Hi Xihi Xikongomelo Xa Wena eVuton’wini?

KENNY a a tirha ekhampanini ya swa mabindzu leyi a swi yi fambela kahle, a a ri ni movha wa manyunyu naswona a a ri ni yindlu leyikulu endhawini leyi ku tshamaka swigwili ya le dorobeni rin’wana lerikulu. Leswi a a ri ni ntokoto swinene eka ntlango wa ku vemba emoyeni, a a tsakela ku vemba hi rivilo lerikulu empfhukeni lowu endlaka tikhilomitara ta magidi. Xana swilo leswi hinkwaswo swi n’wi endle a hanya vutomi lebyi tsakisaka? Hi ku ya hi phepha-hungu rin’wana, u te: “Sweswi ndzi ni malembe ya 45, a ndzi na byona vumundzuku bya xiviri . . . Vutomi bya mina a byi na xikongomelo.”—The Wall Street Journal.

Elyn u tirhe hi matimba leswaku a va mutlangi la dumeke eka ntlangu wa ku tshwiririka eayisini. U hetelele a fikelele pakani yakwe. U yi kumile ndhuma leyi a a yi lava. Loko a titshandza u te: “Xana wu kwihi ntsako lowu a ndzi fanele ndzi ve na wona? Ndzo va na xivundza ntsena. Ndzi ta hetelela ndzi dyuharile, kutani hambileswi a ndzi ri ni mali yo tala, vutomi bya mina byi ta va bya hava loko ku ri leswaku xexo a ku ri xona ntsena xikongomelo xa mina evuton’wini.”

Leswi Hideo a a dume hi vutshila bya ku mpfampfarhuta hi ku tirhisa mivala yo saseka, u nyiketele vutomi byakwe hinkwabyo eku mpfampfarhuteni  swifaniso. Swilo leswi a swi mpfampfarhuteke a nga swi xavisanga; a a ehleketa leswaku loko o swi xavisa u ta va a wu tekela ehansi ntirho wakwe wa ku mpfampfarhuta. Loko se a ri ekusuhi ni ku fa a ri ni malembe ya 98, swo tala swa swifaniso leswi a swi mpfampfarhuteke u nyikele ha swona emuziyamu. Nkarhi wakwe wo tala evuton’wini a a wu tirhisela ku mpfampfarhuta swifaniso. Kambe a a nga enerisekanga evuton’wini, hikuva a a ehleketa leswaku a nge pfuki a swi kotile ku mpfampfarhuta hi ndlela leyi hetisekeke.

Vanhu van’wana va tirhise nkarhi wa vona wo tala va ri karhi va pfuna van’wana. Hi xikombiso, ehleketa hi mulanguteri un’wana wa bindzu ra ku endla tifilimi eHollywood. Leswi a a ri xandla xa muungameri wa yin’wana ya tikhampani letikulu swinene to endla tifilimi eUnited States, a a tshamela ku hlangana ni vatlangi va tifilimi lava dumeke naswona a a tshama endhawini ya xiyimo xa le henhla ni leyi durhaka swinene. Loko a endzele etikweni ra Cambodia, ku te xinhwanyatana xin’wana xi ta n’wi kombela mali loko a ri eku dyeni ekhefini yin’wana edorobeni ra Phnom Penh. U xi nyike dolara yin’we ni khodirinki. Xinhwanyatana xexo xi tsakile. Hambiswiritano, hi vusiku lebyi landzeleke xi tlhele xi vuya, xi ya emahlweni xi kombela vanhu mali. U xiye leswaku a ku laveka mpfuno lowukulu ku tlula lowu a wu nyikeleke.

Endzhaku ka lembe, mulanguteri loyi u endle xiboho xo cinca ntirho—u tshike ku tirha ekhampanini yo endla tifilimi to hungasa vanhu leswaku a ya pfuna vanhu lava pfumalaka eCambodia. U simeke xikolo lexi khathalelaka vanhu hi ku va nyika ndhawu yo tshama, swakudya ni ku va dyondzisa. Hambiswiritano, nkarhi wun’wana a a tsaka a tlhela a eneriseka hikwalaho ka swilo leswi a a kota ku swi endla kasi nkarhi wun’wana a a va ni gome a tlhela a tshoveka mbilu hikwalaho ka swiphiqo leswi tshamelaka ku engeteleka leswi a a fanele a swi tlhantlha.

Vanhu lava va mune lava ka ha ku vulavuriwaka ha vona a va ehleketa leswaku va swi tiva leswi a va lava ku swi fikelela evuton’wini. Hambiswiritano, va xiye leswaku vutomi bya vona a byi nga ri na xikongomelo loko va hetelele va fikelele pakani leyi va tikarhateke swinene ku yi fikelela. Hi xihi xikongomelo xa wena evuton’wini? I yini leswi u swi rhangisaka evuton’wini bya wena? Xana wa tiyiseka leswaku a wu nge tisoli endzhaku hikwalaho ka ndlela leyi u tirhisaka vutomi bya wena ha yona?