Wa Tsundzuka Xana?

Xana u swi tsakerile ku hlaya minkandziyiso ya sweswinyana ya Xihondzo xo Rindza? A hi vone loko u nga hlamula swivutiso leswi landzelaka:

• Ha yini “Testamente ya Khale” yi ri ya nkoka swinene?

Mutsari wa yona a hi xikwembu lexi nga ni nsele kambe i Xikwembu lexi nga ni rirhandzu, ku nga Yehovha. Yesu ni valandzeri vakwe vo sungula va hambete va tshaha Matsalwa ya Xiheveru. Ma ni ndzayo leyi tirhaka evuton’wini bya siku ni siku naswona ma hi nyika ntshembo lowu tsakisaka hi vumundzuku.—9/1, matluka 4-7.

• Ku va ku tshikiwe nkarhi wo leha wu hundza endzhaku ka loko Adamu na Evha va dyohile swi pfune yini?

Eka malembe ya kwalomu ka 6 000 ku sukela loko va dyohile, Sathana u vonake a ri muhembi—Adamu na Evha ni vatukulu va vona va timiliyoni va file. Nkarhi wu kombise leswaku vanhu a swi va fambeli kahle loko va nga fumiwi hi Xikwembu naswona a va na yona mfanelo kumbe vuswikoti byo kongomisa mikondzo ya vona.—9/15, matluka 6-7.

• Ha yini Yakobe a nga soriwanga hileswi a tiendleke onge i Esawu?

Yakobe a a ri ni mfanelo yo katekisiwa hi tata wakwe tanihi leswi a a xave mfanelo ya ku va mativula eka Esawu. Loko Isaka a xiye leswaku u katekise Yakobe, a nga ringetanga ku cinca leswi a swi vuleke. Loko Xikwembu a xi nga swi lavanga leswaku ku katekisiwa Yakobe, a xi ta va xi nghenelerile.—10/1, tluka 31.

• Ripfalo leri hi nga na rona ri yi kaneta njhani dyondzo ya leswaku swiharhi swi hundzuka vanhu?

Vanhu va tinxaka hinkwato ni va mindhavuko hinkwayo va tsakela ku pfuna van’wana, hambiloko ku endla tano swi va hoxa ekhombyeni. Vanhu a va nga ta swi kota ku kombisa moya wo tano wo pfumala vutianakanyi loko a va ri swiharhi leswi endlaka xin’wana ni xin’wana leswaku swi kota ku hanya.—10/15, tluka 20.

• Ha yini hi nga vulaka leswaku Xikwembu xa titsongahata, naswona xi yi kombisa hi ndlela yihi mfanelo leyi?

Leswi Xikwembu xi nga Hosi Leyikulu ni Muvumbi, a xi tsananga ku fana na hina. Kambe, hi ku ya hi 2 Samuwele 22:36, Xikwembu xa titsongahata hikwalaho ka leswi xi khathalaka hi vanhu va xiyimo xa le hansi lava ringetaka ku xi tsakisa, naswona xi va komba musa. Xa korhama, hi ndlela yo fanekisela leswaku xi ta tirhisana hi ku titsongahata ni vanhu lava xi chavaka.—11/1, matluka 4-5.

• Swibya swa khale swa vumba swi tiyisekisa timhaka leti nga eBibeleni hi ndlela yihi?

Le Samariya vayimburi va kume swirhengele leswi nga ni mavito ya nkombo ya mindyangu lama tsariweke eka Yoxuwa 17:1-6. Swirhengele swa le Aradi swi tiyisekisa rungula leri vulavulaka hi mindyangu ya vaprista naswona swi boxa vito ra Xikwembu. Swibya swa vumba swa le Lakixi swi hlamusela xiyimo xa tipolitiki ni mpfilumpfilu lowu a wu ri kona etikweni ra Yuda loko Vababilona va nga si ri hlasela.—11/15, matluka 12-14.

• I yini lexi endlaka hi gimeta hileswaku Luka hi yena a nga tsala buku ya Mintirho?

Evhangeli ya Luka ni Mintirho ya Vaapostola swi kongomisiwe eka Teyofilo, leswi kombisaka leswaku Luka hi yena a tsaleke tibuku letimbirhi. Ku tirhisiwa ka risivi “hi” na “hina,” swi kombisa leswaku Luka u hoxe xandla eka swiendlakalo swin’wana. (Mintirho 16:8-15)—11/15, tluka 18.

• Hi rihi langutelo leri Mukreste a faneleke a va na rona hi ku hlota swiharhi ni ku phasa tinhlampfi?

Ku sukela esikwini ra Nowa, Xikwembu xi pfumelele vanhu leswaku va dlaya swiharhi leswaku va dya nyama ya swona. Kambe, xileriso xa leswaku va halata ngati ya swona xi kandziyisa leswaku vutomi bya swiharhi byi fanele byi xiximiwa tanihi leswi byi humaka eka Xikwembu. Vakreste a va fanelanga va hlanganyela emintlangwini ya ku dlaya swiharhi kumbe va tsakisiwa hi ku swi hlongorisa kumbe ku swi dlaya. I swa nkoka ku xixima milawu ya Khezari ni ku anakanyela ripfalo ra van’wana. (Varhoma 14:13)—12/1, tluka 31.