Swivutiso Swa Vahlayi

Xana swi fanerile leswaku Mbhoni ya Yehovha yi ya emucatweni wa xaka kumbe munhu loyi yi n’wi toloveleke la nga riki Mbhoni?

Micato i swiendlakalo leswi tsakisaka, naswona swa twisiseka loko Mukreste a tsakela ku ya exiendlakalweni xexo lexi tsakisaka. Ina, vantshwa lava rhambiwaka ku ya emucatweni va fanele va yingisa vatswari kumbe vawundli va vona, lava nga ni vutihlamuleri byo va endlela xiboho. (Vaefesa 6:1-3) Kambe ku vuriwa yini loko wanuna la nga riki Mbhoni ya Yehovha a kombela nsati wakwe la nga Mukreste leswaku a famba na yena emucatweni lowu khomeriweke ekerekeni? Ripfalo rakwe ri nga ha n’wi pfumelela ku famba a ya va muhlaleri ntsena la tiyimiseleke ku nga hlanganyeli eka swiendlo swihi ni swihi swa vukhongeri leswi fambisanaka ni xiendlakalo lexi.

Kahle-kahle, ku hlawula ku ya emucatweni wo karhi kumbe ku nga yi i mhaka ya munhu hi yexe. Hambiswiritano, Mukreste un’wana ni un’wana u fanele a tsundzuka leswaku u ta tihlamulela eka Yehovha malunghana ni swiboho leswi a swi tekaka naswona u fanele a kambisisa misinya ya milawu yo tala ya Matsalwa loko a endla xiboho malunghana ni ku ya emucatweni wa munhu la nga riki Mbhoni.

Nchumu wa nkoka swinene eka Mukreste ku fanele ku va ku lava ku va la amukelekaka eka Xikwembu. Yesu u te: “Xikwembu i Moya, naswona lava va xi gandzelaka va fanele ku gandzela hi moya ni ntiyiso.” (Yohane 4:24) Xisweswo, Timbhoni ta Yehovha a ti hlanganyeli eka swiendlo swa vukhongeri byin’wana, swo tanihi swikhongelo, mikhuva ya vukhongeri kumbe minkhuvo leyi kanetanaka ni ntiyiso wa Bibele.—2 Vakorinto 6:14-17.

Mukreste un’wana ni un’wana wa swi xiya leswaku xiboho lexi a xi tekaka xi nga tlhela xi khumba van’wana. Loko u hlawula ku ya emucatweni, xana maxaka ya wena ma ta khunguvanyeka loko u nga hlanganyeli hi ku helela enkhubyeni wa vukati? Nakambe u fanele u ehleketisisa hi ndlela leyi vapfumeri-kuloni va nga ta khumbeka ha yona. (Varhoma 14:13) Hambiloko wena kumbe swirho swin’wana swa ndyangu wa wena mi tibyela leswaku ku ya emucatweni wa munhu la nga riki Mbhoni a swi bihanga, xana sweswo swi nge vi ni vuyelo byo biha eka vamakwenu va moya? Xana swi nga vavisa ripfalo ra van’wana?

Micato leyi katsaka maxaka lama nga riki Timbhoni yi nga vanga swiyimo leswi tikaka. Ku vuriwa yini loko u komberiwa ku va nxangwana ya mutekiwa kumbe muteki? Kumbe ku vuriwa yini loko munghana wa wena wa vukati la nga riki Mbhoni a lava leswaku u hlanganyela hi ku helela eka mintirho hinkwayo? Loko mucato wu ri wa xilungu lowu fambisiwaka hi muavanyisi kumbe mutirhela-mfumo, ku ya emucatweni wolowo swi nga ha katsa ku va mbhoni ntsena ya loko ku sayiniwa maphepha ya leswaku va tekane hi ku ya hi nawu.

Hambiswiritano, ku ya emucatweni lowu vatekani va nga ta catisiwa ekerekeni kumbe emucatweni lowu nga ta fambisiwa hi mufundhisi swi nga vanga swiphiqo leswi engetelekeke. Leswaku u landzela ripfalo ra wena leri leteriweke hi Bibele naswona u papalata ku landzula vupfumeri bya wena kumbe ku endla leswi nga khomisaka lava nga emucatweni tingana, u nga ha hlawula ku nga yi emucatweni wolowo. (Swivuriso 22:3) Wena ni ndyangu wa wena mi nga ti hungutela swiphiqo hi ku byi hlamusela ka ha ri emahlweni vupfumeri bya n’wina lebyi sekeriweke eBibeleni, mi kombisa leswaku mi tiyimisele ku hlanganyela ku fikela kwihi kumbe mi ringanyeta goza rin’wana leri mi nga ri tekaka.

Endzhaku ko kambisisa swilo hinkwaswo leswi katsekaka, Vakreste van’wana va nga ha endla xiboho xa leswaku swi ta va swi nga hoxanga ku ya emucatweni wa munhu la nga riki Mbhoni loko u ta ka u nga hlanganyeli eka swiendlo swihi na swihi swa vukhongeri. Kambe loko Mukreste a xiya leswaku loko o ya emucatweni wolowo a nga ringeka leswaku a landzula misinya ya milawu ya Xikwembu, a nga vona swi antswa leswaku a nga yi. Loko a hlawula ku nga yi emucatweni kambe a hlawula ku ya enkhubyeni lowu nga ta va kona endzhakunyana tanihi munhu la rhambiweke, u fanele a tiyimisela ku ‘endla hinkwaswo leswaku a vangamisa Xikwembu.’ (1 Vakorinto 10:31) “Un’wana ni un’wana u ta rhwala ndzhwalo wakwe” hi ku endla swiboho sweswo. (Vagalatiya 6:5) Hikokwalaho, ku nga khathariseki leswaku u endla xiboho xihi, tsundzuka leswaku ku tshama u ri ni ripfalo lerinene emahlweni ka Yehovha Xikwembu i swa nkoka.