Swivutiso Swa Vahlayi

Hi rihi langutelo leri Mukreste a faneleke a va na rona hi ku hlota swiharhi ni ku phasa tinhlampfi?

Bibele a yi swi soli ku hlota swiharhi kumbe ku phasa tinhlampfi. (Deteronoma 14:4, 5, 9, 20; Matewu 17:27; Yohane 21:6) Hambiswiritano, Vakreste lava hlotaka swiharhi kumbe lava phasaka tinhlampfi va fanele va anakanya hi misinya yin’wana ya milawu ya Matsalwa.

Xikwembu xi pfumelele Nowa ni vatukulu vakwe leswaku va dlaya swiharhi leswaku va dya nyama ya swona, ntsendze loko va ta rhanga va halata ngati ya swona. (Genesa 9:3, 4) Xileriso lexi a xi kandziyisa leswaku vutomi bya swiharhi byi fanele byi xiximiwa tanihi leswi byi humaka eka Xikwembu. Xisweswo, Vakreste a va hlanganyeli emintlangwini ya ku titsakisa hi ku dlaya swiharhi kumbe va swi dlayela nsele ntsena.—Swivuriso 12:10.

Ku ni mhaka yin’wana leyi khumbaka langutelo ra hina. Handle ko kanakana vaapostola lava a va ri vaphasi va tinhlampfi a va tsaka loko va phase tinhlampfi to tala. Hambiswiritano, ku hava xiviko lexi kombisaka leswaku a va tibuma hi vutshila bya vona bya ku phasa tinhlampfi kumbe bya ku hlota swiharhi, kumbe ku phikizana hi ku phasa tinhlampfi kumbe hi ku hlota swiharhi ku kombisa leswaku i vavanuna, kumbe ku tsakisiwa hi ku swi hlongorisa, ku swi lwisa hambi ku ri ku swi dlaya.—Pisalema 11:5; Vagalatiya 5:26.

Xisweswo hi nga ha tivutisa: ‘Xana ndzi veka xikombiso lexinene hi ku xixima langutelo ra Yehovha hi vutomi? Xana minkarhi hinkwayo ndzi ehleketa ni ku vulavula hi ku hlota swiharhi kumbe ku phasa tinhlampfi? Xana ndlela leyi ndzi hanyaka ha yona yi kombisa leswaku ndzi rhandza ku hlota swiharhi ni ku phasa tinhlampfi, kumbe yi kombisa leswaku ndzi nandza wa Xikwembu? Xana ku hlota swiharhi kumbe ku phasa tinhlampfi swi endla leswaku ndzi heta nkarhi wo tala ni vanhu lava nga riki vapfumeri kumbe swi endla leswaku ndzi honisa ndyangu wa mina?’—Luka 6:45.

Van’wana lava hlotaka swiharhi kumbe va phasaka tinhlampfi hi xikongomelo xo lava swakudya va nga ha honisa timhaka ta Mfumo loko va ri eku hloteni ka swiharhi kumbe eku phaseni ka tinhlampfi, va vula leswaku va ni xivangelo lexi twalaka xa ku endla tano. Hambiswiritano, hi kombisa leswaku hi ni ripfumelo eka Xikwembu nileswaku ha xi tshemba loko hi nga pfumeleli nchumu wu hi kavanyeta entirhweni wa xona. (Matewu 6:33) Ku tlula kwalaho, Vakreste va xixima milawu hinkwayo ya “Khezari” malunghana ni ku hlota swiharhi kumbe ku phasa tinhlampfi, ku nga khathariseki leswaku valawuri va sindzisa leswaku yi xiximiwa kumbe yi nga xiximiwi.—Matewu 22:21; Varhoma 13:1.

Swi nga ha lava leswaku van’wana va lulamisa langutelo ra vona malunghana ni minkongomiso ya Yehovha, leswaku va fambisana ni langutelo ra yena hi ku hlota swiharhi ni ku phasa tinhlampfi. (Vaefesa 4:22-24) Hi hala tlhelo, hi fanele hi xixima swiboho leswi van’wana va swi endlaka hi ku pfumelelana ni ripfalo ra vona. Muapostola Pawulo u nyikele ndzayo leyi faneleke emhakeni leyi loko a ku: “Hi nga ha tshuki hi avanyisana, kambe swi endleni xiboho xa n’wina leswaku mi nga tshuki mi vekela makwenu xikhunguvanyiso.” (Varhoma 14:13) Ku kombisana rirhandzu ro tano leri nga riki na vutianakanyi ni ku xiximana swi kondletela ku rhula evandlheni naswona swi tsakisa Muvumbi wa hina, loyi a nga Xihlovo xa vutomi hinkwabyo.—1 Vakorinto 8:13. *

[Nhlamuselo ya le hansi]