Xana U Ri Lunghekerile Siku Ra Yehovha?

“Siku lerikulu ra Yehovha ri le kusuhi. Ri le kusuhi, naswona ra hatlisa swinene.”—SOFANIYA 1:14.

1-3. (a) I yini leswi Bibele yi swi vulaka hi siku ra Yehovha? (b) Hi rihi “siku ra Yehovha” leri hi ri languteleke?

SIKU lerikulu ra Yehovha a ri lehanga tiawara ta 24, i nkarhi wo leha lowu a nga ta avanyisa lavo homboloka. Lava va nga xi gandzeliki Xikwembu va fanele va ri chava siku rero ra munyama, ra vukarhi, ra ku hlundzuka lokukulu, maxangu ni ku onhetela. (Esaya 13:9; Amosi 5:18-20; Sofaniya 1:15) Vuprofeta bya Yuwele byi ri: “Oho siku rero; hikuva siku ra Yehovha ri le kusuhi, ri ta ta ku fana ni ku phanga ka Lowa Matimba Hinkwawo!” (Yuwele 1:15) Hambiswiritano, hi siku rero lerikulu, Xikwembu xi ta va Muponisi wa lava “lulameke embilwini.”—Pisalema 7:10.

² Xiga lexi nge “siku ra Yehovha” xi vula ku avanyisa ka Xikwembu hi minkarhi yo hambana-hambana. Hi xikombiso, “siku ra Yehovha” ri fike loko a tirhisa Vababilona leswaku va lovisa vaaki va Yerusalema hi 607 B.C.E. (Sofaniya 1:4-7) Vuavanyisi lebyi fanaka bya Xikwembu byi humelele hi 70 C.E. loko Xikwembu xi tirhisa Varhoma leswaku va lovisa rixaka ra Vayuda lava aleke N’wana wa xona. (Daniyele 9:24-27; Yohane 19:15) Nakambe Bibele yi profeta hi “siku ra Yehovha” loko a ta ‘lwa ni matiko hinkwawo.’ (Zakariya 14:1-3) Hi ku huhuteriwa hi moya lowo kwetsima, muapostola Pawulo u hlanganise siku rero ni vukona bya Kreste, lebyi sunguleke loko Yesu a vekiwa exiluvelweni ku va Hosi ya le tilweni hi 1914. (2 Vatesalonika 2:1, 2) Leswi hi vonaka vumbhoni bya leswaku siku ra Yehovha ri tshinela hi xihatla, ndzimana ya lembe ya Timbhoni ta Yehovha ya 2007 a yi faneleka swinene. Yi tekiwe eka Sofaniya 1:14 leyi nge: “Siku lerikulu ra Yehovha ri le kusuhi.”

³ Leswi siku lerikulu ra Xikwembu ri nga kusuhi, sweswi i nkarhi wa leswaku u tshama u lunghekile. U nga ri lunghekela njhani siku rero? Xana ku ni swin’wana leswi engetelekeke leswi u faneleke u swi endla leswaku u lunghekela siku ra Yehovha?

Tshama U Lunghekile

4. Hi wihi ndzingo lowukulu lowu Yesu a a tilunghiselele ku langutana na wona?

⁴ Eka vuprofeta bya Yesu Kreste lebyi vulavulaka hi makumu ya mafambiselo lawa ya swilo, u byele vadyondzisiwa vakwe a ku: “Tshamani mi lunghekile.” (Matewu 24:44) Loko Yesu a vule marito wolawo, yena hi byakwe a a lunghekele ndzingo lowukulu—rifu rakwe leri nga gandzelo ra nkutsulo. (Matewu 20:28) Hi nga dyondza yini eka ndlela leyi Yesu a a tilunghiselele ha yona?

5, 6. (a) Ku rhandza Xikwembu ni vanhu swi hi pfuna njhani leswaku hi tshama hi lunghekele siku ra Yehovha? (b) I xikombiso xihi lexi Yesu a hi vekeleke xona malunghana ni ku rhandza vaakelani?

⁵ Yesu a a rhandza Yehovha ni milawu Yakwe yo lulama hi mbilu hinkwayo. Loko Vaheveru 1:9 yi vulavula hi Yesu yi ri: “U rhandze ku lulama, naswona u venge ku kala nawu. Hi yona mhaka leyi Xikwembu, Xikwembu xa wena, xi ku toteke hi mafurha ya ku khana ku tlula lava u tirhisanaka na vona.” Leswi Yesu a a rhandza Tata wakwe wa le tilweni, u tshame a tshembekile eka yena. Loko hi ri ni rirhandzu leri fanaka hi Xikwembu naswona hi hanya hi ku ya hi milawu ya xona, xi ta hi sirhelela. (Pisalema 31:23) Loko hi ri ni rirhandzu ni ku yingisa ko tano swi ta hi pfuna leswaku hi lunghekela siku lerikulu ra Yehovha.

⁶ Rirhandzu leri Yesu a a ri na rona hi vanhu a ri vonaka endleleni leyi a a hanya ha yona. Hakunene u ‘va twele vusiwana, hikuva a va vavisiwile ni ku tsalangana ku fana ni tinyimpfu leti nga riki na murisi.’ (Matewu 9:36) Kutani Yesu u chumayele mahungu lamanene eka vanhu, hilaha na hina hi susumetiwaka hi rirhandzu leswaku hi  chumayela rungula ra Mfumo eka vaakelani va hina. Ku rhandza Xikwembu ni vaakelani va hina swi hi endla hi tshama hi ri karhi hi hiseka tanihi vatirheli lava nga Vakreste, xisweswo swi hi pfuna ku lunghekela siku lerikulu ra Yehovha.—Matewu 22:37-39.

7. I yini lexi nga hi endlaka hi tsaka loko ha ha rindzele siku ra Yehovha?

⁷ Yesu a a tsakela ku endla ku rhandza ka Yehovha. (Pisalema 40:8) Loko hi ri ni langutelo leri fanaka, hi ta swi tsakela ku endlela Xikwembu ntirho wo kwetsima. Ku fana na Yesu, hi ta va vanhu lava hananaka, kutani leswi swi ta hi endla hi tsaka hakunene. (Mintirho 20:35) Ina, “ntsako wa Yehovha i khokholo ra [hina].” Loko hi ri ni ntsako wo tano, hi ta ri lunghekela swinene siku lerikulu ra Xikwembu.—Nehemiya 8:10.

8. Ha yini hi fanele hi tshinela eka Yehovha hi xikhongelo?

⁸ Ku khongela eka Xikwembu hi mbilu hinkwayo swi pfune Yesu leswaku a langutana ni miringo leyi ringeke ripfumelo rakwe. A a ri karhi a khongela loko Yohane a n’wi khuvula. Yesu u khongele vusiku hinkwabyo a nga si hlawula vaapostola vakwe. (Luka 6:12-16) Kutani ku hava muhlayi wa Bibele loyi swi nga n’wi khumbiki swikhongelo leswi Yesu a swi endleke hi mbilu hinkwayo hi vusiku byo hetelela evuton’wini byakwe bya laha misaveni. (Marka 14:32-42; Yohane 17:1-26) Xana u khongela minkarhi hinkwayo ku fana na Yesu? Khongela eka Yehovha nkarhi ni nkarhi, tinyike nkarhi wo tiphofula, lava nkongomiso wa moya lowo kwetsima naswona loko se u wu kumile wu tirhise hi ku hatlisa. Ku va ni vuxaka lebyikulu ni Tata wa hina wa le tilweni i swa nkoka eminkarhini leyi ya mangava tanihi leswi siku lerikulu ra Xikwembu ri tshinelaka hi ku hatlisa. Kutani, u nga kanakani ku hambeta u tshinela eka Yehovha hi xikhongelo.—Yakobo 4:8.

9. Ha yini swi ri swa nkoka ku khathala hi ku kwetsimisiwa ka vito ra Yehovha?

⁹ Ku khathala hi ku kwetsimisiwa ka vito ra Yehovha leri vangamaka swi tlhele swi pfuna Yesu leswaku a lunghekela miringo leyi n’wi humeleleke. Entiyisweni, u dyondzise valandzeri vakwe leswaku loko va khongela eka Xikwembu va fanele va katsa xikombelo lexi nge: “Vito ra wena a ri kwetsimisiwe.” (Matewu 6:9) Loko hi swi navela hi mbilu hinkwayo leswaku vito ra Yehovha ri kwetsimisiwa, hi ta lwela ku papalata ku endla nchumu wihi na wihi lowu nga tisaka xisandzu evitweni rakwe. Hikwalaho, hi ta va hi ri lunghekele kahle siku lerikulu ra Yehovha.

Xana U Fanele U Endla Mindzulamiso Yo Karhi?

10. Ha yini swi fanerile ku kambisisa vutomi bya hina?

¹⁰ Loko siku ra Yehovha ro fika mundzuku, xana u ta va u ri lunghekerile hakunene? Un’wana ni un’wana wa hina u fanele a kambisisa vutomi byakwe ku vona loko swiendlo swin’wana kumbe langutelo rakwe ri lava ku lulamisiwa. Tanihi leswi vutomi bya namuntlha byi komeke naswona byi cincaka hi xitshuketa, un’wana ni un’wana wa hina u fanele a tshama a xalamukile emoyeni siku ni siku. (Eklesiasta 9:11, 12; Yakobo 4:13-15) Kutani a hi kambisiseni swilo swin’wana leswi nga ha lavaka ku tekeriwa enhlokweni evuton’wini bya hina.

11. Hi yihi pakani leyi u tivekeleke yona yo hlaya Bibele?

 ¹¹ Xilo xin’wana xa nkoka i xikhutazo xa ‘hlonga ro tshembeka’ xa leswaku hi hlaya Bibele siku ni siku. (Matewu 24:45) U nga tivekela pakani yo hlaya ni ku anakanyisisa hi Matsalwa ku sukela eka Genesa ku ya eka Nhlavutelo lembe ni lembe. Hi ku hlaya tindzimana ta mune hi siku, u nga kota ku hlaya tindzima ta Bibele ta 1 189 hi lembe rin’we. Hosi yin’wana ni yin’wana ya le Israyele a yi fanele yi hlaya Nawu wa Yehovha “masiku hinkwawo ya vutomi [bya yona].” Entiyisweni, Yoxuwa u endle tano. (Deteronoma 17:14-20; Yoxuwa 1:7, 8) Hakunene i swa nkoka leswaku vakulu evandlheni va hlaya Rito ra Xikwembu siku ni siku, hikuva leswi swi va pfuna leswaku va dyondzisa “dyondzo leyi hanyisaka”!—Tito 2:1.

12. Leswi siku ra Yehovha ri nga kusuhi swi fanele swi ku susumetela ku endla yini?

¹² Leswi siku ra Yehovha ri nga kusuhi swi fanele swi ku susumetela ku va kona eminhlanganweni ya Vukreste nkarhi ni nkarhi ni ku hlanganyela eka yona hi xitalo. (Vaheveru 10:24, 25) Ku endla tano swi ta ku pfuna leswaku u antswisa vuswikoti bya wena tanihi muchumayeri wa Mfumo loyi a lavaka ku kuma ni ku pfuna vanhu lava nga ni mboyamelo lowunene eka vutomi lebyi nga heriki. (Mintirho 13:48) Kumbexana u nga ha hisekela ku endla mintirho yin’wana evandlheni, yo tanihi ku pfuna vadyuhari ni ku khutaza vantshwa. Mintirho leyi yi nga ku tsakisa swinene!

Vuxaka Bya Wena Ni Van’wana

13. I swivutiso swihi leswi hi nga tivutisaka swona malunghana ni ku ambala vumunhu lebyintshwa?

¹³ Leswi siku ra Yehovha ri tshineleke, xana u fanele u endla matshalatshala lamakulu leswaku u “ambala vumunhu lebyintshwa lebyi tumbuluxiweke hi ku ya hi ku rhandza ka Xikwembu hi ku lulama ka ntiyiso ni vutshembeki”? (Vaefesa 4:20-24) Loko u ri karhi u hlakulela timfanelo leti fanaka ni leti Xikwembu xi ti kombisaka, van’wana va ta swi xiya leswaku u ‘famba hi moya wa Xikwembu’ naswona u kombisa mihandzu ya wona. (Vagalatiya 5:16, 22-25) Xana swi kona swilo swo karhi leswi wena ni ndyangu wa wena mi swi endleke leswaku mi ambala vumunhu lebyintshwa? (Vakolosa 3:9, 10) Hi xikombiso, xana u tiviwa hi ku endlela vapfumeri-kulobye ni vanhu van’wana swilo leswinene? (Vagalatiya 6:10) Ku dyondza Matsalwa nkarhi ni nkarhi swi ta ku pfuna leswaku u hlakulela timfanelo leti fanaka ni leti Xikwembu xi ti kombisaka, leti nga ta endla leswaku u lunghekela siku ra Yehovha.

14. Ha yini munhu a fanele a khongelela moya lowo kwetsima loko a ri karhi a tikarhatela ku hlakulela ku tikhoma?

¹⁴ U nga endla yini loko u ri ni ximbilwa-mbilwana kutani u xiya leswaku u fanele u dyondza ku tikhoma? Mfanelo yoleyo i yin’wana ya mihandzu leyi moya lowo kwetsima wa Xikwembu wu nga endlaka leswaku u va na yona. Hikokwalaho, khongelela moya lowo kwetsima hilaha Yesu a vuleke hakona loko a ku: “Hambetani mi kombela, mi ta nyikiwa; hambetani mi lava, mi ta swi kuma; hambetani mi gongondza, mi ta pfuleriwa. . . . Loko n’wina, hambiloko mi hombolokile mi tiva ndlela ya ku nyika vana va n’wina tinyiko letinene, Tatana la nge tilweni u ta nyika moya lowo kwetsima hilaha ku tlurisaka swinene eka lava n’wi kombelaka!”—Luka 11:9-13.

15. I yini leswi faneleke ku endliwa loko wena ni mupfumeri-kulobye mi tlulane milenge?

¹⁵ A hi nge wena ni mupfumeri-kulobye mi tlulane milenge. Emhakeni yoleyo, endla matshalatshala man’wana ni man’wana leswaku u lunghisa vuxaka bya wena na yena, xisweswo u kondletela ku rhula ni vun’we evandlheni. (Pisalema 133:1-3) Tirhisa ndzayo ya Yesu leyi tsariweke eka Matewu 5:23, 24 kumbe eka Matewu 18:15-17. Loko ku ri leswaku a wu tolovele ku hlundzuka dyambu ri kala ri pela, u fanele u hatla u lulamisa timhaka. Hakanyingi leswi lavekaka i ku rivalelana ntsena. Pawulo u tsarile: “Kombanani musa, mi tsetselelana swinene, mi rivalelana hi ku ntshunxeka tanihi leswi Xikwembu na xona xi mi rivaleleke hi ku ntshunxeka hi Kreste.”—Vaefesa 4:25, 26, 32.

16. Hi nga kombisa ntwela-vusiwana hi tindlela tihi evukatini?

¹⁶ Evukatini ku laveka leswaku nuna ni nsati va twelana vusiwana naswona minkarhi yin’wana va rivalelana. Loko u lava ku n’wi rhandza swinene ni ku n’wi twela-vusiwana munghana wa wena wa vukati, tikarhatele ku fikelela pakani leyi hi ku lava mpfuno eka Xikwembu ni le Ritweni ra xona. Xana u fanele u endla swo karhi leswaku u fambisana ni ndzayo leyi nga eka 1 Vakorinto 7:1-5 leswaku  u hunguta ntshikilelo ni ku papalata ku nga tshembeki? Hakunene mhaka leyi ya vutomi yi lava leswaku nuna kumbe nsati va “tsetselelana swinene.”

17. Hi wahi magoza lawa munhu a faneleke a ma teka loko a endle xidyoho lexikulu?

¹⁷ Xana u fanele u endla yini loko u endle xidyoho lexikulu hi ndlela yo karhi? Teka magoza yo lulamisa xiyimo xexo hi ku hatlisa. Tikarhatele ku lava mpfuno eka vakulu lava nga Vakreste. Swikhongelo ni ndzayo ya vona swi ta ku pfuna leswaku u hlakarhela hi tlhelo ra moya. (Yakobo 5:13-16) Tisole eka Yehovha hi xikhongelo. Loko u nga teki goza leri, u ta titwa u ri ni nandzu naswona ripfalo ra wena ri ta ku kingindza. Na Davhida u titwe hi ndlela yoleyo, kambe endzhaku ka loko a tisorile eka Yehovha u titwe a ntshunxekile! Davhida u tsarile: “Wa tsaka loyi a rivaleriweke swiendlo swakwe swo pfukela, loyi xidyoho xakwe xi funengetiweke. Wa tsaka munhu loyi Yehovha a nga vekiki xidyoho evitweni rakwe, loyi ku nga riki na vuxisi emoyeni wakwe.” (Pisalema 32:1-5) Yehovha u rivalela vadyohi lava hundzukaka hi mbilu hinkwayo.—Pisalema 103:8-14; Swivuriso 28:13.

U Nga Vi Xiphemu Xa Misava

18. U fanele u yi teka njhani misava?

¹⁸ A swi kanakanisi leswaku u langutele misava leyintshwa leyo saseka leyi Tata wa hina wa le tilweni a hi tshembiseke yona. Kutani, u va teka njhani vanhu lava nga lulamangiki lava fularheleke Xikwembu? Sathana, “mufumi wa misava,” a nga n’wi endlanga nchumu Yesu Kreste. (Yohane 12:31; 14:30) A swi kanakanisi leswaku a wu swi lavi ku lawuriwa hi Diyavulosi ni misava yakwe, kutani yingisa marito ya muapostola Yohane lama nge: “Mi nga rhandzi misava kumbe swilo leswi nga emisaveni.” Rero i goza lerinene hikuva “misava ya hundza ni ku navela ka yona, kambe loyi a endlaka ku rhandza ka Xikwembu u tshama hi masiku.”—1 Yohane 2:15-17.

19. Hi tihi tipakani leti vantshwa lava nga Vakreste va khutaziwaka ku tivekela tona?

¹⁹ Xana vana va wena wa va pfuna leswaku va “tihlayisa [va] nga ri na xivati xa misava”? (Yakobo 1:27) Sathana u lava ku phasa vana va wena kukota munhu la phasaka tinhlampfi. Swintlawana swo hambana-hambana ni mavandla man’wana swi kunguhateriwe ku endla leswaku vantshwa lava swi nghenelaka va tihlanganisa ni misava ya Sathana hi ku olova. Kambe malandza ya Yehovha se i swirho swa nhlengeletano leyi ku nga yona ntsena yi nga ta pona makumu ya mafambiselo lawa ya swilo. Hikwalaho vantshwa lava nga Vakreste va fanele va khutaziwa leswaku va “va ni swo tala swo swi endla entirhweni wa Hosi.” (1 Vakorinto 15:58) Vatswari lava chavaka Xikwembu va fanele va pfuna vana va vona ku tivekela tipakani leti nga ta va tisela ntsako ni ku hanya vutomi lebyi enerisaka lebyi tsakisaka Xikwembu, naswona va va pfuna ku lunghekela siku ra Yehovha.

Ehleketa Hi Vutomi Endzhaku Ka Siku Lerikulu Ra Yehovha

20. Ha yini hi fanele hi tshama hi langutele vutomi lebyi nga heriki?

²⁰ Loko u tshama u langutele vutomi lebyi nga heriki u ta swi kota ku rindza siku ra Yehovha hi ku rhula. (Yudha 20, 21) Leswi u byi languteleke hi mahlo-ngati vutomi lebyi nga heriki eParadeyisini, xisweswo u ni ntshembo wa ku tlhela u va ni matimba ya vuntshwa, nkarhi lowu nga pimekiki wo fikelela tipakani letinene ni ku dyondza leswi engetelekeke hi Yehovha. Entiyisweni u nga ya emahlweni u dyondza hi Xikwembu hilaha ku nga heriki hikuva vutivi lebyi vanhu va nga na byona sweswi byo va “swiphemunyana swa tindlela ta xona” ntsena. (Yobo 26:14) Wolowo i ntshembo lowu tsakisaka!

21, 22. I yini leswi wena ni vanhu lava pfuxiweke mi nga ha vulavurisanaka ha swona?

²¹ EParadeyisini, vanhu lava pfuxiweke eku feni va ta hi byela swilo swa nkarhi lowu hundzeke leswi  a hi nga swi tivi. Enoko u ta hi hlamusela ndlela leyi a veke ni xivindzi xo kota ku twarisa rungula ra Yehovha eka vanhu lava nga N’wi chaviki. (Yudha 14, 15) A swi kanakanisi leswaku Nowa u ta hi hlamusela leswaku a swi ri njhani ku aka ngalava. Abrahama na Sara va ta hlamusela ndlela leyi va titweke ha yona loko va siya vulovolovo bya le Ura kutani va ya tshama emintsongeni. Anakanya loko Estere a hi hlamusela malunghana ni ndlela leyi a lweleke vuhlayiseki bya vanhu varikwavo kutani a sivela kungu ra Hamani ra ku lava ku va lovisa. (Estere 7:1-6) Anakanya hi Yonasi loko a hi byela hi ta masiku manharhu lawa a ma heteke a ri ekhwirini ra nhlampfi leyikulu kumbe Yohane lowo Khuvula a hi hlamusela ndlela leyi a titweke ha yona loko a khuvula Yesu. (Luka 3:21, 22; 7:28) Hakunene hi ta dyondza swilo swo tala leswi tsakisaka!

²² Hi nkarhi wa Ku Fuma Ka Kreste Ka Gidi Ra Malembe, u nga ha va ni lunghelo ra ku pfuna vanhu lava pfuxiweke leswaku va kuma “vutivi bya Xikwembu.” (Swivuriso 2:1-6) Namuntlha, swa tsakisa ku vona vanhu va dyondza hi Yehovha Xikwembu naswona va hanya hi ku ya hi leswi va swi dyondzeke! Kambe anakanya hi ntsako lowu u nga ta va na wona enkarhini lowu taka loko Yehovha a katekisa matshalatshala ya wena yo dyondzisa vanhu lava hanyeke eminkarhini ya khale naswona va swi tsakela swinene leswi u va dyondzisaka swona!

23. I yini leswi hi faneleke hi tiyimisela ku swi endla?

²³ Mikateko leyi hi yi tsakelaka sweswi hileswi hi nga vanhu va Yehovha a yi hlayeki. (Pisalema 40:5) Ngopfu-ngopfu hi tlangela malunghiselelo ya moya lawa Xikwembu xi hi nyikaka wona. (Esaya 48:17, 18) Ku nga khathariseki leswaku swiyimo swa hina swi njhani, a hi endleleni Yehovha ntirho wo kwetsima hi mbilu hinkwayo tanihi leswi hi rindzeleke siku rakwe lerikulu.

U Nga Hlamurisa Ku Yini?

• “Siku ra Yehovha” i yini?

• U nga ri lunghekela njhani siku ra Yehovha?

• Leswi siku lerikulu ra Xikwembu ri nga kusuhi, i mindzulamiso yihi leyi hi nga yi endlaka?

• I yini leswi u swi languteleke hi mahlo-ngati endzhaku ka loko siku ra Yehovha ri hundzile?

[Swivutiso Swa Dyondzo]

[Xifaniso eka tluka 12]

Yesu a a lunghekele ku langutana ni miringo

[Xifaniso eka tluka 15]

Ku ta va lunghelo lerikulu ku pfuna vanhu lava pfuxiweke leswaku va dyondza hi Yehovha!