Xana U Ni Mutsundzuxi Loyi A Ku Pfunaka Leswaku U Tirhela Xikwembu?

LOKO Uzhiya a ri ni malembe ya 16, u ve hosi ya mfumo wa le dzongeni wa Yuda. U fume malembe yo tlula 50, ku sukela eku heleni ka lembe-xidzana ra vukaye ku ya fikela eku sunguleni ka lembe-xidzana ra vunhungu B.C.E. Uzhiya, u “hambet[e] a endla leswi lulameke ematihlweni ya Yehovha ku sukela loko a ha ri ntsongo.” I yini leswi n’wi susumeteleke ku famba hi ndlela yo lulama? Xiviko xa matimu xi ri: “[Uzhiya u ye] emahlweni a susumeteleka ku lava Xikwembu emasikwini ya Zakariya, muleteri emhakeni ya ku chava Xikwembu xa ntiyiso; naswona emasikwini lawa a a lava Yehovha ha wona, Xikwembu xa ntiyiso xi n’wi katekisile.”—2 Tikronika 26:1, 4, 5.

A ku tiviwi swilo swo tala malunghana na Zakariya, mutsundzuxi wa hosi, handle ka xiviko lexi xa le Bibeleni. Kambe leswi Zakariya a a ri “muleteri emhakeni ya ku chava Xikwembu xa ntiyiso” u ve ni nsusumeto lowunene ngopfu eka hosi yoleyo leyi a ya ha ri muntshwa leswaku yi endla leswi a swi ri swinene. Buku yin’wana yi vula leswaku a swi ri erivaleni leswaku Zakariya a a ri “wanuna loyi a a ma tiva kahle Matsalwa, loyi a a ri ni ntokoto wo tala etimhakeni ta vukhongeri naswona a a vulavula hi vutivi byakwe.” (The Expositor’s Bible) Mukambisisi un’wana wa Bibele u gimete hi marito lawa malunghana na Zakariya: “A a ti tiva swinene timhaka ta vuprofeta naswona . . . a a tlharihile, a a tinyiketerile, a a ri wanuna wo lulama; naswona swi tikomba a n’wi susumetele ngopfu Uzhiya.”

Ndlela yo tshembeka leyi Uzhiya a fambeke ha yona yi n’wi tisele mikateko yo tala, naswona u “kombise ntamu lowukulu ngopfu” hikuva “Xikwembu xa ntiyiso xi hambet[e] xi n’wi pfuna.” Ina, ku humelela kakwe eka matshalatshala lama a ma endleke lama nga fambisaniki ni timhaka ta vukhongeri a swi titshege hi ku va a tikarhatela ku famba hi tindlela ta Xikwembu “emasikwini ya Zakariya.” (2 Tikronika 26:6-8) Endzhaku ka loko swilo swi n’wi fambele kahle Uzhiya, u tshike tidyondzo ta Zakariya, mutsundzuxi wakwe. ‘Mbilu ya Uzhiya yi titlakusile kukondza a vanga ku onhaka, lerova a endla hi ndlela leyi pfumalaka ku tshembeka eka Yehovha.’ Hikwalaho ka xiendlo xo karhi lexi nga kombisiki xichavo, u biwe hi vuvabyi bya nhlonge byo nyenyetsa, lebyi endleke leswaku a nga ha swi koti ku va hosi hi ku helela.—2 Tikronika 26:16-21.

Xana u na yena munhu loyi u nga n’wi vitanaka muleteri, mutsundzuxi loyi a ku khutazaka “ku lava Xikwembu”? U nga ha kuma mutsundzuxi wo tano ku nga khathariseki leswaku wa ha ri ntsongo kumbe se u kurile, u wanuna kumbe u wansati. Nkhensa mutsundzuxi yoloye hikuva ndzayo yakwe yi nga ku pfuna leswaku u tshama u ri karhi u endla leswi lulameke ematihlweni ya Yehovha. Yingisa Mukreste loyi a wupfeke naswona u yingiserisisa ndzayo leyi a ku nyikaka yona. U nga tshuki u honisa marito ya vutlhari ya “muleteri [wo tano] emhakeni ya ku chava Xikwembu xa ntiyiso.”—Swivuriso 1:5; 12:15; 19:20.