A Ku Na Tlhari Leri Endleriweke Ku Ku Hlasela Leri Nga Ta Humelela
A Ku Na Tlhari Leri Endleriweke Ku Ku Hlasela Leri Nga Ta Humelela
‘Tlhari rihi ni rihi leri endleriwaka ku ku hlasela a ri nge humeleli.’—ESAYA 54:17.
1, 2. Swilo leswi humeleleke Timbhoni ta Yehovha ta le Albania swi wu kombisa njhani ntiyiso wa marito ya Esaya 54:17?
EKA makume ya malembe lama hundzeke, etikweni rin’wana leri nga edzonga-vuxa bya Yuropa leri nga ni swintshabyana, a ku ri ni ntlawa wa Vakreste lava nga ni xivindzi. Hulumendhe ya Vukhomunisi leyi nga pfumeriki leswaku Xikwembu xi kona, yi endle hinkwaswo leswi yi nga swi kotaka leswaku yi wu herisa. Hambiswiritano, ku xanisiwa, tikampa ta nxaniso ni ku haxiwa ka rungula ra mavunwa eka swihaxa-mahungu swi tsandzekile ku wu endla wu landzula ripfumelo ra wona. Ntlawa wolowo wa Vakreste a ku ri vamani? I Timbhoni ta Yehovha ta le Albania. Hambileswi ku khoma minhlangano ni ku chumayela a swi tika ngopfu, ku phikelela ka tona ku ringana makume ya malembe swi endle leswaku Vukreste ni vito ra Yehovha swi dzunisiwa. Hi 2006 loko ku nyiketeriwa miako ya rhavi ra tona lerintshwa, Mbhoni leyi nga ni malembe yo tala yi tshembekile yi te: “Ku nga khathariseki leswaku Sathana u ringeta hi matimba ku fikela kwihi, u tshamela ku hluriwa kasi Yehovha u tshamela ku hlula!”
2 Leswi hinkwaswo i vumbhoni lebyi tiyeke bya leswaku xitshembiso xa Xikwembu malunghana ni vanhu va xona xi tshembekile, hilaha xi tsariweke hakona eka Esaya 54:17 leyi nge: “Tlhari rihi ni rihi leri nga ta endleriwa ku ku hlasela a ri nge humeleli, ni ririmi rihi ni rihi leri nga ta kanetana na wena ehubyeni u ta ri gweva.” Matimu ma tiyisekisa leswaku ku hava lexi misava ya Sathana yi nga xi endlaka leswaku yi sivela malandza lama tinyiketeleke ku gandzela Yehovha Xikwembu.
Matshalatshala Ya Sathana Lama Nga Humelelangiki
3, 4. (a) I yini leswi katsekaka eka matlhari ya Sathana? (b) Matlhari ya Diyavulosi ma tsandzeke hi ndlela yihi?
3 Matlhari lama tirhisiweke ku hlasela vagandzeri va ntiyiso ma katsa ku yirisiwa ka ntirho wa Timbhoni, ku xanisiwa hi ntshungu wa vapfukeri, ku pfaleriwa emakhotsweni ni ku “kunguhata khombo hi xileriso xa nawu.” (Pisalema 94:20) Kahle-kahle, ematikweni man’wana, ni laha Timbhoni ta Yehovha ti hlayaka xihloko lexi, vutshembeki bya Vakreste volavo va ntiyiso eka Xikwembu bya karhi bya “ringiwa” hi ndlela yo karhi.—Nhlavutelo 2:10.
4 Hi xikombiso, rhavi rin’wana ra Timbhoni ta Yehovha ri vike leswaku hi lembe rin’we ntsena, ku ve ni swiendlakalo swa 32 leswi eka swona malandza ya Xikwembu ma biweke loko ma ri entirhweni wo chumayela. Ku engetela kwalaho, ku ve ni swiendlakalo swa 59 swa ku pfaleriwa ka Timbhoni hi maphorisa—lavatsongo ni lavakulu, vavanuna ni vavasati—leti a ti chumayela erivaleni. Tin’wana ti kandziyisiwe tintiho, ti tekiwa swifaniso ni ku pfaleriwa emakhotsweni ku fana ni swigevenga. Van’wana va chavisiwe hi ku byeriwa leswaku va ta biwa. Etikweni rin’wana, sweswi ku ni milandzu yo tlula 1 100 ya ku khomiwa, ya ku rihisiwa kumbe ku biwa ka Timbhoni ta Yehovha. Eka milandzu leyi, yo tlula 200 yi humelele hi siku leri a ti hlengeletanele ku tsundzuka rifu ra Yesu! Nilokoswiritano, moya wa Yehovha wu endle leswaku vanhu vakwe va pona ku nga khathariseki swihinga leswikulu ematikweni lawa ni le matikweni man’wana. (Zakariya 4:6) Nxaniso wa tihanyi wa valala a wu nge yi pfali milomu ya lava dzunisaka Yehovha. Ina, ha tiyiseka leswaku ku hava tlhari leri nga hlulaka xikongomelo xa Xikwembu.
Ririmi Leri Vulavulaka Mavunwa Ri Gweviwile
5. Hi rihi ririmi ra mavunwa leri pfukeleke malandza ya Yehovha hi lembe-xidzana ro sungula?
5 Esaya u profete leswaku vanhu va Xikwembu a va ta gweva ririmi rihi ni rihi leri a ri ta va pfukela. Hi lembe-xidzana ro sungula, Vakreste hakanyingi a va onhiwa vito ni ku vuriwa vaendli va leswo biha. Marito lama kumekaka eka Mintirho 16:20, 21 i swin’wana swa swihehlo sweswo: “Vanhu lava va pfilunganya muti wa hina swinene, . . . naswona va twarisa mikhuva leyi swi nga pfumeleriwiki leswaku hina hi yi amukela kumbe hi hanya ha yona, hikuva hi Varhoma.” Eka xiendlakalo xin’wana, vakaneti va vukhongeri va kucetele vafumi va muti leswaku va lwisana ni valandzeri va Kreste, va ku: “Vanhu lava va pfuxeke ngundzungundzu emisaveni leyi akiweke va kona ni laha, naswona . . . va endla leswi lwisanaka ni swileriso swa nawu wa Khezari.” (Mintirho 17:6, 7) Va vule leswaku muapostola Pawulo i “ntungu” tlhelo murhangeri wa mpambukwa lowu vangaka ku pfukeriwa ka mfumo “emisaveni hinkwayo leyi akiweke.”—Mintirho 24:2-5.
6, 7. Hi yihi ndlela yin’wana leyi Vakreste va ntiyiso va gwevaka marito lama va tlhaviwaka ha wona?
6 Hikwalaho a swi hi hlamarisi leswi Vakreste va ntiyiso namuntlha va onhiwaka vito hi vomu ni ku hehliwa hi mavunwa ya rihlaza. Ha yini ku nga vuriwaka leswaku hi gweva marito yo tano yo tlhava?—Esaya 54:17.
7 Hakanyingi mahanyelo lamanene ya Timbhoni ta Yehovha ma kaneta swihehlo swo tano ni rungula ra mavunwa leri haxiwaka eka swihaxa-mahungu. (1 Petro 2:12) Loko Vakreste va tikombisa va ri vaaka-tiko lava yingisaka nawu va tlhela va va ni mahanyelo lamanene ni ku khathala swinene hi vuhlayiseki bya vanhu-kulobye, swihehlo leswi va hehliwaka ha swona swi hundzuka swa mavunwa. Ku tikhoma ka hina lokunene ka vulavula. Leswi vanhu lava hi langutaka va xiyaka ku phikelela ka hina eku endleni leswinene, hakanyingi va susumeteleka ku dzunisa Tata wa hina wa le tilweni ni ku pfumela leswaku mahanyelo ya malandza yakwe ma tlakuke swinene.—Esaya 60:14; Matewu 5:14-16.
8. (a) I yini leswi minkarhi yin’wana hi nga ha bohekaka ku swi endla leswaku hi yimelela xiboho xa hina lexi sekeriweke eMatsalweni? (b) Ku fana na Kreste, hi ri gweva hi ndlela yihi ririmi leri kanetaka?
8 Hambiloko hi tikhoma hi ndlela leyi amukelekaka eka Xikwembu, minkarhi yin’wana hi nga ha boheka ku xi yimelela hi xivindzi xiboho xa hina lexi sekeriweke eMatsalweni. Ndlela yin’wana i ku lava mpfuno wa tihulumendhe ni tihuvo ta milawu leswaku ti hi sirhelela. (Estere 8:3; Mintirho 22:25-29; 25:10-12) Loko Yesu a a ha ri laha misaveni, minkarhi yin’wana u hlamule vaxopaxopi vakwe erivaleni, a kaneta swihehlo swa vona swa mavunwa. (Matewu 12:34-37; 15:1-11) Ku fana na Yesu, hi tsakela ku hlamusela lava lavaka ku tiva vupfumeri bya hina. (1 Petro 3:15) Hi nga tshuki hi pfumelela leswaku ku hlekuriwa exikolweni, entirhweni kumbe hi maxaka lama nga riki Timbhoni swi hi tshikisa ku chumayela ntiyiso wa Rito ra Xikwembu.—2 Petro 3:3, 4.
Yerusalema—“Ribye Ro Tika”
9. Hi wihi Yerusalema lowu fanekiseriwaka hi “ribye ro tika” leri ku vulavuriweke ha rona eka Zakariya 12:3, naswona wu yimeriwa hi vamani laha misaveni?
9 Vuprofeta bya Zakariya byi hi paluxela leswaku ha yini matiko ma kaneta Vakreste va ntiyiso. Xiya leswi Zakariya 12:3 yi swi vulaka: “Esikwini rero ndzi ta endla Yerusalema wu va ribye ro tika eka vanhu hinkwavo.” Hi wihi Yerusalema lowu vuprofeta lebyi byi kombetelaka eka wona? Vuprofeta bya Zakariya malunghana na Yerusalema byi kombetela eka “Yerusalema wa le tilweni,” ku nga Mfumo wa le tilweni lowu Vakreste lava totiweke va vitaneriweke eka wona. (Vaheveru 12:22) Ntlawa wutsongo wa masalela ya vadyandzhaka lava va Mfumo wa Mesiya ma ha ri kona emisaveni. Wona swin’we ni vanghana va wona, ku nga “tinyimpfu tin’wana,” va khutaza vanhu leswaku va titsongahatela Mfumo wa Xikwembu loko nkarhi wa ha ri kona. (Yohane 10:16; Nhlavutelo 11:15) Matiko ma angule njhani eka xirhambo lexi? Naswona i nseketelo wa muxaka muni lowu Yehovha a wu nyikaka vagandzeri va ntiyiso namuntlha? A hi kumeni nhlamulo loko hi ya emahlweni hi kambisisa nhlamuselo ya Zakariya ndzima 12. Loko hi endla tano, hi ta kuma xitiyisekiso xa leswaku ‘ku hava tlhari leri nga ta humelela’ ku lwisana ni vatotiwa va Xikwembu swin’we ni vanghana va vona lava tinyiketeleke.
10. (a) Ha yini vanhu va Xikwembu va hlaseriwa? (b) Ku endleke yini eka lava ringeteke ku susa “ribye ro tika” endleleni?
10 Zakariya 12:3 yi kombisa leswaku matiko ma kuma “swivati leswi vavaka.” Swi endlekisa ku yini leswi? Xikwembu xi lerise leswaku mahungu lamanene ya Mfumo ma fanele ma chumayeriwa. Timbhoni ta Yehovha ti xi tekela enhlokweni xileriso xa ku chumayela. Hambiswiritano, ku twarisiwa ka Mfumo tanihi wona ntsena ntshembo wa vanhu swi ve “ribye ro tika” eka matiko. Ma ringeta ku ri susa endleleni hi ku sivela vachumayeri va Mfumo. Hi ku endla tano, matiko wolawo lama sivelaka ntirho lowu ma “tivangela swivati leswi vavaka,” ma xekeleriwa etindhawini to tala. Ma ti onhela ni vito tanihi leswi ma tsandzekaka hi ndlela leyi khomisaka tingana. A ma nge swi koti ku pfala milomu ya vagandzeri va ntiyiso, lava tsakelaka lunghelo ra ku twarisa “mahungu lamanene lama nga heriki” ya Mfumo wa Xikwembu wa Mesiya ku nga si fika makumu ya mafambiselo lawa ya swilo. (Nhlavutelo 14:6) Loko murindzi wa khotso etikweni rin’wana ra le Afrika a vona malandza ya Yehovha ma xanisiwa, u te: ‘Mi tidyela nkarhi hi ku xanisa vanhu lava. A va nge ri landzuli ripfumelo ra vona. Va ya emahlweni va andza.’
11. Xikwembu xi xi hetisise njhani xitshembiso xa xona lexi nga eka Zakariya 12:4?
11 Hlaya Zakariya 12:4. Yehovha u tshembise leswaku lava lwisanaka ni varhumiwa vakwe va Mfumo lava nga ni xivindzi u ta va dlaya mahlo a tlhela a va ‘pfilunganya’ hi ndlela yo fanekisela. U ri hetisisile rito rakwe. Hi xikombiso, etikweni rin’wana laha vugandzeri bya ntiyiso a byi yirisiwile, vakaneti va tsandzekile ku sivela vanhu va Xikwembu ku kuma swakudya swa moya. Phepha-hungu rin’wana ri kale ri vula leswaku Timbhoni ta Yehovha a ti tirhisa tibaluni leswaku ti nghenisa minkandziyiso leyi sekeriweke eBibeleni etikweni! Xitshembiso lexi landzelaka xa Xikwembu eka malandza ya xona yo tshembeka xi hetisekile: “Ndzi ta pfula mahlo ya mina, hanci yin’wana ni yin’wana ya vanhu ndzi ta yi ba hi ku yi dlaya mahlo.” Leswi valala va Mfumo va dlayiweke mahlo hi vukarhi hi ndlela yo fanekisela, a va swi tivi leswaku va fanele va endla yini. Kambe ha tiyiseka leswaku Yehovha u ta ponisa vanhu vakwe tanihi ntlawa ni ku khathala hi vuhlayiseki bya vona.—2 Tihosi 6:15-19.
12. (a) Yesu u lumeke ndzilo hi ndlela yihi loko a a ha ri laha misaveni? (b) Masalela ya vatotiwa ma lumeke swilo hi ndlela yihi yo fanekisela naswona ku ve ni vuyelo byihi?
12 Hlaya Zakariya 12:5, 6. Xiga lexi nge “tindhuna ta Yuda” xi kombetela eka lava rhangelaka exikarhi ka vanhu va Xikwembu. Yehovha u endla leswaku vanhu vakwe va ti hisekela swinene timhaka ta laha misaveni ta Mfumo wakwe. Siku rin’wana Yesu u byele vadyondzisiwa vakwe a ku: “Ndzi tele ku ta lumeka ndzilo emisaveni.” (Luka 12:49) Hakunene u wu lumekile ndzilo wo fanekisela. Mhaka-nkulu leyi Yesu a a chumayela ha yona hi ku hiseka a ku ri Mfumo wa Xikwembu. Leswi swi pfuxe njhekanjhekisano lowukulu erixakeni hinkwaro ra Vayuda. (Matewu 4:17, 25; 10:5-7, 17-20) Hilaha ku fanaka, ku “fana ni mbita ya ndzilo exikarhi ka mirhi ni ku fana ni xisana lexi pfurhaka enyandzeni ya mavele lama ha ku tsemiwaka,” lava landzelaka mikondzo ya Kreste esikwini ra hina va lumeka swilo hi ndlela yo fanekisela. Buku leyi nge The Finished Mystery * leyi tsariweke hi 1917 yi byi paluxe hilaha ku heleleke vukanganyisi bya Vujagana. Sweswo swi hlundzukise vafundhisi. Eminkarhini ya sweswinyana, Kingdom News No. 37, leyi nga ni xihloko lexi nge “Vukhongeri Bya Mavunwa Byi Ta Lovisiwa Ku Nga Ri Khale!” yi susumetele vanhu vo tala leswaku va teka xiboho xo amukela Mfumo wa Xikwembu kumbe xo lwisana na wona.
“Mintsonga Ya Yuda” Yi Ponisiwile
13. Xiga lexi nge “mintsonga ya Yuda” xi kombisa yini naswona ha yini Yehovha a ponisa lava hlaseriwaka?
13 Hlaya Zakariya 12:7, 8. EIsrayele wa khale, mintsonga a yi hlawulekile etikweni, minkarhi yin’wana a yi tirhisiwa hi varisi ni varimi. Vanhu volavo a va ta hlaseriwa ku sungula naswona a va ta lava nsirhelelo loko tiko leri nga nala ri tele ku ta hlasela muti wa Yerusalema. Xiga lexi nge “mintsonga ya Yuda” xi kombisa leswaku masalela lama totiweke eminkarhini ya hina ma tshame endhawini leyi nga sirheleriwangiki, emitini leyi nga tiyisiwangiki hi ndlela yo fanekisela. Kwalaho ma lwela timhaka ta Mfumo wa Mesiya hi xivindzi. Yehovha wa mavuthu u ta ponisa “mintsonga ya Yuda ku sungula” hikuva hi yona leyi Sathana a yi hlaselaka ngopfu.
14. Yehovha u sirhelela lava nga eka “mintsonga ya Yuda” ni ku va endla va nga khunguvanyeki hi ndlela yihi?
14 Matimu ma kombisa leswaku Yehovha u sirhelela vayimeri lava nga vatotiwa va Mfumo eka “mintsonga” ya vona leyi nga erivaleni. * U endla leswaku va nga ‘khunguvanyeki,’ hi ku va endla va va ni matimba ni xivindzi ku fana na Davhida, hosi leyi nga nhenha.
15. Ha yini Yehovha a “lava ku lovisa matiko hinkwawo,” naswona u ta swi endla rini sweswo?
15 Hlaya Zakariya 12:9. Ha yini Yehovha a “lava ku lovisa matiko hinkwawo”? Hikuva ma kaneta Mfumo wa Mesiya hi ku phikelela. Ma gweviwile hileswi ma karhataka ni ku xanisa vanhu va Xikwembu. Ku nga ri khale, vayimeri va Sathana va laha misaveni va ta tiyimisela ku hlasela vagandzeri va Xikwembu ro hetelela, leswi nga ta endla leswaku xiyimo xa misava xi hundzuka lexi hlamuseriweke eBibeleni tanihi Har–Magedoni. (Nhlavutelo 16:13-16) Kutani Muavanyisi La Tlakukeke u ta sirhelela malandza yakwe ni ku kwetsimisa vito rakwe exikarhi ka matiko leswaku a lwisana ni nhlaselo wolowo.—Ezekiyele 38:14-18, 22, 23.
16, 17. (a) “Ndzhaka ya malandza ya Yehovha” i yini? (b) Xana ku tiyisela ka hina minhlaselo ya Sathana i vumbhoni bya yini?
16 Sathana a nga na rona tlhari leri nga tsanisaka ripfumelo ra vanhu va Xikwembu emisaveni hinkwayo kumbe ku endla leswaku va nga ha hiseki. Ku rhula loku hi vaka na kona hikwalaho ko tiva leswaku Yehovha wa hi seketela hi matimba yakwe lama ponisaka i “ndzhaka ya malandza ya Yehovha.” (Esaya 54:17) Ku hava munhu la nga hi tekelaka ku rhula loku hi nga na kona swin’we ni ku fuwa hi tlhelo ra moya. (Pisalema 118:6) Sathana u ta hambeta a hlohlotela nkaneto ni ku ringeta ku hi vangela nhlomulo. Ku tiyisela ka hina hi ku tshembeka ku nga khathariseki ku sandziwa i vumbhoni bya leswaku moya wa Xikwembu wu na hina. (1 Petro 4:14) Mahungu lamanene ya Mfumo wa Yehovha lowu simekiweke ma karhi ma chumayeriwa emisaveni hinkwayo. Vanhu va Xikwembu va hoxiwe hi “maribye ya xipelupelu” yo fanekisela, ku nga nkaneto lowukulu. Kambe hikwalaho ka matimba ya Yehovha, malandza yakwe ma hlula maribye yo tano, ma herisa vuyelo bya wona. (Zakariya 9:15) Masalela lama totiweke ni vanghana va wona vo tshembeka a va nge tshikisiwi ku chumayela!
17 Hi ku langutele hi mahlo-ngati ku ponisiwa hi ku helela eka minhlaselo ya Diyavulosi. Hakunene xa hi chavelela xitiyisekiso xa leswaku ‘tlhari rihi ni rihi leri nga ta endleriwa ku hi hlasela a ri nge humeleli, ni ririmi rihi ni rihi leri nga ta kanetana na hina ehubyeni hi ta ri gweva’!
[Tinhlamuselo ta le hansi]
^ par. 12 Yi kandziyisiwe hi Timbhoni ta Yehovha kambe sweswi a ya ha kandziyisiwi.
^ par. 14 Leswaku u kuma vuxokoxoko lebyi engetelekeke, vona buku leyi nge Timbhoni Ta Yehovha I Vahuweleri Va Mfumo Wa Xikwembu, eka matluka 675-6, leyi kandziyisiweke hi Timbhoni ta Yehovha.
U Nga Hlamula Njhani?
• I yini leswi kombisaka leswaku matlhari ya Sathana ma tikombe ma nga humeleli?
• Yerusalema wa le tilweni u ve “ribye ro tika” hi ndlela yihi?
• Yehovha u ponise “mintsonga ya Yuda” hi ndlela yihi?
• Leswi hi nga kusuhi ni siku ra Armagedoni, i yini lexi u tiyisekaka ha xona?
[Swivutiso Swa Dyondzo]
[Swifaniso eka tluka 21]
Vanhu va Yehovha eAlbania va tshame va tshembekile ku nga khathariseki minhlaselo ya Sathana
[Xifaniso eka tluka 23]
Yesu u kanete swihehlo swa mavunwa
[Swifaniso eka tluka 24]
Ku hava tlhari leri endleriweke ku hlasela lava chumayelaka mahungu lamanene leri nga ta humelela