“Nyiko Ya Wena Ya Nkoka Ngopfu”

YOLEYO i ndlela leyi khale ka holobye-nkulu wa le Belgium a yi hlamuseleke ha yona buku leyi nge Nghwazi Leyi Tshameke Yi Hanya. * U endzeriwe hi muakelani wakwe leswaku va ta bula, naswona u nyikiwe kopi ya buku yoleyo. Endzhakunyana u tsale papila ro nkhensa, a ku: “Riendzo ra wena ri ndzi khumbe swinene, naswona lexi ndzi khumbeke ku tlurisa i nyiko ya wena ya nkoka ngopfu: buku leyi vulavulaka hi ‘Nghwazi.’”

Khale ka holobye-nkulu yoloye u kambisise buku leyi kutani a gimeta hi ku vula leswi: “Loko vanhu a va ri ni mhaka ni rungula leri nga eka Evhangeli naswona va hanya hi misinya ya milawu ya Yesu Kreste, misava ya namuntlha a yi ta cinca hi ku helela. Kutani a hi nga ta lava Huvo ya Nsirhelelo; vutherorisi a byi nga ta va kona, naswona madzolonga a ma ta yirisiwa emisaveni.” Hambileswi a pfumeleke leswaku mhaka yoleyo yi vonaka yi ri norho, u vule leswaku u xixima goza leri tekiweke hi muakelani wakwe ro n’wi endzela leswaku va bula.

Papila ri ya emahlweni ri ku: “Wena u un’wana wa ntlawa wa vanhu lava bumabumeriwaka hikwalaho ka leswi va navelelaka van’wana leswinene, lava nga ni langutelo lerinene hi swilo, ku nga ri lava langutelaka swilo swo biha, kambe vanhu lava pfumelaka leswaku vanhu ni swilo leswi nga laha misaveni swi nga hundzuka swi va leswo antswa.”

Timbhoni ta Yehovha ti pfumela leswaku ku nghenelela ka Xikwembu etimhakeni ta vanhu, ku nga ri matshalatshala ya vanhu, swi ta endla leswaku misava yi cinciwa yi va leyo antswa eku heteleleni. Ti ringeta ku tekelela nghwazi, ku nga Yesu Kreste. Xana Timbhoni ta Yehovha ti tshame ti ku endzela sweswinyana? A swi kanakanisi leswaku u ta swi tsakela ku bula na tona hi nghwazi leyi tshameke yi hanya emisaveni. Naswona ti ta swi tsakela ku ku nyika buku leyi n’wi khumbeke swinene khale ka holobye-nkulu.

[Nhlamuselo ya le hansi]