“Ndzi Kombela Mi Amukela Nyiko Ya Mina Leyi Nga Nyawuriki”

MARITO lawa a ma tsariwe eka papila leri amukeriweke hi rhavi ra Timbhoni ta Yehovha ra le Rhaxiya. Papila leri ri rhumeriwe ni bokisi lerikulu leri a ri tele hi masokisi lama lukiweke hi wulu.

Nyiko yoleyo yi rhumeriwe hi Alla, Mbhoni ya Yehovha leyi nga ni malembe ya 67, leyi hlanganyelaka evandlheni rin’wana ra le Vuxa Mpfungwe wa Rhaxiya. Alla se u ni malembe lama tlulaka khume a ri karhi a tirhela Yehovha ni ku chumayela mahungu lamanene ya Mfumo hi ku hiseka. Hambiswiritano, u khomiwe hi vuvabyi byo oma swirho lebyi endleke leswaku a nga ha swi koti ku famba. Kambe hi ku susumetiwa hi rirhandzu, Alla u landzele goza leri fanaka ni ra Dorkasi, wansati wa Mukreste wa hi lembe-xidzana ro sungula, loyi a a rhungela vapfumeri-kulobye tinguvu.—Mintirho 9:36, 39.

Epapileni rakwe, Alla u tsarile: “A ndzi swi koti ku tshukunyukisa milenge ya mina kambe ndza ha swi kota ku tirhisa mavoko ya mina. Kutani ndzi chumayela hi ku tsala mapapila.” U engeterile a ku: “Ndzi endle xiboho xa leswaku leswi ndza ha swi kotaka ku tirhisa mavoko ya mina, ndzi ta luka masokisi yo hlayanyana yo kufumela. Ndzi ta tsakela leswaku masokisi lawa ma nyikiwa vamakwerhu va xinuna ni va xisati lava yaka etindhawini leti titimelaka va ya aka Tiholo ta Mfumo, to tanihi le Vuxa Mpfungwe wa Rhaxiya ni le Siberia.”

Malunghana ni valandzeri vakwe va xiviri, Yesu Kreste u te: “Hinkwavo va ta tiva leswaku mi vadyondzisiwa va mina, loko mi rhandzana.” (Yohane 13:35) Rirhandzu ro fana ni leri Alla a ri kombiseke i mfungho wa vadyondzisiwa va Yesu va ntiyiso.