‘Lava Nga Ni Mboyamelo Lowunene’ Va Amukela Ntiyiso
‘Lava Nga Ni Mboyamelo Lowunene’ Va Amukela Ntiyiso
“Hinkwavo lava a va ri ni mboyamelo lowunene eka vutomi lebyi nga heriki va ve vapfumeri.”—MINT. 13:48.
1, 2. Xana Vakreste vo sungula va byi hetisise njhani vuprofeta bya Yesu bya leswaku mahungu lamanene ma ta chumayeriwa emisaveni hinkwayo leyi akiweke?
BUKU ya le Bibeleni ya Mintirho yi tamele rungula leri tsakisaka ra ndlela leyi Vakreste vo sungula va byi hetisiseke ha yona vuprofeta bya Yesu, bya leswaku mahungu lamanene ya Mfumo ma ta chumayeriwa emisaveni hinkwayo leyi akiweke. (Mat. 24:14) Vahuweleri lava hisekaka va veke xikombiso lexinene lexi faneleke xi landzeriwa hi hinkwavo lava a va ta va landzela. Leswi vadyondzisiwa va Yesu a va chumayela hi ku hiseka eYerusalema, vanhu va magidi ku katsa ni “ntshungu lowukulu wa vaprista,” va sungule ku hlanganyela ni vandlha ra lembe-xidzana ro sungula.—Mint. 2:41; 4:4; 6:7.
2 Varhumiwa va lembe-xidzana ro sungula va pfune vanhu vo tala leswaku va va Vakreste. Hi xikombiso, Filipi u ye eSamariya laha mintshungu yi rhiyeke ndleve eka leswi a swi vuleke. (Mint. 8:5-8) Pawulo u ye etindhawini to tala swin’we ni vanghana vakwe vo hambana-hambana, va ya chumayela rungula ra Vukreste eKipra, etindhawini tin’wana ta le Asia Minor, eMakedoniya, eGrikiya ni le Italiya. Emitini leyi a chumayeleke eka yona, Vayuda vo tala ni Magriki va ve Vakreste. (Mint. 14:1; 16:5; 17:4) Tito u chumayele eKreta. (Tito 1:5) Petro a a chumayela eBabilona, naswona loko a tsala papila ra yena ro sungula kwalomu ka 62-64 C.E., ntirho wa Vakreste wo chumayela se a a wu tiviwa ePonto, eGalatiya, eKapadokiya, eAsia ni le Bitiniya. (1 Pet. 1:1; 5:13) Hakunene a a yi tsakisa minkarhi yoleyo! Ndlela leyi a a va hiseka ha yona Vakreste va lembe-xidzana ro sungula yi endle leswaku valala va vona va vula leswaku va “[pfuxe] ngundzungundzu emisaveni leyi akiweke.”—Mint. 17:6; 28:22.
3. Hi byihi vuyelo lebyi namuntlha vahuweleri va Mfumo va byi kumaka loko va ri karhi va chumayela naswona wena u titwa njhani hi sweswo?
3 Manguva lawa Vakreste va andza hi ndlela yo hlamarisa. A swi kanakanisi leswaku wa khutazeka loko u hlaya xiviko xa lembe ni lembe xa Timbhoni ta Yehovha, kutani u vona vuyelo lebyi veke kona emisaveni. Hakunene swa ku tsakisa ku twa leswaku vahuweleri va Mfumo va fambise tidyondzo ta Bibele to tlula timiliyoni ta tsevu hi lembe ra ntirho ra 2007. Ku engetela kwalaho, nhlayo ya lava veke kona eXitsundzuxweni xa rifu ra Yesu Kreste n’wexemu yi komba leswaku vanhu va kwalomu ka timiliyoni ta khume lava nga chumayeliki mahungu lamanene va ve kona eka xiendlakalo lexi xa nkoka. Leswi swi komba leswaku ntirho wa ha ri wukulu.
4. I vamani lava amukelaka rungula ra Mfumo?
4 Namuntlha, “hinkwavo lava [nga] ni mboyamelo lowunene eka vutomi lebyi nga heriki,” va amukela ntiyiso hilaha a swi ri hakona eka lembe-xidzana ro sungula. (Mint. 13:48) Yehovha u vitana vanhu vo tano leswaku va ta enhlengeletanweni ya yena. (Hlaya Hagayi 2:7.) Leswaku hi ta hlanganyela hi xitalo entirhweni lowu wo hlengeleta hi fanele hi va ni langutelo rihi?
Loko U Chumayela U Nga Hlawuli Ndluwa U Siya Hove
5. Xana Yehovha u amukela vanhu va njhani?
5 Vakreste va lembe-xidzana ro sungula a va swi tiva leswaku “Xikwembu a xi yi hi nghohe, kambe eka tiko rin’wana ni rin’wana munhu loyi a xi chavaka a tlhela a endla ku lulama wa amukeleka eka xona.” (Mint. 10:34, 35) Munhu loyi a lavaka ku va ni vuxaka lebyinene na Yehovha u fanele a va ni ripfumelo eka gandzelo ra Yesu ra nkutsulo. (Yoh. 3:16, 36) Nakambe Yehovha u lava leswaku “vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.”—1 Tim. 2:3, 4.
6. I yini leswi vachumayeri va Mfumo va nga fanelangiki va swi endla naswona ha yini?
6 Vahuweleri va mahungu lamanene a va fanelanga va ehleketelela vanhu hi ku ya hi rixaka, swikhundlha, ku languteka ka vona, vukhongeri bya vona kumbe swin’wana. Anakanya hi leswi: Xana a wu tsaki leswi munhu wo sungula loyi a ku chumayeleke a a nga hlawuli ndluwa a siya hove? U nga ha yima-yimi, chumayela rungula leri ponisaka vutomi eka munhu un’wana ni un’wana loyi a rhiyaka ndleve.—Hlaya Matewu 7:12.
7. Ha yini hi nga fanelanga hi hlawula lava hi va chumayelaka?
7 Yehovha u veke Yesu leswaku a va Muavanyisi; hikwalaho hina a hi na yona mfanelo yo hlawula ndluwa hi siya hove. Sweswo swa twala tanihi leswi hina hi nga hlawulaka vanhu hi ku ya ‘hi leswi hi swi vonaka ematihlweni ya hina’ kumbe ‘hi ku ya hi leswi twiwaka hi tindleve ta hina,’ kasi Yesu u tiva leswi nga emiehleketweni ni le mbilwini ya munhu.—Esa. 11:1-5; 2 Tim. 4:1.
8, 9. (a) Xana Sawulo a a ri munhu wa njhani loko a nga si va Mukreste? (b) Hi dyondza yini eka ntokoto wa muapostola Pawulo?
8 Vanhu va mixaka hinkwayo va ve malandza ya Yehovha. Xikombiso xin’wana i xa Sawulo wa le Tarso, loyi endzhaku a tiviweke tanihi muapostola Pawulo. Sawulo, loko a ha ri Mufarisi a a va xanisa swinene Vakreste. Leswi a a kholwa leswaku a hi vagandzeri va Yehovha va ntiyiso, sweswo swi endle leswaku a xanisa Vakreste. (Gal. 1:13) Hi ku ya hi langutelo ra munhu, a swi nga tshembisi leswaku a nga va Mukreste. Kambe Yesu u vone leswinene embilwini ya Sawulo hiloko a n’wi hlawula leswaku a endla ntirho wo hlawuleka. Hikwalaho, Sawulo u ve un’wana wa swirho leswi hisekaka ngopfu swa vandlha ra Vukreste ra lembe-xidzana ro sungula.
9 Xana hi dyondza yini eka ntokoto wa muapostola Pawulo? Ensin’wini ya hina, kumbexana ku ni vanhu lava tikombaka va venga rungula ra hina. Hambileswi swi nga ha vonakaka onge a va nge vi Vakreste va ntiyiso, a hi fanelanga hi tshika ku ringeta ku vulavula na vona. Minkarhi yin’wana hambi ku ri vanhu lava u vonaka onge a va nge pfuki va rhiye ndleve, va ri amukela rungula ra hina. Ntirho wa hina i ku chumayela vanhu hinkwavo hi “nga rhuteli.”—Hlaya Mintirho 5:42.
Lava Chumayelaka Va Nga “Rhuteli” Va Ta Kuma Mikateko
10. Ha yini hi nga fanelanga hi tshika ku chumayela vanhu lava nga ha vonakaka va chavisa? Rungula mintokoto ya le ndhawini ya ka n’wina.
10 Ku languteka ka munhu ku nga hi kanganyisa. Hi xikombiso, Ignacio * u sungule ku dyondza Bibele ni Timbhoni ta Yehovha loko a ha ri ekhotsweni etikweni rin’wana le Amerika Dzonga. Vanhu a va n’wi chava hileswi a a rhandza tinyimpi. Hikwalaho, vabohiwa-kulobye lava a va endla swilo swo karhi ni ku swi xavisa a a va kombela Ignacio leswaku a va landzela timali ta vona eka lava va kolotaka. Hambiswiritano, loko Ignacio a ri karhi a endla nhluvuko hi tlhelo ra moya ni ku tirhisa leswi a a swi dyondza, u lo swi thya, leswa madzolonga a va ni musa. A ku nga ha ri na loyi a n’wi kombelaka ku ya n’wi londzela mali yakwe, kambe Ignacio wa tsaka leswi tidyondzo ta Bibele ni moya wa Xikwembu swi cinceke vumunhu byakwe. Nakambe wa tsaka leswi vahuweleri va Mfumo lava endleke matshalatshala yo dyondza na yena va nga yangiki hi nghohe.
11. Ha yini hi tshamela ku tlhelela eka vanhu lava hi va chumayeleke?
11 Xin’wana lexi endlaka leswaku hi tshamela ku tlhelela eka vanhu lava hi vulavuleke na vona hi mahungu lamanene hileswi swiyimo swa vona ni malangutelo swi nga ha cincaka. Endzhaku ka loko hi va endzerile van’wana va nga ha va va sale va biwa hi mavabyi, va heleriwa hi ntirho kumbe va feriwa hi varhandziwa va vona. (Hlaya Eklesiasta 9:11.) Swiphiqo swa misava swi nga ha endla vanhu va ehleketa kambirhi hi ta vumundzuku bya vona. Swilo sweswo swi nga ha endla munhu loyi eku sunguleni a a nga tsakeli kumbe loyi a a kaneta, leswaku a amukela mahungu lamanene. Hikwalaho, hi fanele hi huwelela mahungu lamanene kwihi na kwihi laha swiyimo swi pfumelaka.
12. Hi fanele hi va teka njhani vanhu lava hi va chumayelaka naswona ha yini?
12 I ntolovelo wa vanhu ku hlawula van’wana hi ku ya hi leswi va langutekisaka xiswona. Kambe Yehovha u languta munhu ha un’we. U vona timfanelo letinene eka un’wana ni un’wana. (Hlaya 1 Samuwele 16:7.) Na hina loko hi ri ensin’wini hi fanele hi endla tano. Mintokoto yi komba leswaku vo tala va hundzuka hikwalaho ka leswi vahuweleri va nga hlawulangiki ndluwa va siya hove.
13, 14. (a) Ha yini phayona rin’wana ri tshike ku endzela wansati loyi ri nga n’wi kuma ensin’wini? (b) Xana hi nga dyondza yini emhakeni leyi?
13 Sandra, la nga phayona ra xisati loko a ri karhi a chumayela hi yindlu ni yindlu exihlaleni xa Kharibiya u hlangane na Ruth, loyi a a rhandza minkhuvo leyikulu ya huwa. Ruth u wine kambirhi eminkhubyeni yoleyo. Mahungu lawa Sandra a n’wi byeleke wona ya n’wi tsakise ngopfu, hiloko va hlela ku dyondza Bibele swin’we. Sandra u ri: “Loko ndzi nghena endlwini yakwe ndzi vone xifaniso lexikulu xa Ruth a ambale swiambalo swa nkhuvo wolowo, ni tikhapu leti a nga ti wina. Ndzi ehlekete leswaku leswi a nga munhu wa ndhuma ni ndlela leyi a yi rhandzisaka xiswona minkhuvo leyi, a nge wu tsakeli ntiyiso, kasi a ndzo tixisa. Hiloko ndzi nga ha n’wi endzeli.”
14 Hi ku famba ka nkarhi, Ruth u te eHolweni ya Mfumo, loko nhlangano wu herile, u vutise Sandra a ku, “Ha yini u nga ha ti u ta dyondza na mina?” Sandra u kombele ndzivalelo kutani a hlela ku ya emahlweni ni dyondzo. Ruth u endle nhluvuko hi xihatla, a susa swifaniso leswiya swa yena, kutani a sungula ku hlanganyela eka minhlangano hinkwayo ni ku ya entirhweni wo chumayela ivi a hetelela a tinyiketele eka Yehovha. Entiyisweni, Sandra u xiye leswaku leswi a a swi ehleketa eku sunguleni a ku ri ku tixisa.
15, 16. (a) Ku ve ni vuyelo byihi loko muhuweleri un’wana a chumayele xaka rakwe? (b) Ha yini hi fanele hi chumayela maxaka ya hina hambiloko ma endla swilo leswi humeke endleleni?
15 Van’wana lava chumayeriweke hi maxaka ya vona va amukele ntiyiso hambileswi a va vonaka onge a va wu tsakeli. Xiya xikombiso xa Joyce, makwerhu wa xisati la nga Mukreste wa le United States. Sivara wa yena a a tshamela ku khomiwa a tlhela a ntshunxiwa, ku sukela loko a ha ri n’wana wa kondlo-a-ndzi-dyi. Joyce u te: “Vanhu a va vula leswaku a nga xi tivi lexi a xi hanyelaka hikuva a a xavisa swidzidzirisi, a a ri khamba naswona a a endla ni swilo swin’wana swo tala swo biha. Hambiswiritano, ndzi hambete ndzi n’wi chumayela ntiyiso wa le Bibeleni ku ringana malembe ya 37, hambileswi a a endla swilo leswi.” Ku lehisa mbilu ka Joyce hikwalaho ko lava ku pfuna sivara wakwe ku ve ni vuyelo lebyinene hikuva eku heteleleni u sungule ku dyondza Bibele ni Timbhoni ta Yehovha naswona a hundzuka swinene evuton’wini bya yena. Sivara wa Joyce wa ha ku khuvuriwa a ri ni malembe ya 50 entsombanweni wa muganga wa le California, le U.S.A. Joyce u ri: “Ndzi xiririke mihloti ya ntsako. Ndzi tsake swinene hileswi ndzi nga n’wi helelangiki mbilu.”
16 U nga ha kanakana ku chumayela maxaka man’wana ya wena hi ntiyiso wa Bibele hikwalaho ka mahanyelo ya wona. Joyce a nga tshikanga ku chumayela sivara wakwe. Xana munhu a nga swi tivisa ku yini leswi nga embilwini ya munhu un’wana? Swi nga ha endleka munhu yoloye ku ri khale a ri karhi a lavana ni vukhongeri bya ntiyiso. Hikwalaho, u nga tshiki ku n’wi chumayela.—Hlaya Swivuriso 3:27.
Buku Leyi Pfunaka Swinene Ku Dyondza Bibele
17, 18. (a) Xana swiviko leswi humaka emisaveni hinkwayo swi kombisa yini malunghana ni ndlela leyi yi pfunaka ha yona buku leyi nge Xana Bibele Yi Dyondzisa Yini Hakunene? (b) I mintokoto yihi leyi khutazaka leyi u yi kumeke hi ku tirhisa buku leyi?
17 Swiviko leswi humaka emisaveni hinkwayo swi kombisa leswaku vanhu vo tala va timbilu letinene va yi tsakela swinene buku yo pfuna ku dyondza Bibele leyi nge, Xana Bibele Yi Dyondzisa Yini Hakunene? Penni, la nga phayona ra xisati le United States, u sungule ku dyondza ni vanhu vo tala hi buku leyi. Vambirhi va vanhu lava a a dyondza na vona a ku ri vanhu lava dyuhaleke lava a va ti rhandza ngopfu tikereke ta vona. Penni a a nga swi tivi leswaku va ta ti teka njhani tidyondzo ta Matsalwa leti nga ebukwini leyi nge Leswi Bibele Yi Swi Dyondzisaka. Nilokoswiritano, u tsale a ku: “Leswi rungula ra kona ri nga erivaleni, ri twisisekaka naswona ri komisiweke, swi va oloverile leswaku va amukela leswi a a va swi dyondza handle ko holova.”
18 Pat, la nga muhuweleri le Britain, u sungule ku dyondza Bibele ni wansati un’wana loyi a a ri muhlapfa la humaka eAsia. Wansati wa kona u boheke ku baleka etikweni ra rikwavo endzhaku ko va nuna wakwe ni vana vakwe va majaha va tekiwe hi masocha lama lwisaka mfumo naswona a nga ha tlhelanga a va vona. Vutomi byakwe a byi ri ekhombyeni, kaya rakwe ri hisiwile naswona u pfinyiwile hi vavanuna vo tala. Swilo leswi hinkwaswo swi endle leswaku a tivutisa leswaku wa ha hanyela yini, naswona a a tshamela ku ehleketa hi ku tidlaya. Kambe, dyondzo ya Bibele yi n’wi nyike ntshembo. Pat u tsale a ku: “Ndlela leyi rungula leri nga ebukwini leyi nge Leswi Bibele Yi Swi Dyondzisaka ri olovisiweke ha yona ni swifaniso swa kona, swi fikelele mbilu ya yena.” Xichudeni lexi xi endle nhluvuko hi ku hatlisa, xi va muhuweleri la nga khuvuriwangiki kutani xi vula leswaku xi lava ku khuvuriwa eka nhlengeletano leyi a yi ta landzela. Swa tsakisa hakunene ku pfuna vanhu va timbilu letinene leswaku va twisisa ni ku tlangela ntshembo lowu hlamuseriwaka hi Matsalwa!
“Hi Nga Tshiki Ku Endla Leswi Nga Swinene”
19. Ha yini ntirho wo chumayela wu fanele wu endliwa hi xihatla?
19 Siku na siku, ntirho wa hina wo chumayela ni ku endla vadyondzisiwa wu ya wu lava ku endliwa hi xihatla. Lembe ni lembe vanhu va magidi lava nga ni mboyamelo lowunene va amukela mahungu lamanene. Kambe, “siku lerikulu ra Yehovha ri le kusuhi,” leswi vulaka leswaku lava omelelaka emunyameni wa moya va ‘tshetshelekela eku dlayiweni.’—Sof. 1:14; Swiv. 24:11.
20. Un’wana ni un’wana wa hina u fanele a tiyimisela ku endla yini?
20 Hi nga ha va pfuna vanhu vo tano. Kambe leswaku hi endla tano, hi fanele hi tekelela Vakreste va lembe-xidzana ro sungula, lava “[hambeteke] va nga rhuteli ku dyondzisa ni ku vula mahungu lamanene hi ta Kreste, Yesu.” (Mint. 5:42) Tekelela xikombiso xa vona hi ku tiyisela ku nga khathariseki maxangu, hi ku nyikela nyingiso eka ‘vutshila bya wena byo dyondzisa’ ni hi ku chumayela u nga hlawuli ndluwa u siya hove! “Hi nga tshiki ku endla leswi nga swinene,” hikuva loko hi tiyisela, Xikwembu xi ta hi katekisa swinene.—2 Tim. 4:2; hlaya Vagalatiya 6:9.
[Nhlamuselo ya le hansi]
^ par. 10 Mavito man’wana ma cinciwile.
U Nga Hlamula Njhani?
• I vamani lava amukelaka mahungu lamanene?
• Ha yini hi nga fanelanga hi hlawula vanhu lava hi va chumayelaka?
• I vuyelo byihi lebyi kumiwaka hi ku tirhisa buku leyi nge Xana Bibele Yi Dyondzisa Yini Hakunene?
[Swivutiso swa dyondzo]
[Swifaniso eka tluka 13]
Vanhu va magidi va timbilu letinene va amukela mahungu lamanene
[Swifaniso eka tluka 15]
Hi nga dyondza yini eka ndlela leyi muapostola Pawulo a hundzukeke ha yona?
[Xifaniso eka tluka 16]
Vahuweleri va mahungu lamanene va chumayela vanhu hinkwavo