. Ndzi nkhensa timagazini ta Xihondzo xo Rindza swin’we ni Xalamuka! Ti endla leswaku hi anakanyisisa.”

[Bokisi/Swifaniso eka tluka 18]

MUNYIKELO WO HLAWULEKA

Rhavi ra Timbhoni ta Yehovha ra le Mexico ri kume papila leri humaka eka Manuel loyi a nga ni malembe ya tsevu hi vukhale, loyi a tshamaka eXifundzheni xa Chiapas. Tanihi leswi a nga swi kotiki ku tsala, u kombele munghana wa yena leswaku a n’wi tsalela. Manuel u ri: “Kokwana u ndzi nyike nguluve ya nkati. Kuteloko yi ve ni swingulubyana, ndzi ti hlawulela xo saseka leswaku ndzi ta xi kurisa hi ku pfuniwa hi vabuti va mina. Hi mbilu yo basa, ndzi nyikela hi mali leyi ndzi yi kumeke loko ndzi xavisa nguluve leyi. A yi tika tikilogiramu ta 100 naswona ndzi yi xavise hi R830,00. Ndzi kombela leswaku mi tirhisa mali leyi eka mintirho ya Yehovha.”

[Bokisi eka tluka 19]

‘TIRHISANI MALI LEYI LESWAKU MI HUNDZULUXELA BIBELE’

ENtsombanweni wa muganga wa Timbhoni ta Yehovha wa 2005 le Ukraine, ku humesiwe Vuhundzuluxeri Bya Misava Leyintshwa Bya Matsalwa Ya Vukreste Ya Xigriki hi Xiukraine. Hi xa mundzuku xa kona, entsombanweni wolowo ku kumiwe papila ebokisini ra minyikelo leri tsariweke leswi: “Ndzi ni malembe ya kaye hi vukhale. Ndzi nkhensa ngopfu hi Matsalwa Ya Xigriki. Manana u ndzi nyike mali swin’we ni ndzisana ya mina leswaku hi khandziya hi yona bazi loko hi ya exikolweni. Kambe loko mpfula yi nga ni a hi famba hi milenge exikolweni naswona hi kote ku hlayisa mali yo ringana R73,00. Mina ni ndzisana ya mina hi tsakela ku nyikela hi mali leyi leswaku mi yi tirhisela ku hundzuluxela Bibele hinkwayo hi Xiukraine.”

[Bokisi eka tluka 19]

TINDLELA LETI VAN’WANA VA HLAWULAKA KU NYIKELA HA TONA

MINYIKELO YA NTIRHO WA MISAVA HINKWAYO

Vo tala va tivekela mali yo karhi leyi va nga ta hamba va yi nghenisa emabokisini ya munyikelo lama nga ni mfungho lowu nge “Minyikelo Ya Ntirho Wa Misava Hinkwayo—Matewu 24:14.”

N’hweti na n’hweti, mavandlha ma rhumela minyikelo leyi erhavini ra Timbhoni ta Yehovha leri langutelaka matiko lawa mavandlha ya kona ma nga eka wona. Nakambe minyikelo ya ku tirhandzela yi nga rhumeriwa hi ku kongoma eka Watch Tower Bible and Tract Society of South Africa, Attention: Accounting Office, Private Bag X2067, Krugersdorp, 1740, South Africa, kumbe ehofisini ya rhavi ya Timbhoni ta Yehovha leyi langutelaka tiko ra ka n’wina. Loko u nyikela hi cheke eka adirese leyi nga laha henhla, tsala leswaku mali ya kona yi ya eka “Watch Tower.” Hi kombela leswaku u tivisa rhavi loko u lava ku nyikela hi swin’wetsin’wetsi kumbe hi swilo swin’wana swa nkoka. Endzhaku ka sweswo u fanele u rhumela papila ro koma leri hlamuselaka leswaku leyi i nyiko.

NYIKO LEYI KUNGUHATIWEKE

Ku engetela eka minyikelo leyi kongomeke, ku ni tindlela tin’wana ta ku nyikela leti vuyerisaka ntirho wa Mfumo wa misava hinkwayo. Tona ti katsa:

Ndzindza-khombo: Watch Tower Bible and Tract Society of South Africa yi nga tsariwa tanihi leyi nga ta sala yi tirhisa mali ya ndzindza-khombo wa vutomi kumbe ya mudende loko n’wini wa yona a file.

Mali Leyi Lombisiweke Hi Ntswalo: Mali leyi lombisiweke hi ntswalo yi nga nyikeriwa eka Watch Tower Bible and Tract Society of South Africa, tanihi nyiko leyi heleleke.

Ndhawu: Ndhawu leyi xavisekaka yi nga ha nyikeriwa hi ku kongoma kumbe loko ku ri yindlu yinene, ku endliwa ntwanano wa leswaku yi ta tekiwa ntsena loko loyi a nyikeleke ha yona a rhurha kumbe a fa. Tivisa hofisi ya rhavi ya le tikweni ra ka n’wina u nga si nyikela hi ndhawu.

Swiboho: Nhundzu kumbe mali swi nga ha nyikeriwa eka Watch Tower Bible and Tract Society of South Africa hi ku tirhisa xileriso xa mufi lexi nga enawini.

Loko u lava rungula leri engetelekeke, u fanele u vutisa Accounting Office hi ku ba riqingho kumbe hi ku tsalela eka adirese leyi nga laha hansi kumbe u vutisa hofisi ya rhavi ya Timbhoni ta Yehovha leyi langutelaka ntirho wo chumayela etikweni ra ka n’wina.

Accounting Office

Watch Tower Bible and Tract Society of South Africa

Private Bag X2067

Krugersdorp, 1740

South Africa

Riqingho: (011) 761-1000

[Xifaniso eka tluka 19]

Vahundzuluxeri va ririmi ra Ximiskito, erhavini ra le Nicaragua